رب عذر أقبح من ذنب
الشاعر العربي حسن بن الهاني .تعرف برشا بلقب ابو نواس .الشاعرهذا فينومان كبير.عمل برشا قصايد وفي الأغراض الكل .وتعرف بقصايدو الي تحكي على الشراب حاشا الحجر الصحي. ومن اشهر ما قال قصيدة سلاف دن*كشمس دجن*كدمع جفن*كخمر عدن/ طبيخ شمس*كلون ورس *ربيب فرس*حليف سجن . وقصيدة دع عنك لومي فان اللوم اغراء*وداوني بالتي كانت هي الداء*صفراء لاتنزل الاحزان ساحتها* لومسها حجر مسته سراء . وإلّي مايعرفوشوا برشا عباد انو متتلمذ على ايمة في الدين. ومتضلع في الفقه والحديث .وعندو معرفة كبيرة بأحكام القرآن
بونواس كان مهف أزرڨ .ويكوّر
بشعراء وحكام زمانو. وكان طقطوقة كعبة صحيحة . مرّة من المرّات كان ڤاعد يدڨ في
الناب مع هارون الرشيد ويفدلكوا . سكت شوي هارون وڤالو بربي سي بونواس .عندكش هكّا
حكايا والّا محل شاهد اتنجم اتفرسلنا بيه المثل القائل " رب عذرا اقبح من ذنب
" نڤنڨ بونواس راسو وڨالو اصبر عليّا نهيرين ثلاثة وانڤلك . بعد نهارين كان
سي هارون ڤاعد في الإيتاج الثاني من القصر متاعو ويتفرج على الجردة .عندو فيها
دجاجات وحمام ونعامة وطاوس ونافورة ونوّار وزوز أحواض حبق. ويهبط عليه بو نواس
بشلبوق رياحي على ڤفاه .كرومة هارون اطرشڤت . وماكم تعرفو الشلبوق ينرفز .طلعتلو
سي هارون وسب بونواس من الجدرة لولى. وڤالو عجب تضرب سيدك . ڨالو بو نواس سامحني
والله غلطت فيك .فيبالي مدام زينب مرتك .زاد هبل عليه هارون .وڤالو بالله هكّا مع
مدام زينب مرتي تفدلك معاك .ضحك بو نواس وڤالو سيدي الملك .موش ڤتلي جيبلي محل
شاهد على رب عذر اقبح من ذنب .هاني عطيتك عذر اقبح من ذنب .عاد هارون جمرة وصبيت
عليها الماء . شاخ على الفازة . ونادى واحد من الكونتابليا متاعو .وڤالو اعطي لعمك
بونواس زوز ملاين ونص وزوز بونوات مونة يقضي بيهم من الماڨازان جينيرال متاع
القصر...
على فكرة
الحسن بن الهاني والّا بونواس كيما تعرف . صحيح عدّى عمرو كامل بالعو وكان يلعبلهم
اربعة طراح شكبة بعاجينهم وما يغلطش في لحساب موش كي ذري توّا على طابو يخش الخلاء
. بو نواس في اخر عمرو تاب لربي . واتزهد من الدنيا . وكي مات وجوا يغسلوا فيه .
لڤوه كاتب قصيدة وحاطها تحت لمخدة وڤال فيها : أدعوك رب كما أمرت تضرعا*فإذا رددتَ
يدي فمن ذا يرحـم *ما لي إليك وسيلة إلا الـرّجـا *وجميل عفوك ثم اني مسلم .
الله
يرحمو وينعمو ويغفرلو ويسكنو فراديس جناته سي بونواس الله يذكرو بالخير