صعير الحجلاوي
صنداج العم حميدة
عبد الجبار ولد حميدة يخدم في إيطاليا. صحيح ما نجحش في قرايتو ومستواه على ڨدّو. لكن ما ڨعدش يستنى ولڨف روحو على بكري. انستالا روحو في تورينو. بعد ما خدم عام ونص في كروتوني حوّل لتورينو ڨال الخدمة في الشمال أحسن صحيح الطقس خايب آما الخدمة خير وفيها مصوار. وليّد ثيقة وخدّام على روحو لا يعرف فساد ولا غبرة. من الدار للخدمة ومن الخدمة للدار. مغروم بالميلان وقال ملّي مشى علينا برلسكوني تعبت أمورنا. عام ونص في كروتوني وخمسة في تورينو والمرواحة كان في الصيف. علاقتو بأمو حليمة وباباه حميدة باهية وديما يڨول ما رضاء الله إلّا برضاء الوالدين. وفي كل مرواحة يكسي أمو وأخواه وحتى من غالية مرت خوه لمجد وبنتها نسرين يتفكرهم بكسوة سينيي. وموش مقصر مع لمجد خوه جابلو بلازما سمارت صافية دمعة وبيادجو يركب عليها كي يمشي لحانوت خالد. مستحفظ على روحو والفرنك الّي يطيح فيدو يكفّنو. دبر أربعة ميا وخمسين ميترو تراب في المدينة بلاصة باهية لو دوكوان يصلح حتى للتجارة. وبناء فيهم فيلا بعد ماعطلوه في الرخصة وڨالولو الطبة على الشياع ما فيهاش تيتر بلو انديفيديال. وقعد ماشي جاي على البلدية. وسهل ربي وتحصل على الرخصة بطريقتو ويسلّم ربي والمال والرجال. وصلت الفيلا للدالة نظف منها بيت وكوجينة وتوالات واقترح على أمو باش يحوّلولها. ڨالها علّقل ڨراب للسبيسيرية. وتو كل شهر نبعثلكم ميتين اورو ومع شيخوخة بابا تزّيكم مصروفكم وتكفّي. حليمة ڨالت لحميدة. وحميدة عمل عركة وڨالها نا نخلّي داري وسانيتي بعد ما عملت فيها البورنا متاع ماء الحاكم. ونمشي للمدينة ونخلّيها لولدك لمجد ومرتو غالية يردحوا فيها. لالا آسيدي ما نخليش الرّواح ولستيساع ونمشي للغط. برّا ڨلّو ما يسالش ابعث الميتين آما ما نحوّلوش. ودارك صكّرها بالكنتول قبل ما ترجع لطاليا خير ما الشناتة يعملوهالك مرڨد يسكروا فيه كل ليلة..
وكي اندادو عبد الجبار بدا يفكر باش يستحسن. وخمم في اخت غالية مرت خوه لمجد وكي شاور امو بدت تتململ وڨالتلو هاك تشوف في غالية صعيبة وطبيعتها كاسحة كي أمّها. والعين الي شربنا منها موش لازم نعاودوا. كي عرفها ماهياش شاهية وما رضاء الله الا برضاء الوالدين نحّى موضوع اخت غالية من مخو وكمل بقية العطلة وين يجي متعدي على على بنات بشير ولد فجرة بالكيا سبورتاج يهبط البلار ومنين كان يسمع في ريان يوسف وعلى الحولي ياما وعلى الحولي داخت صبوا عليها المي ياما. يبدل ويولّي يسمع في إروس رامازوتي. وحتى بثينة بنت بشير موش خايبة آما سكورها طالع شوي. تقرا آس في تي في الجامعة وتجبّد شعرها وتطوّل ظوافرها وما عندهاش مشكل مع الماكياج وربي يسهّل في كل ماهو صعيب..
رجع عبد الجبار لطاليا وما يڨعد كان مع صاحبو الدزيري من واد سوف. ديما يحكيلو على الفلاحة وڨالو مشروع باهي وانتم عندكم برشا ارض برا اعمل فيها صنداج يجيبلك الذهب. وعبد الجبار يحب المصلحة وعجباتو الفكرة. كلّم خوه وڨالو بربي تنجمش تعرفلي سانيتنا ڨداش فيها من هكتار نحب نطلّع صنداج بالرخصة. لمجد سأل أمو وأمو سألت حميدة. وعم حميدة عمل ثورة. ڨالها ليه ماو لاباس يسألوا على رزڨي. يحبوا يرثوني قبل منام عيني. وبرّا وهيّا وما فهم عم حميدة الموضوع كان بعد جمعتين وعطاهم حجة السانية باش يشوفوها. مغلفها بمشمّع وحاطها في صطوش ملكمتو بطبة في وسط فليجة موڨفها في الڨلص. كلم لمجد خوه وڨالو بالضبط بالضبط الحجة هاي ڨدامي السانية مساحتها ثمنية هكتار وستة آر وخمسة وعشرين صنتيار..
وتكفل لمجد برخصة البير. وبرّا وأرّاح كيما ڨال تليلي الڨفصي. واكتب على ظهر الحوت ولوح في البحر. والرخصة حبالها طوالت. تغشش عبد الجبار وكلم خوه وقالو الاجراءات باش تطوّل باش يعملولي كيما عملوا في رخصة البني. نقصّولها قصة عربي ونحفروه في النوار. وبدا يبعث في الفلوس للمجد ولمجد يجبد الماندا ويعطيها لباباه على داير مليم والماكانجي يحفر في الصنداج. وشهيّر من الزمان والماء بدا يبزّم. ونسرين تعمل في لايف بتلفون ماماها. وبيرم ولد ربح ومعاذ ولد زكية يجوا ڨدامها ويطلعوا لساناتهم وبيرم يوڨّف صبعو الوسطاني فيبالو عفسة باهية متحفظها من الذرّي وما فيبالوش بيها قباحة. وعبد الجبار من ايطاليا يتبع في اللايف ويعمللهم في قلب احمر ويبوس فيهم...
دبروا الترنمبة والضو ضعيف وموش باش يخدمهم. جاهم ولد جنات قاري تيكنسيان سيباريور وڨالهم بموتور متاع تراكتور نمشيهولكم وما نجحتش الفكرة. دبروا ڨروب اوكازيون نص لباس عدّوا بيهم أرواحهم في انتظار يروّح عبد الجبار في الصيف ويركّب الطاقة الشمسية يعاون بيها الڨروب..والناس تسأل زعمة عم حميدة يبيعش ماء. وحميدة ماص الليڨة وما مضوّي حد وڨالهم الحل والربط بيد الطفل كي يروح نتفاهموا. وعبد الجبار عمل انفيتاسيون على فايسبوكو لبثينة بنت عم بشير وبثينة طفّت الضو وڨعدت نهارين وقبلاتو. زاد لوّج عليها على انستغرامها وكي لڨاها ما عرفش آش يعمل. رجع للفيسبوك يعمللها في الجامات..وساعت ينوتيفييها ويڨلها ڨراتسي..
الناس الكل تستنى في عبد الجبار وقتاش يروح ووين يكلموه يڨلهم الحي في آخر لوليو أول آڨوستو نكون غادي. وفعلا أول نهار في أوت حل ركب جبورة وقبل ما يروح للبلاد تعدّى لواحد من معارف صاحبو الدزيري كرالو كرهبة في النوار. كرهبة صغيرة تيوتا ياريس حط فيها دبشو وروّح. ووين يجي متعدي على دار عم بشير منين كان يسمع في وعلى الحولي ياما يبدل إروس رامازوتي..
خذا راحتو عبد الجبار السفرة كانت طويلة وزيد برشا سخانة في البلاد والشهيلي ينڨنڨ ولمباتة لبرّا والهواء تبدل عليه. بدا يكح وامو كل صباح تحطلو مغرفة عسل في الحليب المغلّي. وحتى الدجاجات زرڨطون ليهم كركوا ما يبيضوش وعبد الجبار يحب العظام العربي..
بعد ثلاثة ايام تأقلم عبد الجبار مع المناخ وتفاهم مع تيكنيسيان الطاقة الشمسية وڨالو نخلصك في النص قبل التركيب والنص الثاني بعد ما نجربوا.. وكان الامر كذلك. واقرص على البطنة يطنب الماء. وحميدة عامل حلڨة رجال للظل ويحلف ويتكتّف ويڨلهم حلاوة ها الماء ما ذقتها كان في الحج في جغمة ماء زمزم وهوما يڨولولوا ياحاج رزڨق الحلال وكي تعرّق عليه ثمرتو طيبة. وهو ويڨلهم الحمد لله خلطت على ها النهار في عڨاب عمري نڨبت لرض طلعت الماء. والغداء مقرونة والصوص بلحم البرشني. والزاير يدمّق المغرفة وراء أختها ويڨلهم محمضو كي لحم القنفود. وقالهم تصدقوا يا رجال وعلى ها المجبد البارح ماي الدنيا سخونة نتمشى للرّواح لڨيت ڨنفود ڨد ها الڨصعة. وتلفت لعم حميدة وڨالو هاي خالتي حليمة موّصيتني على العظام من عند دادا تو بعداش نجيبهولك فيدي..
روّح الزاير وقال لامو ڨالتلك حليمة مرت حميدة اعطيني كعبات عظام فطور ولدها. حطتلو ستة حيار في كردونة وفرشتهم بالتبن وزاد عليهم الزاير الڨنفود وهزهم لحليمة ومدهملها وڨالها هاذم عظماتك ومعاهم ڨنفود عم حميدة. حليمة حملت الكردونة والڨنود تحرّك لوحت الكردونة على الزاير وڨالتلو نعمبوك وبو بوك آش جبتلي ها مڨعرة. ڨالها عضماتك الي وصيتيني عليهم وڨنفود لعم حميدة. بركت حليمة الوجه أصفر والعرڨ يشرشر دارو بيها الرجال ڨالتلهم ابعدوا غادي ما نحبش نوقف نادولي وحدة من البنات توڨفني وڨوللها جيب البشكير فيدك..
حليمة باركة الجبة تحتها مبلولة والعظمات تكسروا والڨنفود يطلّع في راسو من الكردونة. والجابية ڨريب تتعبى وعبد الجبار على التيوتا خرّار مرّار. كلاسط وسبادري وشورط فوڨ الركبة والسورية قمراية رڨبتها مهلّعة ولينات بالخيط ماشي تدلّى على صدرو وراجع يحطها فوڨ الجبهة وكي يتعدّى على دار بشير يكلاكسوني ومنين كان يسمع في وعلى الحولي يبدل رامازوتي..
