صغير الحجلاوي
كلبة عارم الجزء الثاني
..كي سمع توفيق بكلبتهم عملت كارثة في الدوار لحڨها وطمّعها بالماكلة و شدّها وعاود ربطها. وبعد مدّة تسيبت. وهي تدور في أرض ربي الواسعة لڨت عم حميدة منحّي دبشو وجابد تيو من البورنة متاع الماء وعاڨدو في زيتونة ويدوّش في الخلاء. غفلاتو وهزتلو الدبشات وروّحت بيهم. وبعد ما كمّل عم حميدة دوشو تلفّت ما لڨاش دبشاتو. أرض وكانتلهم بلّاعة. ما عندو حتى حل كان يروّح ربّنا كما خلقتنا. لابس حاجة بسيطة ما عندهاش حتى معنى. وزيد كي تبلّت بالماء شربت ما بقى فيها ما يستر ڨدّام خلق ربي. وقرر باش يروّح ويشڨ السانية شڨان ويبعد على الثنية باش ما يشوفو حد..
الحاج حميدة مروّح وڨارن ركابيه ومقرطس روحو ويڨطر بالماء. ورغم انها ڨايلة لكن الراجل كبير وضرباتو النسمة والماء شاح عليه وبدا يتڨروح في عز الصيف. وهو في ثنيتو وتعرضو العايشة مرت الصادڨ كانت عند عارم أم توفيق خطيب بنتها نرجس. ما فهمت شي من عم حميدة. إنس وإلّا جان. خليقة وإلّا صنيعة. هي ڨعدت مبهّمة وعم حميدة جمد على بلاصتو والكلبة في أطرف الواد تنبح والدبشات بحذاها. وحتى من بهيم الهادي طلّع راسو من الواد وبدا ينحّڨ. وها فضحت لرمد. العايشة مشبّهة الراجل على عم حميدة لكن موش مقتنعة. وعم حميدة لحيتو تتحرّك وضلوعو كي أمشاط الزيتون. ڨالتلو منهو انت. هو تنحنح وهي وخّرت وشدّت حجرات في يديها. وڨالتلو والله تڨدّم خطوة إلّا ما ندمغك..وما صدقاتو كان ڨالها ها جنّات بنيتي راني عمّك حميدة مدّيلي هاك الدبشات يصلح رايك هانهم بحذا الكلبة. هربتلي بيهم ونا نتبرّد في السانية.
جابت جناّت الدبشات لعم حميدة. وشافهم الزاير البوهالي وفضحهم في كل بلاصة وڨالهم بعيني هذه إلّي يوكلها الدود والتراب كان ريت عم حميدة عريان في الواد وجنّات تلبّس فيه في دبشو. وعم حميدة حالف بليمين إلا ما يثوّر على الكلبة وحتى عبد الحكيم نغر على نسيبتو جنّات وتحلّف في الكلبة. وتوفيق ولد عارم كي سمع بكلبتهم عملت كارثة لحڨها وطمّعها بالماكلة وشدها وعاود ربطها..
بعد مدة زادت تسيّبت ولمّدت الكلاب في سانية حميدة والوقت أوسو و حميدة نصحوه باش يردم روحو في التراب السخون ڨالولوا ردمان أوسو باهي للبرد والمفاصل. خلاتو ما ردم روحو وجابتلو الكلاب. وڨايلة زرڨة على عم حميدة. التراب والسخانة وزيد الكلاب من فوڨ باش يهدهدوه وينحّولوا راسو. بدا ينادي في حليمة مرتو. يڨلّها آهي هاهاي آآآهي أرّاحيلي. وحليمة مڨيّلة في سابع نومة. والكلاب دارو بيه وهوما بيدهم ما فهموشوا لا إنس ولا جان. راس نابت من تحت الارض من غير فريسة. الكلاب الكل موڨفة وذانيها ويتفرجوا عليه وينبحوا. وعم حميدة مرّة ينادي حليمة ومرّة يشهّد ويقرا في قل هو الله أحد. وحتى الكلب متاعو مع الكلاب وما عرفوش. وبدا عم حميدة يتسحلل لكلبو ويڨلّو آهي راو بيناتنا ماء وملح. ڨربلو الكلب وبدا يشم فيه. ودار وهز رجلو وبال عليه وعم حميدة مستلبس وباش يموت من الخوف. والكلاب الكل بدت تشم في عم حميدة. وكلبة عارم عاجبها وضع عم حميدة إلّي حالف باش يثوّر عليها. ماشية جاية وتنبح فوڨ الطابية.. وهي بعدت والكلاب لحڨوها وتنفّس عم حميدة وحمد ربي على خلاص وحلو في ها الڨايلة الزرڨة..
بعد مدة كرش الكلبة كبرت وطلعت عشرة. والكلبة باهية ومتربية وطبيعتها موش خايبة وما تغدرش. حاجة وحدة ساعة ساعة تڨطع رباطها. ومن الصدف جاها الحس وهي مڨطعة الرباط . مشت للواد وخلّص ربي وحلها وجابت خمسة جريوات ڨد البونيا. وحفرتلهم حفرة تحت مثنانة وعشية كاملة وهي حاطتهم تحتها وتلحس فيهم..
السهرية قايمة في دار الهادي خو بشير وحميدة ويحلف ويتكتف مدام حل وقت المصيد والكرتوش موجود يا لوكان تعرضو كلبة توفيق ولد عارم إلّا ما يثوّر عليها. سهريّة مليحة يدڨوا في الناب ويڨصروا في الليل والرجال من موضوع لموضوع والحديث ذو شجون. كي وصلوا للمصيد شاختلهم باش يخرجوا يصطادوا الحجل في هاك الليل. والفكرة أنهم يجهروا الحجل بضو الآمباتريك ويغمّوه على بلاصتو. وهزوا معاهم بريميس يعاونهم. هكاكة صيادة ليل لا مڨرون ولا مكحلة راس مالهم العصي والهراوات وآمباتريكات وبريميس. خرجوا الجماعة شباب وشيّاب. وبالأمن والأمان يحيا هنا الانسان وتسعد الطفولة والشيب والشبيبة وتنعم الأمومة بأرضهم الحبيبة. ليلة هايلة والجو هادي. وصلو للواد إلّي في سانية بشير وكل مرة تطير حجلة من ڨدّامهم. والجماعة كل واحد شاد آمباتريك ومشبّرين في الدڨفت والمثنان والعلجان ويحبّوا يغمّوا الحجل على بلاصتو. وطارت حجلة بيناتهم ڨد الدجاجة وكي العادة عم حميدة بجبيبتو البيضة وكبّوسو لحمر وتلثيمتو ملهوثها على رڨبتو. الحجلة طايرة وڨربتلو ويتلاح عليها وتطفى الآمباتريك إلّي مشبرينها فيها. وڨعد عمّ حميدة يتلمّس يتبلحس فوق المثنانة. وڨالهم شدّيت الحجلة وهاي تحتي. ويڨولهم نخاف نوڨف تمنع علينا والله هاي حجلة ڨد الدجاجة باين فيها لحم صافي..وڨعد يتململ على المثنانة وبحرارة الروح لكمت الحجلة بمثنانتها في جبتو وهازها بحذا كرشو وڨالهم كي نخلطوا للدار تو نتحايل عليها ونجبدها من تحت الجبّة..
كمّلوا الجماعة دورتهم وما اصطادوا شي. الحجل الكل طار. أبركك يا عمّ حميدة طلع هو الصيّاد فيهم. موش مشكلة الفايدة في وسع البال. وروح حميدة يمشي ڨدّام الجماعة مشمّر جبتو وهو يهسلي تڨول هاز قوادة للمعتمد. وصلوا لدار الهادي وين السهرية ولڨوا النساوين مازالو مساهرين. سعديّة عندها طرف صوف تغزل فيهم. وعارم مادة رجليها وتطيب في التاي. والفاهمة متوسدة حكة السكر وتحكي على كنّتها..والحلڨة كبيرة والضحك والزهو والطرب لا تبدلو لا بشقاء ولا بتعب. وخلط عم حميدة هو لوّل ملكمت الحجلة في جبتو وحاطها على كرشو والجبّة مشمّرة والڨلصون أزرڨ حياصتو تلمع وهو شاڨ النساوين وشعاڨيبو كي أعواد الرمان. وڨعد وداروا بيه . وبدا يحل في الجبّة بالشوي بالشوي ودخّل ايدو للحجلة وڨالهم فيها على الأقل على الاقل زوز ثلاثة كيلو صافي وجبدها وحطها ڨدامهم. والناس الكل نساء ورجال محلّڨين بيه ويستنوا في مصيد عمهم. وطلعت جروة كلاب مازالت بوعماية حتى عيونها ماحلّتهاش. وعلى قول أم كلثوم يا فؤادي لا تسل أين الهوى كان صرحا من خيال فهوى. وتهنتل حميدة وتمرمد وعظامو بردت. والنساوين ضحكهم وصل لدار عمران ولد زعرة الواعرة. والرجال كل واحد لڨى سبّة وتصرّف التصرف إلّي يراه صالح. والناس الكل مازالت محلّڨة والجروة تزحف على كرشها وتكنزز بيناتهم. ورجع شاهد العقل للحاج حميدة وڨال يعطيها بعزا منين طلعتلي هذه. ڨالتلو عبير بنت الهادي أي عمّي. راني العشيّة سارحة بالشياه وريت كلبة خالتي عارم مجرّيا في الواد. والله ريتها خفت منها تقريب عندها خمسة. ڨالت عارم آآآه برّا برّا برّا عليها عندها نهارين ما روحتش ونا نڨول زعمة هاك المكلوبة وين ذِهبت..ڨالها الهادي مالة هذاكا هو وممكن كي غصرناها هربت وخلّفت جرو من جراها هاو الحاج ما قصّرش وروحلنا بيه. وحميدة ڨاعد على ركايبو وهازب على روحو وحليمة مرتو حطّت محرمتها على فمّها وبدت تنڨنڨ في راسها. وبشير بحكم التجربة وعندو خبرة في التخلّص من ها المواقف. ڨالو والله ياحاج الجروة هذه كان من قسمك. كاتبتلك رزق جاك من عند ربي وما تعرفش الخير وين . هز روّح بيها وربّيها كلبة الفاهمة راهي دامية ومليحة وانت تعرفها أكثر منّا الكل إن شاء الله بنتها تطلعلك كيفها..
ما طوالتش برشا السهرية بحكم حميدة تفرعس ومحاور التفكير والخطوط العريضة ضاعت عليه. حطولوا الجروة في شكارة وروّح بيها. وروّح الحاج يغلي على كلبة عارم. متغشش عليها حشماتو ڨدّام الناس. كي وصل للواد زعمة باش يخنڨها وحليمة مرتو ما خلّاتوش ڨالتلو بكمة ما عندها ما عملتلك حرام عليك آسيدي كي ما حاجتكش بيها لوّحها خلّي ترجع لأمها. وخذا عم حميدة راي مرتو ولوّح الجروة وتلفّتلها وڨالها والله لافهمت ها المكلوبة متاع عارم آشبيها معرّسة بيّا كي هي كي جراها..
