عبد المجيد ولد محبّلهادي

 صغير الحجلاوي

عبد المجيد ولد محبّلهادي

عبد المجيد ولد محبّلهادي كان جيني متاع قراية. سخطة متاع فيزيك وسيونص. وموش خايب في لونڨلي والفلسفة. قرايتو خذاها وفقة من الابتدائي حتى الجامعة ما راتا حتى عام. وما يڨدوا حتى في البيولوجي فيجيتال..

سيزيام وباك وتخرّج في كل مناسبة بوه محبلهادي يذبحلوا زوز شياه وبعملّو فرح. وأمّو سمونة ڨالت على مجيدة ولدي نرهن ذهباتي ونڨلّع عليه الحلفاء ويكبر ويتخرج ويوخذلي للاة النساء..

كي تخرّج عبد المجيد عمل كونكور في بانكة بريفي لكن الله غالب ڨالولوا تعيا تقبض وعملولوا لقطة لبلايلي. آكاهو مشى دبّر خدمة في شركة مختصة في الطاقة. عطوه بيرو وڨالولي أنت خبيرنا البيئي. وعمرهم ما استحقوه في حاجة تخص البيئة. غير القانون يفرض عليهم يكون عندهم خبير..وڨعد عبد المجيد مكنجل ثمنية شهور في الفريڨو. تحفّظ فيهم لعبة الليدو. وعمل ستاج في الفري فاير. وخطفتلو ودبّر خدمة في إدارة الفلاحة. وين العز كيما يڨول هو. وبحكم بونكتيال في خدمتو زادوا عملولوا فورماسيون في المدرسة القومية للادارة..

عبّمجيد عرّس بحياة. طفلة دبرتهالو أختو. حياة هذه خيّاطة ورثت زوز حوانيت في البلاد. وعاونها خوها يخدم في إيطاليا حلّت فيهم مرمّة. حلّتهم على بعضهم واحد تبيع فيه في البارفانات وخواتم الليرة فوبيجو وبراسليات وشوي ماكياج ومونيكير وليناتات كونتر صولاي وهدايا ودباديب. وواحد فيه كساوي عرايس وروب سواري تكري فيهم في مناسبات الأعراس والطهاير واليوم الوطني للصناعات التقليدية.. عبّمجيد قنوع. ڨال الكمال لله .صحيح حياة كبيرة شوي في السن والخلقة خلقة الرحمان. لكن تنكح المرأة لأربع. لمالها ولحسبها ولجمالها ولدينها فاظفر بذات الدين تربت يداك. وحياة لاباس بيها. ومن عايلة كبيرة والفايدة في الاخلاق موش في الزين. ورزقوا ربي بزوز وليدات وبنيّة. محمد أمين ومحمد حمزة وآية..

كاسح عبّمجيد في الخدمة. وما يعدّيش السوايع الزايدة وڨالهم حرام توخذوا فلوس على عمل غير منجز. وقيّد في لافاهاش وخذا نومري تراب. لو دو كوان سمح. بنا فيه دويرتو. وعمل فيه ڨاراج وكراه عطرية. وفلوس لكرى يخلّص بيها في ايتيد الذرّي. وڨالهم شطر الشهرية نعطي فيها لبروف الماط..

عبد المجيد راجل بخشمو حتى كي عطاتو الادراة كرهبة استعملها سبعة شهور وخلّاها في البارك. ما يحبّش ڨدّام الناس وخاصة ڨدّام انسابو يستعمل كرهبة الادارة. كرهبة الادارة ما يستحقها كان باش يجيب عليها شكارة سيمان وإلا كعبات كرلاج الباقي ما عندو مايعمل بيها. صحيح سي عبّمجيد دارو ما كملتش. والتواليت ناقصة البانو والفايونص. لكن بالشوي بالشوي تو يوصل. وزعمة جمّل بقيّة مرمّة التوالات. لكن الصوارد ظهرلو شري بيهم كرهبة لحياة. كلّم ولد عمّتو دبرلو فورد فياستا من عند معلّمة أصلها من عمدون وتسكن في العمران الاعلى. ڨال الذرّي كبروا وما نبقاش نهز فيهم ونرد. والفورد خدمت شهرين وموتورها بيّل وڨالولوا يلزمك تسڨمنها وخلّاها مطيشة عند الميكانيسيان حتى يشوفلها حل..

سي عبّمجيد كفاءة ما يفلّت حتى سيمينار. وديما عندو مداخلة يأكد فيها على ضرورة التكامل بين الصوناد والأوناص والفلاحة والسي بي جي. ويڨلّهم عندي قناعة انّو في نجاح إدارة التجهيز نجاح لإدارة الفلاحة والكونترار أي فري..

سي عبّمجيد بعد الثورة جاتو نفحة في السياسة. وعكس العباد الكل دخل في حزب موش معروف. وڨالهم موش حكاية خالف تعرف أما آفكار الحزب هذا تعجبني ويوجد في النهر ما لا يوجد في البحر. واقترحوا عليه اصحابو في الحزب باش يبعثوا السيفي متاعو للحكومة ويقدموه باش يشد معتمد. ما عجباتوش الفكرة. ڨال نا طمعت في كاتب عام للولاية "آلا ليميت ودون لو بير دي كا" معتمد أوّل. لكن معتمد ما تقابلنيش. مع خدمة لمرا وقراية الصغار نتفرعس..

بعد مدة طارت نفحة عبد المجيد من السياسة وڨال حسن حاجة الواحد يكون تيكنوقراط مابين اليمين واليسار وحسب تجربتي من تحزّب خان. وڨعد مكبّش في حكاية المعتمد ووين تواتي يڨول نا رفضت المعتمدية بقناعة. إيمانا مني أنو كل واحد ينجّم يخدم لبلاد من أي موقع كان.

سي عبّمجيد حتى الكورة ما عندوش فيها. ڨال الكورة حُرمت بعد الهرڨال وحسن فدّو وسامي التواتي وعلي بالناجي. وفي الفن ساعات يدندن مرض الهوا ڨتّالا. وفي التمثيل ڨال محمود ياسين أحسن ممثل عربي تحسّو راجل وواڨف موش كي ممثلين تو ببوش بومصّة..

عبّمجيد نهار السبت والأحد يعدّيهم متولهي بالجردة. عندو شجرتين خوخ وكرماية ومشماشة وشجرة عوينة. لاهي بيهم نهار كامل شاد التيو ويسڨي فيهم. وفي أمور الفلاحة ما يڨدّو حد وهذا اختصاصو .

عبّمجيد لبّاس.أنيق . الصبّاط ديما يلمع. والسروال قماش. والسورية بيضاء والكرافات حمراء. واللحية ديما مزلّڨها والشانابت رطبين يحففهم ويمشطهم بالمشط. وديما بعد الخدمة يتعدّى للقهوة يڨعد مع اصحابوا. عندهم طاولة خاصة بيهم. يلعبوا في الرامي بتفضيل الجوكارات. وعبّمجيد مستحيل يلعب معاهم. يڨلّهم شيختي في الفرجة. يهبّط شيشة ويجبد من الرامي دام ترافل ويبدا يمروح على الولعة. وموش ديما يلعبوا الرامي ما يلعبوه كان في الخريف والشتاء. وكي تسخن الدنيا يحطّلهم مولى القهوة طاولتهم في التارّاس ويڨعدوا يهرّوا. وأصحاب عبّمجيد .أستاذ فرنسية حاربها بليتيد ماكل الدنيا ومتصحّر بالاخرة حاط على التراب ويڨول للتلامذة المستقبل في اللغات وإلّي ما عندوش لغة ينسى المستقبل. ومحامي عندو طريقة سحرية في اقناع الراجل والمرا باش يطلقوا بالتراضي. وما تعرفش عليه وقتاش يكعبرهالك كي يتشمت فيك وتحرق ستوب تلقى روحك تبحث عالزطلة. وطبيب نساء حال كابيني وحدو وقليل وين يطيّح صغير ڨال شرعا الإجهاض حرام وهذا سقف ما ندخلش تحتو. كان للضرورة القصوى تحت حس مس وفي الامور هذه في حق خدمتو يذبح ذبحان. وعندو السر المهني كي صبلي نشرب. بويضات النساء ودواتهم الكل يعرفها ويعرف تواريخها. ومع ها الجميعة أصحاب عبد المجيد تاجر عندو كونكييري متخرّج تاريخ وجغرافيا من الجامعة ودورها تجارة وعندو سانية عامل فيها صنداج في البلاد ويربّي في السعي وديما مخلّي زوز براكيس على جنب. واحد لرئيس الاتحاد الصناعة والتجارة وواحد للوالي. وتكمل الحلقة برئيس مصلحة في التجهيز. صفقات المقاولين الكل تتعّدى عليه ويصحح فيها. وعندو زوز ديار كاريهم وڨال عملت قرض مباشر نا والمرا وباش نشروا طرف تراب في المعمورة. في كل صيف نعمل جمعة في نابل الحق باهية وهواها مواتيني.

حكاياتهم متنوعة عموميات أغلبها ڨرضة في خلق ربي. المحامي ما يفلّت شي البلاد الكل يعرفها والقانون الكل ليه والطبيب إختصاصو دوايات وسبيطارات وكنام والتاجر ڨطّارات وتيوات وجعب وبوشونات. ورئيس المصلحة مجالس جهوية وعركتهم مع التيليكوم ويجبد التليفون ويكلّم رئيس البلدية ويڨلّو آش عملتلنا في المنطقة الخضراء في حومة الزبراطة. وبربي ما تنسوش الدخلة لدار فلانة باش تكيصوها. والاستاذ ديما عندو عركة مع المفقد اصلا هو متكون اكثر منو وأولاد الاكابر الكل قرّاهم. وفيهم إلّي تو في كندا وأمريكيا وألمانيا ويخدموا حتى في الناسا. وعبّمجيد وليدها في الادارة وكل قطعة في البارك يعرف رقمها. وعندو فكرة على التلاقيح المجانية للغنم والمعيز وحتى الكلاب. ويعرف نسبة الملوحة في كل بلاصة من الولاية. وكان عندك شهادة ملكية في أرض فلاحية ينجّم يدبرك منحة دواء يڨتلوا بيه النجم. وعندو خيوط في الستاغ يدخلولك الضو في ضرف جمعة...

وعادة حكايات ها الاقطاب يختموها بالكرهبة إلّي تعدّت تو ڨدامنا تسوق فيها فلانة إلي تسكن في الحي الجديد ودارها على الثاني " وراجلها الحي يروّح" وبعد ما يوصفوها من ساسها لراسها يطرحوا سؤالهم المهم للغاية وما يجاوبوش عليه ويخلّوه كفتح آفاق للڨعدة الجاية. "البارح مع لحداش جتها كرهبة سي سانك بلارها فيمي زمرت عليها وهي خرجت ممكيجة زعمة كرهبت آشكون ووين قصدوا ربي؟"..

تعديل المقال