صغير الحجلاوي
كلبة عارم الجزء الأول
توفيق ولد عارم دبّر جرو كلاب عربي. جابها للدّار وعمللها رباط ڨريب للڨريشة. وها الكلبة طلعت باهية ودامية حرست الڨريشة والدار. وديما تنبّهم على اللّي ماشي وعلى الّلي جاي. هي الحق عارم أم توفيق كارمتها ديما تعطيها غسالة الماعون وفضلة الكسكسي. مرّة بشمتلهم وڨعدت نهارين عازفة الماكلة. هي كليبة علّكيف. تنبح وتعوّڨ وماتخلّي حد يڨرب للدار. تخدم في خدمتها بضمير. لا تشكي ولا تبكي. عايشة بقدرها وما تخلّي حد يظلمها. وحتى كي تڨطّع رباطها ما توكلش الدجاج كي الكلاب لخرى. كلبة صبورة ساعات يتلوالها رباطها على الشجرة ويفوتها الظل وترصّيلها مڨيّلة للشمس. وكي تسمع كلاب الجيران ينبحوا تنبح من غير حسابات وإلاّ تخديم مخ. الحاصل كلبة عمرها كامل عدّاتو تحت كالاتوسة. والباهي فيها ما تحبّش القوادة كانت كي تشوف البغلة هربت توڨف وتسكّر عين وتحل عين وتعمل روحها تتثاوب وترجع ترڨد..
نهار تسيبت وڨعدت تدور في السواني ڨيلت عليها الڨايلة رڨدت تحت الصفة بجنب حانوت خالد العطّار. وجا المولدي ولد زعرة الواعرة وڨعد بجنب الحيط يستنى في الجماعة على طرح ديمينو. المولدي راجل خدّام وزيد تشارك مع محرز ولد عم البرني في تراكتور والوقت عڨاب ربيع والعام باهي وختمو أفريل الشتوال بمطرة تخرّج الشجر من سخانة الصيف. وسي المولدي كاثرة عليه الخدمة. يحرث في السواني ووين يلڨى فضوة يوسّع بالو في الحانوت مع الجماعة. المولدي من تعب التراكتور خذاتو عينو تحت الحيط ونعس ودخللو جربوع تحت السروال. كي حس المولدي بالرطابة والبرود في مناطق حساسة من بدنو تفجع وفيبالو حنش ودخل فيها عربي وسوري. دخل في مطمور الارانب طيّح شطرو وڨتل أرنبين ولوص وزاد تعدّى للسدرة حل فيها طريق وكسّر الصفة وعفس على الكلبة ڨريب يقسملها مسلانها. هي الحق كلبة متربية وماتحبّش العيب وتقدّر وتحترم. ما ڨالتلو حتى شي. كلمة ما زادتها دحاتو لربي وبدّلت البلاصة..وڨعدت تدور في السواني..لكن يمين البكّوش في صدرو. قعدت تعس عليه تراقب فيه من بعيد لبعيد. وما يعجبك في الزمان كان طولو..
سمعت زفيف التراكتور في سانية عم حميدة. حلفت بيمين إلا ما ترجعلو الفازة. بعد إلّي عفسّلها على مسلانها ڨريب تهرب فقرة من سلسول ظهرها وترصيلها تعدّي عمرها ترغي بمسلانها وتمشي عوجة. جاتو لسانية حميدة ورڨدتلو تحت لوزة. وڨعدت تخمم آش تعمل..ومع ماضي ساعة سكّت المولدي التراكتور وهبط باش يصلّي الظهر ويتغدى. ودار عم حميدة دار كبيرة وغداهم ديما فاوح. وبعد ما صلى ردسها بكسكسي الڨمح وعرقْوب دجاج هند طولو قْد المنجل. وزاد شرب كاس تاي واستنهى الشمس. والمولدي التراكتور سللو جنابو وطيحلو اكتافو تدزو يطيح بالتعب. أتكى وبدا يغيّم وخذاتو عينو وبدا يشخر. يجبد فيه خميري والكلبة تراقب فيه من بعيد. جاتو وڨعمزت بحذاه. ما فهماتوش منين قْاعد يضيّع في الهواء. زعمة وڨفت وذانيها باش تبدا تنبح. بعد ما ظهرلهاش بقت تتفرج فيه وهو كل مرة يبدل النغمة. كي طوّل بدت تلحسلو في جبهتو حل عيونو لڨى الكلبة مكهّبة عليه. تكونسى. والكلبة ما بتش تبعد من ڨدام وجهو. مطلعة لسانها وتلهث والمولدي من ربي يخاف من الكلاب. النفس لا. خرطت عليه الكلبة واستخبزاتو. دخّلت راسها تحت جنبو وبدت تربش وتجبد في عظم العرڨوب من التراب. والمولدي مستلبس ويستنى في اشكون يجي يهز الصحن باش يخلصو من ها الورطة..وبعد ما جبدت العظم هداها ربي وطلعت الطابية وهبطت تجري. والمولدي ڨعد يخُل خلاّن. لعن ابليس والكلاب منين هبّت ودبّت. ووڨف وعمل فيها خطين عندكش عندي وتم مروّح. عرضو حميدة ڨالو آشبيك قصّيت على الحرث ڨالو والله ياعم حميدة الترمبة ڨاعدة تضيعلي في الزيت..
مشت الكلبة على روحها هي الحق كانت ناوية ترجع لبلاصتها لدار عارم ام توفيق هي شڨت الثنية وما تقصد شي وعلى نيتها لڨت الفاهمة وحليمة وجنات راكبين على كريطة وماشين لانتصار مرت حسين ولد بشير ولدت وجابت وليد سموه محمد حازم. تفجع البهيم كي خرجتلو الكلبة من الفلّة برطع بيهم . والفاهمة ما نجمتش تشد روحها طاحت ورقْدت على عين قْفاها. وڨعدت نهارين وهي تشكي بالوجيعة. مشت لدار ولدها عمّار وهزها للطبيب وعملولها سكانار. ستر ربي العظم طلع لاباس وعندها كان ترضريض عطوها حرابش وبوماضة تدهن بيها وقْالولها ماذبيك ما تتحركش خليها ترتاح جمعة والا ثنين تو تبرا..
