عبّاس بعد ما ماتت شهيبة مرتو. حزن عليها برشا وڨعد مدة ما يحضرش للفروحات. ومصاتت عليه الحياة. لكن بعد مدّة بدا ينسى وطلعتلو في مخو وڨال نوخذ مرا تكفلني.
ولد عم عبّاس الصغير مشى لحانوت خالد وسألوه لولاد كيفاش باباك يحب يعرّس. ڨالهم والله صحيح بابا أمورتيساراتو طايبين آما والله مازال عندو تيراج موش عادي.
الطفلة اقترحت على باباها باش يوخذ ڨمرة بنت نويرة طفلة زوالية. ڨالها نا عبّاس سيد الرجّالة الي يكيّلوا بيّا في الثنايا نوخذ ڨمرة الفرمة اليابسة. الرڨّة والمضاوة كي مسمار ستة. لالا ڨمرة ما نتعاشرش ناوياها وما نتفاهموش. شوفولي تره زبيدة أخت الجماعة.. وبعثت بنت سي عباس ولدها لأم زبيدة وڨالتلها نهار لربعاء نتقابلوا في المستوصف. وتقابلوا وفاتحتها في الموضوع. ڨالتلها ام زبيدة والله آش باش نڨلك نروّح للطفلة ونشاورها ونهار الجمعة طل علينا نعلموك آش قررنا.
نهار الجمعة مشت بنت عباس لدار زبيدة لڨتها مادّة رجليها وتدهن فيهم بزيت الزيتونة وڨالتلها اوخيتي وين تبرد الدنيا رجلي تشڨڨ وما عادش انجّم نعفس على كواعبي. ڨالتلها بنت عباس خوذي رايي كي ترڨد نحي الطقشير وخلّي رجلك تتنفّس..وقعدوا يهروا مشوار وبعد قالتلها آزبيدة أوخيتي من غير ما نطوّلوها آش ڨلتي في الموضوع آش قولك في الّي ڨالتهولك داداك. مسحت زبيدة يديها في صباع رجلها وسربت رشفة تاي من البرّاد وضاڨت منها وغمّضت عيونها وڨالت حليلي مقواه. وردّت البقية للبراد. وجبدت سروالها وبدت تحك في ساقها وڨالتلها والله باباك ناس املاح وما عندي فيه ما نڨول. وتلفتت لداداها لڨتها تدفّى وتبربش في الرماد وتنفخ على الجمر الطافي. وڨالتلها آدادا هاني في ها لعمر ڨلتلكمش نهار نا نحب نوخذ وإلّا حاجتي براجل. ترا ڨول الحق عليك بالله. آما تو كي جا مكتوبي نا نڨلكم يكتبلي الدار والسانية باسمي ونوخذو. ڨالتلها بنت عباس اوخيتي الدّار نشمّوا عليها في ريحة المرحومة دادا. والسانية ما نعرفش على الشناتا خوايا ممكن ما يوافقوش.
ولد عباس الكبير يخدم في مرمة وساكن فيها. كي سمع بلحكاية ڨال بالحرام وبالحرام ويا بالحرام وهاو طار من راسي يمين. يا نسمع بيهم خطبولوا زبيدة وإلّا غيرها لا عدت نعفس هاك البر. ليه آش ناقصو بفلوسو بسانيتو بشياهو ببهيمو يحمد ربي ويشكرو. وبعد هاذا ودونو آش مازال في عمرو. صباعو أكثر من سنونو وهو يحب يعرّس؟ السّاعة ليه هو كمّل عرّس لأولادو هانا نندبوا على ايّامنا وما وصلناش وهو يحب يعرّس بزبيدة؟ وجبد التاليفون وكومبوزا نومري أختو. حب يطلبها ويعمللها عركة. جاوباتو التيليكوم رصيدكم غير كافي لاجراء هذه المكالمة. طيشو بجنبو وڨال نعّل ...أم ها التاليفونات آمس برك صبيتلو تيكي. ووڨف وعمل روحو متغشش وبدا يسب في الدين وطرّز لمخدّة جابها لاصقة في كوفراج العرصة.
ولد عمّو ڨاعد في تركينة متعارك معاه مايتكالموش على خاطر نهار الي جا دورو في التطييب طيبلهم مقرونة فل وهو يعرفو يوكل كان السباڨيتي. كي شافو شات المخدة ڨال أبّه أبّه أي آوّاه هاو ولّالنا رياض محرز في زمانو. الطفل هاج وماج وشدّوه صحابوا وڨالولوا ألعن ابليس وهيّا نهبطوا للقهوة نلعبوا طريحات رامي. ڨالهم ماعيني في لعب. ولد عمّو ڨال أحسن رتحنا بأنقص كراع. وصحابوا ڨالولوا لالا هيّا اهبط معانا وبدّل ها الساعة بساعة اخرى وشدّلنا حتى رشام.
قعدت الاجواء متكهربة والجو موش صافي وزبيدة تخمم في الموضوع وبعد بعثتلهم ڨالتلهم نا راني متنازلة على الدار يكتبلي كان السانية باسمي.
بنت عبّاس كي خبّرت باباها بشرط زبيدة اتكّى على جنبو ودز الكبوس لتالي وحك نواظرو وڨالها إيييه علاش لا تو نكتبلها السانية بإسمها. ما كتبتهاش لشهيبة الحمرة طويلة الرڨبة ومخرخطت لحزام خيالها أعلى من هاك الستيرنا تو نكتبها لزبيدة الحرشة لمكركبة كي كعبة العفصة..
صغير الحجلاوي