صغير الحجلاوي
عمران ولد زعرة الواعرة
عمران كمباص ووليدها وين تلفتو يدور. كان موظف عند الحاكم وخذا تقاعد مبكّر. شلواش في الاسواڨ وسمسار في الكراهب. حكيت عليه برشا مرات وعلى خوه المولدي..
عمران ولد زعرة الواعرة مربوع الڨد. بدونوا باهي والقطعة إلّي يلبسها تطلع عليه. وديما يحط باكو الدخان في جيبها ليسار بحذا ڨلبو. وكي تبدا السورية مايلة تعطيه وهرة على وهرة. شعرو خفيف وبدا يصلاع من جبهتو ووين يكبر وين يزيد يزيان أكثر. عندو ثلجة بين سنونو وكي يكون زاهي يصفرّ بيها ويخرّج في الهواء ويجبب لحن زي الهوى يا حبيبي وآه من الهواء يا حبيبي..
عمران تنجّم تعمّل عليه في الأفراح. يجيك على الصباح وأوّل واحد يذوڨ من الشمنكة. وحتى في الأحزان ديما يخلط لوّل معوّج كرومتو وريڨو شايح وشواربو بيض ويابسين ومذبل عينو ويمشي بالسّيف زعمة زعمة متأثر وتفجع من الخبر. سي عمران كي يڨعد مع الشباب ساعة ساعة يزلّط كلمة قباحة. وكي تسلّم عليه يخربشلك بصبع الاربعاء في كفك ويڨلك واحد بلاش يا ڨُهدي. وكي يوڨف مع الرجال الكبار يسألهم صلّيتوش العصر. عمران عندو القبول عند الجنس اللطيف. نسوانجي وفيسع ما يرتاحولوا. ممكن على خاطرو فدلاك وعندو شوي من صحة العين وعندو عادي كي يلوّح كلمة فيها شوي غزل ويدزها في في قالب ضحكة. وزيد هو الحق وين يقصدوه في قضيّة ما يخيّبهمش. وها الخاصيات إلّي تجمّعت في عمران خلّاتو في دوّارهم شخصية بارزة. يشبرش ومعڨبها على الكبير وعلى الصغير. هو حاذڨ ولسانو رطب مهف في التجارة ودبش بن ڨردان الكل جابو. على بعضو ملابس نساء ورجال داخلية وخارجية. الدوّار الكل كساه وأي واحد يعرف قياسو وكل مرا يعرف طايها. وحتى ليلى بنت جنات جابلها صياغة بلاكيور والخاتم جتها ضويڨة وما دخلتش صبعها.
سي عمران يذكرو بالخير ديما يدبر في راسو. وبمناسبة الشهر الفضيل ڨال نعمل ڨفزة للدزاير ونبدّل القلم والمرّة هذه نجيب مواد غذائية. فرصة مادام أوراق الكرهبة مازالو ما طاحوش وواد سوف ما بعدتش. صحيح هو طريق الجنوب أطول من طريق بوشبكة آما الديوانة أهش ومتسهّلين خير. وهو ما يردهاش لتالي..
زوز ملاين في الكوفر متاع الكرهبة مع الاواراق وكرني العلاج. ومليون في جيب السروال. وأربعة خماسين تحت كاج البرورتابل. خيرات من عند ربي والدزّة كاينة. المهم يزوّد من العصير والياغورت والكاكوية واللوز والشامية والتن والجبن. وها الحاجات هذه تخرج ويكثرعليها الطلب في رمضان. وكان مشت الأمور تو في آخر الشهر يرجع ويزوّد من السكر والفانيليا وسطل وإلّا ثنين شحور للحلو وكان نجّم يزرّف باكوات فارينة مع دبشات العيد.
الطريق سالكة والكرهبة تلض في الكيّاص. مركّح لبرة في التسعين ويتفرّج على الصحراء على اليمين وعلى اليسار. وبعد مافات الطالب العربي بمشوار ڨريب يغلط في رومبوان حاسي خليفة ستر ربي جا قاري ومتثقف ويفهم في البلايك وإلّا تطوال عليه الثنية ويضيع عليه الوقت. ومع الفجر سي عمران كان في واد سوف. الصرف باهي والقضية متوفرة. ما بطاش في بلاد الناس. يرحم والديهم عملوا معاه كان الباهي. وحتى في الرجوع ما تعطلش في البوابات. الطريق مسرّحة وكي وصل لحزوة سخانة الكرهبة طلعتلو وبدا يشم في ريحة الشّياط وعلى ما يبدو عندو مشكلة في الجوان كيلاص. حل الكبوط لڨى الماء يبكبك في الراديتاور. حل الدبوزة تبزّع عليه الماء يغلى وتحرڨت إيدو. تغشش عمران وڨال ديما عاكسة نجي نصلحها من شيرة تتخرملي من شيرة أخرى عرفتها من الصباح ملّي على الفجر قالتلي هاك المخلوقة جيبلي فيدك سكليزم وهاك القضية وماذابيها لونهم أكحل. حتى هو النهار طلعلي أعتر ومسوّد كي ها الدخان الطالع من الشاكمون. ولعن الشيطان الرجيم وزادها الماء وبدا يسايس في روحو ووين تطلع السخانة يهبط يزيدها الماء ويكمّل في طريقو..
دبّة دبّة وصل للبلاد والكرهبة معبيا بالتن وين تتلفت تلڨى ستيكة. عوّل وناوي الناس الكل يشيخها بالتن. كي ڨريب يوصل لحانوت خالد العطار هبط يتفقد في ماء الكرهبة. خلط عليه الزاير وڨالو أشبيك الكرهبة إلّي تكسبها تبدا تورد فيها أكثر من زيتونات أميمتك زعرة. ڨالّو الجوان شيّط. ڨالو الزاير كان تشوف جويلية وأوت عاطين عليهم في الاحوال الجويّة السنا تشوشيط صحيح. قالك البلاد باش يبقى يدور فيها كان الورل. ڨالو بربي فك على أمّي ها العشيّة ما ثمش ورل كيفك..وانت هاك بعكفتك وين كنت تطلفح آالزاير البوهالي. ڨالو كنت في الحانوت وبعثني عم حميدة ڨالي نسيت أُڨاحيتي تحت السدرة وين ڨعدت نستبل..
ركب الزاير مع عمران وخرج راسو من البلار. الكرهبة تجري وهو يكركر في لُڨاحية متاع عم حميدة على الارض ويتفرج فيها كيفاش عاملة خط في الثنية وهي كي المحراث تڨلب في التراب وهو شايخ عليها. يكركرها شوي ويجبدها ويمدها لعمران ويڨلو بربي مسّها شوفها كيفاش سخنت زعمة آما أسخن هي وإلّا جوان كرهبتك.. عمران روحو في خشمو والزاير على نيتو وصلوا لحانوت خالد هبط الزاير وعمران واصل في طريقو. دخل الزاير للحانوت وڨالهم يا رجال نبشركم عمران باش يحل مغازة متاع تن رمضان السنا إلّا ماضال التن بوه الكلب نفطره ونتسحروه نشربوه حتى مع التاي..
وصل عمران لدارو عرضاتو فضيلة وبدت تهبّط في التن وتشكيلو من ولدو زياد. ڨالتلو عمل فينا ليوم وتعارك هو بنتك ومشى للكورة وهي مشت سارحة بالشياه وڨعدت وحدي في الدار والليل ضرب عليّا..
زياد في الحقيقة ما مشاش يكوّر. ڨعد تحت سدرة حميدة يكحّل من بعيد يراش زهور بنت عم بشير. كيت التاليفون في وذنو ويسمع في ياطفلة ما تقصّي شعرك وما ديري لا ماش. وبعثلها ميساج وڨالها رمضانك مبروك زوزا. جاوباتو وڨالتلو مارسي شار فرار زياد فيليسيتاسيون كو ديو تو ڨارد. وزياد ما فهم منها حتى كعبة. تعدّي يكوّر مع الشبيبة..
لحڨ عمران بنتو زينب باش تروّح تعاون ماماها على الفطور لڨاها واڨفة تحت لوزة وتبرم في محزم جيبها وتهز فيه لفوڨ وتتفرج على ظلها كيفاش يبدا منظرها كي تبدا لابسة ميني جيب. وبعد ما ظهرلهاش هبّطت المحزم وتتفرج على روحها كي تبدا لابسة الماكسي. وربختها وحدها وحدها تحت اللوزة وبدت تشطح وتتخيل في النساء معجبين بيها وتڨول ملّا طفلة ولولاد يڨولوا ملّا كعبة. وبدت تزغرت وحدها وتڨول زغرتوا ها نساوين على زينوبة بنت فضيلة الحمرة تبارك الله عليها بنت سي عمران لنڨر..
تنحنح باباها وڨالها إييه بنيتي حتى نا نجي كان أنڨر. برّا روحي لأمك الحمرة وڨلها أعمليلنا شبعة بريك خنفش غُلّي على ما عملت فيّا الكرهبة اليوم. تفجعت زينوبة وعملت روحها تكسّر في أعواد حطب باش تروح بيهم لامها تطيب عليهم الكسرة وتسلهبت حاشمة وشدّت طريق الدار. وڨعد عمرا يصفّر بثلجة سنونو رميت الورد طفيت الشمع يا حبيبى والغنوة الحلوة ملاها الدمع ملاها الدمع يا حبيبى آآآآآآه رميت الورد طفيت الشمع يا حبيبي..
