صغير الحجلاوي
سوبر فاستر العم بشير
..عم بشير قبل ما يشري الديماكس ميا وثلاثة وستين كانت عندو سوبر فاستر 96. كعبة هايلة. نظيفة طول. ڨال ايسيزي البركة. مستباخت بيها وطلّعت عليها عايلة. ديما مبرقشها. الكرسي سيمي كوير مارون والتابلو مغلّفو ببشكير وفوڨو كلب ابيض منكّت بلّكحل رڨبتو تتحرّك وفي كل ركزة يبدا راسو يردح. وراديو كاسات ديما يخرخش يسمع عليه القرآن والاخبار ومنوعات الصباح. وعم بشير فنان يحب العتيق فريد وعبد الوهاب وأم كلثوم وكارم محمود وطلال مداح وفيروز ووديع..وساعات يعمللها فصيّل الشيخ بورڨعة. راجل ذوّاق والفنانة صباح مسمّيها صباح لنثى وصباح فخري مسمّيه صباح الذكر..وعم بشير انسان رزين في الطريق مايفوتش التسعين وعلى ڨد ما ڨعدت عندو هاك ليسيزي لا عمرو عمل بيها آكسيدون مرّة وحدة وخّر على ميحاض عارم الحيط خلخلو. الباقي ديما ساترو ربي وڨال السرعة والجبانة متحاذين..
ڨعدت عندو هاك ليسيزي سنين وكي عرفها طابت وميكانيكها طاح وبدت تصرف باعها وشرى الديماكس ميا وثلاثة وستين وعم بشبر انسان نظيف ويحب النظيف..
حبيت نحكي على آخر أيّامات هاك ليسيزي وعلى آخر سفرة لعم بشير على كرهبة البركة كيما يڨول هو..
في العشية عمل عم بشير زوز كيسان تاي وصلّى العصر وهو قاصد ربي للسانية باش يعمل دورة ويتفقد الاحواض. سألاتو نجاة مرتو ماشيش غدوة للسوڨ؟ ڨالها كان كتب. ڨالتلو مالة تو نمشي معاك نطل على جليلة مرت عمّار ولد الفاهمة ڨالو طيّحت صغير. ڨالها وين طيحاتو. حطت نجاة يديها على فمها وڨالتلو يعطي عزا لبوشلال وين تو تطيحو. مسكينة ماعندهاش زهر المغبونة جابت فرطوطين وعندها سنين تحبل وتطيح ڨالوا عندها السخانة في أرحامها. ڨالها تي نا بيدي غدوة جالب بڨرة البرني خويا حتى هي المغدودة عندها السخانة في أرحامها وين تطرد تعشار وتطرح. مالة الفجر نلڨاك حاضرة. نجوا على دار البرني خويا نعبّوا البڨرة ونقصدوا ربي..
مع الفجر فاقت نجاة وصمتت حارة عظام عربي لراجلها وغلّتلو طاسة حليب فطورو. فاق عم بشير وبدا يكح كي العادة. عندو هواء في الرواري ملّي مازال صغير. توضى وصلى وفطر وخطف ليسيزي تسخن وفرّغ الصندرية من الدخان. يعرف نجاة مرتو تو تبدا تخرنن عليه وتڨلو ريحة الكرهبة دخان..
كي جو قاصدين ربي طلعت في مخ نجاة باش تركب في الكرّوصة. ڨالها راجلها اشبيك طلعتي غادي؟ ڨالتلو باش نخلّي بلاصة خوك. وعم بشير يعرف نجاة مرتو وخوه البرني ما يتقابلوش والكورون ما يتعدّاش بيناتهم. سكت عم بشير وركب بروميار وقصد ربي لدار خوه. خرج البرني من البيت وشعّل امبوبة الفيراندا. في سورية وقلصون للركبة ومحزمو مطلّعو لصدرو. تمتمت نجاة وڨالت ملّا منظر كي رحّاية الغلّة. تقصد كي الموليناكس. طل البرني على الكرّوصة لڨى نجاة متغمبزة ببشكيرها في الكوان والبرني نظرو على ڨدّو سأل بشير خوه وڨالو ليه جالب زايلة أخرى ليوم؟ تبسم عم بشير وڨالو لا لا سيدي البرني هذيكا بيتنا. تنحنحت نجاة وتلفتت لقريشة للغرب. ڨالها راجلها اهبطي خنعبي البڨرة وڨال لخوه برّا بدّل دبشك النهار عادك بيه طلع ما بقالناش وقت. ڨالوا البرني لالا نا منيش ماشي هاك انت تهنيني..
عبّو البڨرة وركبت نجاة بجنب راجلها. وشدّوا الثنية وفيتاس الفاستر مطيّش في حجر نجاة ووين يجي بشير يبدّل الفيتاس يكمشلها على جبّتها ونجاة تڨلو هاي راك ڨرصتني في سُرّتي. هو اصلا عم بشير إيدو غليضة وحرشة كي يجي يبدّل الفيتاس صبعو يوحل في الكرسي الّي بجنبو..وصلوا للسوڨ هبط نجاة ڨدام دار جليلة مرت عمار ولد الفاهمة وتعدّى للرحبة. والبڨرة الي يڨربلها تبدا ترعش وعم بشير خبرة في التجارة روّمها ومع التسعة دفّها بحق أرخة عُشرة ولكمت الصوارد وحطهم في جيب الفيستا من داخل وخرج من الرحبة وعمل دورة وعكلة في السوڨ وزعمة روّح. كي خرج من البلاد ووصل للعظمة تفكّر مرتو. ضرب فيها فران ساك. قريب تدخل فيه برلنقو من تالي معبّيا بالخبز. عمل دومي تور ورجع لدار عمّار كي وصل زمّر خرجتلو نجاة تشايع فيها جليلة ونجاة فيدها صاشي حشتهولها جليلة بالنعناع والفليّو. نجاة جابت لجليلة فرّوج دجاج عربي مذبوح ومريّش وحكّة دهان وكي دخلت للدار لڨت جليلة غارسة لفليّو في الجردة عجبتها ريحتو. أي عاد ودّتها جليلة بالفليّو باش ما تروّحش يديها فارغة..
في الثنية عم بشير يكسيلاري والكرهبة ما تجاوبش وزيد سخانتها طلعت وهو بيدو الكيلاص تاعب وزيد حتى الموتور ضعيف وفي صعدة الواد طلعت بروميار دبّة دبّة والشاكمون يدخن.. وصلوا للدار يمشوا عشرين . راكاها عم بشير تحت الصنوبراية وڨعدت مدة طويلة ما دارش فيها المفتاح. جاب ربي عامتها صابة الزيتون باهية وحتى السفنارية سومها مواتي وعم بشير ديما تحت راسو تفتوفة باهية ضكضك روحو ودار في احوالو وكلّم محرز ولد خوه البرني وڨالو شوفلي على كرهبة نظيفة الكرهبة الّي عندي عايّة وما عادش فيها جهد نحب نبدلها. وجمعتين من الزمان وراكت ديماكس بيضة ميا وثلاثة وستية ڨدام دار عم بشير ونجاة تزغرت وتمرغد فيها بالحنة..