صغير الحجلاوي
أم الجلود
نحب نحكي على أم الجلود. إي أم الجلود. نحنا راو قبل ما نتلنصوا الخفاش نسمّوه أم الجلود كيما الجرانة نڨولولها أم ڨراڨر. عاد هاك السنين في كل صيف في ڨطرانة نسرح بالغلم وبحكم عنّا شجر الزيتون واللوز مازال صغير بابا يعمل عراصات للشياه. والعراص هو طرف حبل يشبه للشكيمة. يربطوه في راس النعجة ورجليها من ڨدام باش ما تهزش راسها وتوكل الشجر. وبابا في امور الفلاحة منظم طول. يلزم في كل المغرب كي نجوا مروّحين بالرسلة نسيبوا العراص من رجلين النعجة ونربطوهولها في رڨبتها باش النعجة تبات مرتاحة. وقتها عنا رسلة تقريب اربعين نعجة وكبش والا زوز. يعني بعد السروح ترصيلنا خدمة اخرى..
مع المغرب كي نجوا مروحين من السانية ندخّلوا الشياه للواد باش النعجة ما تبداش هاربة علينا ونسلكوها من العراص. الدنيا صيف ومع المغرب تكثر ام الجلود وشديت كعبة. لڨيتها في الواد مدهشرة. شديتها وروحت بيها. راسها كي الفار وجنحيها مجلدين. وڨلت لبابا اذبحهالي. ڨالي لوّح ها المصيبة ام الجلود راهي ما تتاكلش عافنة وريحتها زافرة. ونا بحكم اول مرة نصطاد حاجة من غير منداف كبشت وڨتلو لا الا ما تذبحهالي . تغشش بابا وفكهالي وطيشها للڨطوط. عديتها ليلة ونا نغرّد وزعمة غضبت على العشاء. حنت عليّا دادا وڨالتلي تعشى تووراس وليدي غدوة إلّا ما نعطيك دجاجة من الدجاجات. كلكلتها في مخي لقيت تعويضات دادا موش خايبة وتردلي الاعتبار. تعشيت ورڨدت ومع الفجر بديت نفيق فيها وڨلتلها وريلي دجاجتي. فاقت دادة وعطتني عتوڨة..
بعد مدة سهل ربي على هاك العتوڨة وفتّحت . بيضت عظمة كي عظمة الحمام هي صحيح تعبت شوي كي جاها الحس آما سلكتها ولادة طبيعية لا عملية ولا بنج. وكبرت هاك العتوڨة وزادت كركت وطلّعت دحي فلاليس ماتوا الكل. ڨعد منهم كان فلوس واحد والدجاجة هذيكة بإسمي وحتى الفلوس متاعي كبر وولّى فروج على كيف كيفو. الحاصل وليت مركانتي متاع دجاج أقوى من جماعة فطناسة. الفروج يطلع فوڨ كوم التبن ويبدا يعوعش ونا نصلي على النبي. فروج يتبختر في وسط الدجاجات ومشرفني في وسط العايلة..
واتت مرة جونا ضياف. آكاهو ومن الدجاجات الكل بابا ما عجبوا كان فروجي. ذبحوا وطيبوا عليه الكسكسي وبات بابا يلعب في الروندة مع الجماعة بعد ما كلالي رزڨي. ونا قررت باش بابا ماتتعدالوش ها العملة بالساهل. هذه جريمة في حقي وما تسقطش بالتقادم. عملت مراجعة لعلاقتي مع بابا ومنين كنت نڨلو الله يعينك والا صباح الخير بالصوت وليت نڨولهالو بتمهميهة وبصوت موش واضح. فسدت علاقتي مع بابا ودخلت معاه في حرب باردة وكسر عظام. الظلم موش باهي على الاقل يلزمو يعتذرلي. وبابا ما ابداش استعداد ورغبة في الاعتذار. ڨعدت نهارين والا ثلاثة ومشيتلو لقيتو بفتل في يباولي ودادا تطيب في التاي بجنبو. ڨتلو ياخا انت ما تسألس وتڨولش اشبيه متكدر؟ ڨالي ليه اشبيك اش مكدرك ماك لاباس. ڨتلو لا لاباس وزعمة خليتو ومشيت. ڨالي أرّاح جاي وين ماشي. ڨتلو ما عادش نحب حتى واحد يكلمني والا يناديني والا يسميني باسمي هاني نبهت عليكم راكم ما تلوموا كان ارواحكم . تلفت بابا لدادا وڨالها اشبيه ها الطفل؟ ڨالتلو نهار كامل يبكي وڨال ذبحتولي فروجي . ڨالها ليه منين جاه الفروج ليه هو عندو دجاج من اصلو. ڨالتلو ماو ولد هاك الدجاجة الي عطيتهالو منين شد ام الجلود. ڨالها آما ام جلود علينا. بابا نسى الحكاية ذكراتو بيها دادا. ناداني وڨالي داداك عطاتك دجاجة نا تو نعطيك بركوسة. وفعلا بابا وخر وڨدّم وعطاني نعجة حايل. ووين تطرد هاك النعجة تجيب توامة ونحنا مسمّينها النعجة الحايل. واولادها ما ريت منهم حتى علوش. وبديت نفيق انو بابا ڨاعد يبيض في اموالي ونا موش فايق ثما تسريبات مالية غير قانونية قاعدة تصير ودارنا فيها جنة ضريبية وهذا مخالف للقوانين. وعرفت ها النعجة ما فيهاش مصوار ويلزمني حاجة جديدة تخلق الثروة. يعني بدائل اقتصادية تحققلي ارباح خير من نعجة انتاجها موش مضمون واقتصادها هش. وواتت وقتها عنا بهيمة ولدت وجابت جحش حاشاكم. كمبصت وخممت ومشيت لبابا وقتلو اش رايك نبدلك النعجة بالجحش. وافق بابا على المقترح. وڨعد هاك الجحش عنا عامين. نهار فقت الصباح لڨيت بابا جلبو لسوڨ الزول في بوزيد وتقريب باعبو بستين ألف وشرالي سبيدري وخذا حزام وبنطوف لدادا وروّح بعد كسّر الصوارد في حاجات ماهياش من أوكد حاجياتي منجل ومحشّة ومعلف للشياه. طبعا المال السائب يعلم السرقة. ومن ثروة حيوانية معتبرة خرجت بسبيادري نلبسوا ونڨلهم اي حاجة تحبوا عليها أبدوا عدوا نجيبهالكم في اقل من عشرة..
عاد باش ما ننساش هاك الجحش ولد في فترة مزمرة طول. في سنوات الجفاف متاع الثمانينات. وقتها الناس جاعت وولت توكل في الڨمح قريو. والڨمح ڨريو هذا فيه كسرة كي باتانات البرلنڨو حجر اصل. مرة نوكل في الكسرة وبحذايا هاك الجحش مديتلو فترومة. بدا يمضغ فيها سنتو تكسرت وڨعد نهارين حنكو منفوخ..
