الاحزاب التونسية
نا قبل منين كنت في التجمع كنت شايخ بالإعانات. في كل عودة مدرسية يعطونا فلوس في ماصوّات. وكرارس وكتب باش انفرقْوهم على المحتاجين والزواولة .شطر لكتب والكرارس انقبلهم للمكتباجي. والصوارد نوخذ شطرهم. وكانوا في كل صيف يستدعونا للولاية ويعطونا منح للفلّاحة باش يقْتلوا النجم في سوانيهم .والله تجينا دزة باهية في كل صيف انقْعد بيها مسلاني .وكيف كيف نقسم شطرها مع جماعتي .شخنا يامنح يارحلات ياهدايا يابورتكليات وزيد حتى المواطنين موش امقصرين معايا. شبعة عسل ولوز وساعة ساعة دلاعة والا اثنين. حاجة وحدة الحق في التجمع موش ساهلة. هي انك توصل تولّي عرف. يلزمك برشا وقت. القيادة في التجمع تخدملها وتحفى رجلك عليها تثني عليها الركبة باش توصللها
عاد نا بديت نقْرب باش اندبّر بلاصة في الشعبة المهنية وزعمة حطيت رجلي وفسدتها عليّا الثورة. وتكسّرت. اعوذ بالله والله تهرشمت تهرشيمة الذين كفروا .ايّا برّا قْلت نبداها من جديد .لزّيت شوي لجماعة اليسار لقْيتهم فالسين في حالة يابسين حطبة حتى حق قهوة ماعندهمش هوما يعيطولي رفيق ونا نتلفت للي بجنبي فيبالي اسمو رفيق .قلت فك عليا منهم. متاعين كان عرك .قعدت شوي مع القوميين لقْيتهم اعظم منهم .كي يلقْى باش يخلص عليك قهوة باقي باهي.وزاد قالولي عاونا في كراء المقر. يموتوا كان على ام كلثوم وسعدون جابر .يحكوا على حرب اكتوبر ويعرفوا بغداد زنقْة زنقْة . آآآقلت هاي النهضة فرصة .حزب معبي. ولصقتلهم الحق شيخوني بالكتب والمنشورات. اول حاجة شوقْوني فيها هي كمية الدخان.وعقْروني في عشرة لاف حق انخراط . وامبعد عطوني جريدة الفجر وقالولي اقراها .حليتها ما لقْيتش فيها حظك اليوم. واش نندب بيها .حتى تصاورها سوداء وبيضاء.وساعات نلقا فيها تصويرة راجل لابس كبوس كي نسالهم يقولولي هذاكا حسن البنّا نا اصلا فيبالي حسن البنّا بو الممثلة التونسية ريم البنّا وفي قْلبي انقْول النار تخلف الرماد .كان تولهى ببنتو خير . عاد بقيت راكش بحذاهم .هوما الحق كرماء حاجة وحدة لفلوس ماء آماء والله لاتراها .رحلة بلاش ممكن. غداء بلاش ممكن. قهوة بلاش ممكن. اوما حب يشرنن لا. والله لوكان تنبت شجرة. فديت منهم. برّا دورتها للنداء قْلت نسترجع ايامات العز مع التجمع. الحق ما قصروش معايا حتى هوما نهار كامل يخلصوا عليا في لغداوات. والعشاوات.ويشرولي في الكايك. يحسابوني برشني يقْزنو فيه لرمضان. طلع الباجي وتلفتلنا وقالنا بروا رهزوا .وشدوا الجماعة بلاصتهم. وبدوا ويتفتفتوا لقْيت روحي انعوم في الشايح. وماني نعرف في السياسة يلزمك تكون رقْعة .قْلت بالله لا فلّتهم. قْعدت نستنى .هاو الشاهد عمل حزب. هاو مهدي جمعة عمل حزب. درت منّا جيت من غادي لقْيتهم طلعكيفاش. اصلا يتكلموا برشا بالسوري. ونا عربي مكشلط. يلزمني اندبر حاجة تشبهني. اه قْلت عليّا بسي نبيل ومااندراك .ياولدي وليت كل ليلة نقرى سورة مريم على سي خليل.طابع صورتو في ظهري أصل. ودرت معاهم لحوم حومة حومة .ولرياف الكل. ثيقوني ولّوا يبيتوا بحذايا في الكسكسي والمقرونة. شبعت بالطماطم والتن . حتى هوما اقْطع من جماعة النهضة. نانطلبهم في لفلوس وهوما يقْولولي بح . كليت بخس من عند لعباد الكل لن شبعت. وين نتلفت يقولولي يا مقرونة .وربحنا في الانتخابات. ومن اول ضربة لقْينا ارواحنا في المعارضة .قْلت نقْعد معاهم وين تعرف على الدنيا .وفعلا جانا سي المشيشي يرحم من قرّى وورّى. وعمللنا حكومة شبابة .ودخلنا معاه في الحكم .نا مازلت فارح وحنتي في ايديّا .وسي نبيل يدكّوه في الحبس .ملاّ زهر امقود .يلعنبوك ها سياسة. وليه فيبالكم سلّمت. لالا اشبيكم السياسة فن راهو. هاني تو حاط عيني على زوز سكورهم طالع .عبّورة مرا .تقول انت ساهلة .الواحد يلقْى كيفاش ايعضها. والّا سيفون نحسوا رجولي واباندي. صحيح ما يطلعش عليّا اما بربي الواحد يبقى هكا براسو .ماهو يلزمو مجموعة يتكّى عليها ثمش ما يمكمك معاهم حويجة. اي عاد باش تنصحوني بعبّورة والّا بالبطل سيفون عادي ما يقلقنيش راهو. بالنسبة لعبير انجم انقْودلها لحصان والا نضربلها البندير .وبالنسبة لسيفون انجم انعض على لساني ونبدى انكشكش . والله حرت ساعات انقْول نمشي لعبير هاك الحنطويل الي بحذاها موش عاجبني. نمشي انطيروا وانشد بلاصتوا وساعات انقْول جماعة سيف خير اصلا نا انشيخ عليها كي تلحم وهوايتي خنيفري . هي عاد باش تنصحوني .
