إجتماع حزبية
ثمّا جماعة منظمين. يبدوا اجتماعاتهم بآيات بينات من الذكر الحكيم .ويتكلّم المسؤول ويقدم جدول أعمال الجلسة .إلّي هو عادة أومور مالية وانخراطات جديدة وتجديد لقديمة .ونظر في مراسلات وتقدير موقف .و رفع مخرجات للمركزي .طبعا الاجتماعات هذه ديما مفوّحة ببعض التدخلات لاعلاقة لها بالموضوع. مع شويّا سبّان للاصحاب والخصوم على حد السواء. وشويّا تخرتيل وكيفاش نسلكوها بأخف الأضرار. واحد يحكي على تنظيم الحزب .ولوخر يحكيلوا على القانون الأساسي والمؤتمر. ولوخر يتشكّى ويتبكّى من الدعم. ولوخر يحكيلوا على الاسناد الحكومي .ولوخر يحكيلوا على البلايص المقترحة لرؤساء مصالح ومعتمدين وولاة .وواحد يترشّف في اكسبراس وساكت .وفي ڨلبوا يقول ملّا اجتماع. ويستنّى وقتاش يوفى الاجتماع. يحب يعمل سيجارو لكن الضوابط ما تسمحش .ولوخر يسأل على المغرب وجب وإلّا لا .ويتدون ها الاجتماع في محضر جلسة ويصححوا عليه .ويوفى بالعصر ان الانسان لفي خسر واللهم صلي وسلم على سيدنا محمد .ويوقفوا ويتكرنوا ازواز ازواز وكل واحد عندوا تكمبينة وتكمبيصة ومطلب خاص يحب يوصلو لسي فلان .وهيّا بالسلامة بالسلامة
وثمّا جماعة اخرين حتى هوما منظمين لكن يبدوها بتحية نقابية وتفدليكة وضحكة .وعبارات يفهما البعض وما يفهمهاش البعض الاخر. الجماعة هاذهم حتى هوما يجيهم شربهم على حساب المنظمة .واحد اكسبراس ولوخر كابوسان وواحد فيلتر والسيجاروا مسموح بيه. فيهم الي يوڨف يصلّي العصر .وفيهم الي ما يصليش. وعادي حريات شخصية اش مدخلنا فيها. يسبوا المركزي والتنفيذي .ويتعاركوا الشق هذا مع هذا .وعادي تلقى الشطر هذا متعارك مع الشطر لوخر. والتخرتيل ديما موجود. اجتماعاتهم اخبار جهات وقطاعات. والعلاقة مع لحكومة والوزير هذا اقربلنا من هذاكا .وكيف لخرين اجتماعاتهم فيها محضر جلسة وتوفى بڨداش الوقت. وآش بينا بطينا ليوم . وان شاء الله في الاجتماع الجاي نشوفوا اش لازمنا نعملوا. وثما جماعة اخرين منظمين لكن ماعندهمش مراسلات عندهم ميساجات في الفيسبوك والتليفون. يتكرم بيها العرف على البقية. وبالطبيعة موش كل شيء يتڨال .السياسة موش متاحة للقواعد الكل .والواحد ديما يخلّي حويجة تحتو ما يعرفها كان هو. امّالة باش هو قيادي .الجماعة هاذم ديما متنرفزين. حادين في كلامهم .لكن ڨلوبهم باهية كلمة تهزهم وكلمة تجيبهم .كي يجي معاك راس آراس يرحّب بيك .وما تحسش انو مختلف عليك .اصلا هو موش عارفك تابع اشكون . يعطيك آية قرآنية ويختمها بكلمة قباحة .وثمّا جماعة اخرين حتى هوما منظمين. لكن ديما القايد هو إلّي مسيطر على البقية .تلڨاه يبخس فيهم وهوما ساكتين. وإلّي في الڨلب في الڨلب .الجماعة هاذم يتناولوا الاحداث كل يوم ويوموا .وديما عندهم الجديد .ويفكروا كان الڨدام .وحتى هاذم فيهم الي يصلّي وفيهم الي يربرب. وفيهم الي عندوا حساسية من فلان ولد حزبو وماهوش مستعد يحكي معاه .ويفوّض زميلو باش يحكي معاه. ويڨلوا اوخي نا غسلت ايدي منّو. برّا احكي معا انت. الجماعة هاذم يحكوا برشا بالسلّوم وكي يتعاركوا يڨلّوا السلّوم الي طلعت عليه انكسرو. وثمّا جماعة اخرين اجتماعاتهم في قهوة فلان. وكل واحد يخلّص قهوتو على حسابو .اجتماعاتهم من غير برنامج سابق .يبدوه بآش ڨال سي فلان. وملّا فازة دزها .وملاّ كعبة عطاهالهم لاتقرى ولا تكتب. ديما اخبارهم من الفيسبوك. وعندهم تواصل مباشر بقياداتهم .هدفهم يكونوا متواجدين ويحسبوا في انصارهم بعدد تعاليق وجامات الفيسبوك .وهوما الحق ناشطين وعندهم برشا شباب يحبوهم .لكن ماعندهمش برامج كبيرة. وهانهم القيادات يحاولوا ينظموهم. باتصالات بالتليفون ويقلّوا عود اكتب على الواتساب خير باش ما تخلّيش تراص .وثما جماعة اخرين حتّى هوما منظمين لكن ما تفهمهمش تابعين اشكون. يحكيلك على شكري بلعيد وعبير وسيف مخلوف والغنوشي والكلهم اصحابو. اصلا مايحبش يبان تابع اشكون .وهانو يميح مع لرياح وين تميح .الجماعة هاذم تنظيمهم معقّد وعند كان الكاتب العام. وخاصة امور لفلوس. لوكان مسؤولهم يعمل اكسيدون ويموت .تتفيّا الجماعة وتموت اسرارهم ...كل الي حكينا عليهم يشتركوا في حاجة هي ان اجتماعاتهم على عكس ما نظنوا .هوما يسبّوا ويلوموا على ارواحهم اكثر ما يسبوا ويلوموا على خصومهم .لكن كي يخرجوا لبرّا تلڨاهم .يشبهوا لبعضهم . ها الخدمة هذه راهي حشيشة .ويسمّوها نشاط في الشأن العام. وتسخير الذات في خدمة المجموعة .ويڨلك نعطي من وقتي وجهدي للبلاد. ومن اجل اولادنا واولاد أولادنا آما حتى نحنا آش مازال في أعمارنا ...