خريطة البلاد التونسية
نا فهمت علاش امورنا ما تتصلحش لقيام عيسى.
البوزيسيون متاع تونس غالطة. جايين محيوزين مابين الجزائر وليبيا. بالسيف مادبرنا بلاصة .ثلاثة لاف سنا ونحنا متكونسين ما انجموش نتحركوا لا منّا ولامنّا .شوفوا خريطة تونس تحس كرومتها عوجة معنوزة ما تتحركش. نتصوّر لوكان جت تونس بالعرض خير. راسنا في الجزائر وكرعينا في ليبيا خير. على الاقل راو عنّا طرف قاز وبترول اندوّرا بيهم الزيرو .حتى نفّة الملح إلّي عنّا ياربي تزينا فول مدمّس نهار عيد لفطار وروس قنّارية نعدّوا بيهم السهرية .وزيد تونس صغيرة برشا. تعرفوا عام تسعة وستين كي طلعوا للقمرة وشافوا تونس تخاطروا عليها. واحد يقول مسّاك طايح وواحد يقول دعسوقة لابدة على البرد .البلدان الكل مستاسعة على العرض كان نحنا ممدودين على طولنا. تقول علينا راقدين في دار ضياف وحاشمين لا نتقلّبوا ونصكّوا كرسي وانفيقوا امّالي الدار. حسب رايي نتفاهموا مع ليبيا والجزائر وانبدلوا البوزيسيون ثمش ما امورنا تتصلح .
