الرضّاية
...المرا ڨعدت في دار باباها .ڨالت هذا ربي ونا تحتو كان نرجعلو .راجل خرنان وخايب طبع. الام مع بنتها والبو يقنع فيها .في طولك في عرضك ارجع لدارك .ماهو إلّا مولى بيتك .شيء المرا شردت في لعناد . راجلها ڨعد جمعة من غير مرى .كلاه الشر. والذري كل يوم يسألوه على أمهم وعزفوا الخبز والحليب . مشى لعمّو وحكالوا لحكاية .عمّو رويحتو سهريات على ريحة الريحة يعمل سهرية .ڨالو كلّم الجماعة ونمشولها رضّاية .وكان الأمر كذلك .وكل مرّة يهدف واحد لدار بو لمرى. وركبت سهرية الرجال في بيت واسعة وعريضة. تاي اخضر ماشي وتاي احمر جاي .وكسكسي وڨازوز. ودوروها طريحات شكبّة على اطرف .النساء على السطحة ڨدّام الدار كيخ كيخ بالضحك .يفدلكو وينبروا .وتيب الضو مرّة يشعل ومرّة يطفى. وكي يطفى ينادوا الطفل ولدهم يحركو بأيد لمصلحة. الرجال مواضيع ربي الكل جبدوهم .من سوم النعجة .من بونوات العلف عند الشيخ .لفلان بيشو ماهم ڨالوا راڨد في السبيطار.عندو حجرات في كلاويه . عم الطفلة يحكيلهم على كيفاش فتفتولوا حجراتو بالاشعة. ويڨلهم والله يارجال كان نسمع في الماكينة تڨول تك تك تك . لحكايات الكل حكوهم .الاّ حكاية غضبت لمرا ماجبدوهاش. تڨول عليهم مستقصدين ما يحكوش عليها.
في ها الخوضة يدخل عڨربان اسود قد كف ليد في وسط النساء .وحتى هو من النساوين الكل يعطيها لسعة للمرى الغضبانة .ولسعت العڨربان موش ساهلة. بدت تتوحوح وتحط راسها على الحيط وتڨول ياربي ياربي مشوم عمري. شلطولها صبّوا على رجلها الجافال وعملولها ضميدة بالدڨفت .وفي عڨاب السهرية ذهّنت ورجعت فيها الرّوح. ولت تحكي مع النساء ودوبلاش تسمع صوتها . وتڨلهم نا موش غايضتني روحي .آما غايضني مولى بيتي باش انموت وانخليلو عيلة .وڨفوا الرجال وڨالو تو عڨّب الوقت. نمشوا انروحوا غدوة امبكرين نقضوا في مصالحنا .اوّل مرا وڨفت هي الغضبانة. حزمت ولدها على ظهرها وتبعت راجلها .وهي تضلع تڨول طاحلها ايمن عبد النور بتاكل بحذا الركنية . وراجلها يمشي ڨدامها .وساعة ساعة يحل لآمباتريك ويتلفتلها .ويڨلها هات الطفل انحملوا. وهي تڨلو لا لا مايسالس .انت كتفك يوجع فيك. وين يجي على فلّة ضلف يشد الضلفاية باش مرتو تتعدى وما يدڨهاش الشوك .وصلو للدار دخلت للبيت. لڨت ذريها راقدين في سابع نومة.مشت تفقدت كوجينتها وڨالت ياحنّي حنّي دار بلا مرا يصير فيها. وجبدت لمصلحة وبدت تفرّح.وراجلها يڨلها بربي شد بلاصتك وارڨد .ثورتي علينا الغبرة عڨاب الليل ...