حليب الناقة 

فك علينا من السياسة والكورة والفن والغنا .ملّينا منهم وما ربحنا منهم كان وجيعة الرّاس. هيّا نحكوا في ما أهم .نحكوا على العلوم مثلا. انحب نحكي حكاية خاصة باش نعرفوا قيمة العلوم في حياتنا .العلم ثم العلم ثم العلم .كان عندي واحد صاحبي ربي يزيدوا .يربّي في البل .عندو تقريب عشرة لاف ناڨة وألفين جمل .والجمل في ها الوقت يعمل اربعة وخمسة ملاين. لاهي بيهم ويسرح ويعلف فيهم .وهانو وين اتكزعليه يخطف حاشي ويبيعو. يشدّو مصروف جمعة. ونا مرّة حسيت روحي فاشل. وديما دايخ .وكان عنّا مدّب يفهم في كل شي. يقرّي القرآن .ويداوي بدوايات عربي .وعندو برشا حاجات اخرين. يديه تجمّد الماء. وساعات نستحقوه يسعى معانا الزيتون .ويفصص اللّوز .ويعرف يذرّي الڨمح .حكيتلو حكاية الفشلة متاعي .عمللي كتاب وعطاني نفول. ڨالي خوذ الخرّوب من الڨصرين .وأكد عليّا ڨالي خروب الڨصرين تمشيش تستعمل خروب جبل هدّاج . ڨالي هرّس الخرّوب وصفّيه .وخلّطو بحليب الناڨة مع ڨطرة والا اثنين زيت زيتونة وكول منو قد ما تقدر.

عندي ولد عمي عندو سانك سون كات يمشي لماجل بلعباس. وصيتو وجابلي شكارة ونص خروب. بقيت نهارين نهرّس فيهم .وهزّيت قابيطاص ومشيت لصاحبي باش نجيب من عندو حليب الناڨة. فرح بيّا وتفاهمنا في السّوم. مديتلو خمسة وعشرين دينار. ڨالي لا والله شي .ما نوخذ كان عشرين برك. ومشى للناڨة وبدى يحلب فيها .وتصكّو الناڨة . وعنكم حق ما تعرفوش صكّة لبعير. مدتلو بخف جاباتو يسف في التراب. تفجعت عليه جريتلو .لڨيتوا مدهشر. ڨتلو لاباس قالي لاباس. ووڨف كمل حلب الناڨة .عطاني الحليب وروّحت .خلّطت الخرّوب والحليب والزيت وكليت منو .وباتت عليّا ليلة .صاطت عليّا زرصتي ليلة كاملة ونا نتڨلّب .وكي الفجر لاح هزّيت روحي ومشيت للدونتيست .كي دخلت للكابيني متاع الطبيب لڨيت صاحبي الي صكّاتو الناڨة فمو منفوخ ويستنى في الطبيب .وبحكم هو صاحبي دخلت معاه .شافلو الطبيب فمو لقى عندو اخت الناب طايحة .وزرصة مكسرة ڨالو تحب انرصصها والا انڨلعها . ڨالو ڨلّع يادكتور ڨلّع .زرّقلو الطبيب بالبنج .وهو مسلو الزرصة وهو ڨال آآآي. زاد عمللو زريقة اخرى .شي مانفعتش فيه . ڨالو الطبيب زعمة ماكش مدمن شراب .راهم الشرايبية ما يحوكش فيهم البنج. ڨالو اي يا دكتور نا بيدي تو بالعو. المهم ما ڨلعلو الزرصة كان بسيدي وسيدك. كملت نا رصصت زرصتي وروّحت . كليت هاك الخرّوب الكل وتو لاباس . ها المدة الي فاتت لڨيت صاحبي . ڨالي بعت البل الكل ومشيت للحج .وشريت جحشة هاني نتسوق عليها . ويبيع في اللاڨمي ميت وحي . ڨالي والله تجارة مربحة.ومن غير باتيندا . استدعاني لدارو.وروّحت معاه . لڨيتو عامل برميل لاڨمي وحال دبوزة ڨاز وحاط التيو في البرميل واللاڨمي يبكبك . صاحبي كريم . يجبد حلاب ويغرف ويمدلي ونا انسقعد .حسيت بالفشلة رجعتلي .وعادي بروحي غادي وتو هاني هنا في حي الورود .والله ما نعرف واحد والا ثنين والا ستة . معمولكم لربي نلڨاش عندكم خروب حتى متاع واد اللبن مايسالش .اكيد تسألوا على علاقة القصة هذه بالعلوم أوّل معلومة انك كي تربّي البل تولّي مركانتي. ثاني معلومة الزبراط ما يحوكش فيه البنج. ثالث معلومة الخروب وحليب الناڨة باهين للفشلة .ورابع معلومة تنجّم اتدبر الخروب من ماجل بلعباس .وخامس معلومة تنجم تلڨى الخروب في جبل هدّاج لكن قليل وربي يهديهم جماعة بوزيان ما استحفضوش على شجر الخروب في جبلهم .وسادس معلومة ان الزرصة كي يفوت فيها الفوت قلعها وارتاح. وسابع معلومة انك كي تكثرلها من الشراب تخرج من ملكك الكل وترصيلك عقاب عمرك تبيع فيه على ظهر بهيم .وثامن معلومة وإلي هي أهم حاجة انك بقيت ربع ساعة تقرى في ها لحكاية. يلزمنا نعرفوا ان معدل المطالعة في الوطن العربي لا يتجاوز نصف صفحة من كتاب سنويا .بينما المواطن الغربي يقرأ تقريبا 35 كتاب سنويا .والمواطن الإسرائيلي 40 كتاب سنويا وما نتصورش بها النسب هذه باش نوصلوا نولّوا من الدول المتقدمة ...

تعديل المقال