صغير الحجلاوي
الڨمح ڨريّو
إييييه يا حسرة على ڨمح أمريكيا وهاك ليّامات. نعقل عليهم كيف تو. نا ساعتها نقرا في المدرسة. كانوا سنوات خايبين خلاص كيف ها السنين هاذم. في الهم نڨردوا. دخلت البلاد في ازمة سياسية بحكم بورڨيبة سايي عليه مريض وما عادش ينجم يحكم وزيد الجفاف كمل على مرمتنا. كان العجاج يعجج والثنايا الكل تعبت بالرملة. غيّازي سافي على اليمين وعلى اليسار. آشنهي سنوات طيّارة أصل. جو كبير. متنا بالشر ما لڨينا ما نوكلوا. الشجر الكل يبس والضلف اصفر لايث والسعي مات بالشر. والنبي محمد كان جو أصل. كي تلبس سروال أخضر الشياه يهجموا عليك فيبالهم بصلة. الحاصل جعنا. وأُبياتنا فالسين يڨدوا. كنت نمشي نا وبابا على لفايض نجيبوا شكاير البشنة للغلم والڨمح ڨريو باش نوكلوه نحنا. بيني وبينكم تقريب علف الشياه اضخم من غدانا. كيما نڨولوا جونا كي الزبل حاشاكم مزمرة على قاعدة صحيحة. وزيد نا نقرا في المدرسة ماشي راجع. ندڨها تقريب اربعة كيلوماتر ماشي واربعة كيلوماتر جاي وعلى هاك التغذية الباهية عاد. الوجبة الرئيسية كسرة الڨريو. أوه على أمي ووه. كحلة وحرشة مبرّجة تبريج. نحطها فوڨ حجرة ونفتفتها بالاردوازة ونبدا نمضغ. ونا نقصد ربي باش نبلعها وهي ما تباش تتعدى. نزيد نعاود نمضغ. سنون الحليب الكل بدلتهم بفضل القمح ڨريو. ما كمل العام كان حناكي عملو ميسكل من كثرة السبور. جو يهبّل رومنسي شاعري. لا مطر ولا والو كان العجاج والصلاة على النبي. النسمة وحلق الواد والكرم غزلانك البيضاء على الشطوط تعوم. كيف تو بالضبط .ناس في عالم وناس في عالم. وزيد بورقيبة كل ليلة يركب فينا على أصباعو. الوزير الاول رشيد صفر مزيان وأبيض يللش وشعراتو رطبين. وحكومتو تبارك الله عليها ما فهمتش فاش قاعدة تعمل وقتها. ما تسمع كان بورقيبة هاو استقبل هاو حكى معاهم هاو صافحهم بحرارة. ووين تتلفت تلقى سخطة متاع سياسة من صلاح الدين بالي لسعاد اليعقوبي لمحمد الصياح لزكريا بن مصطفى. ونا تخلطوا عليا الوزرة مع جورات الترجي. وماعادش نفرق مابين حسن فدو ومنصور السخيري. وشاخت علينا فتحية عدالة خنشة تضرب بالساعة وهي تقدم في لخبار. وحتى جمال بوراوي يذكرو بلخير ما قصّرش معانا ووقف معانا في النشرة الجوية. وشي والله المطر لا صبّت ڨطرة. الحاصل بلاد يابسة حطبة. تشعل فيها عرف وڨيد تقدح. شبعت كان بالتاي. الحاجة الوحيدة المتوفرة وقتها. نهار كامل ونا نمص في البراد. يفيقوني الفجر يڨولولي برّا أقرا. قراية آشنهي. تي بربي هذا جو متاع قرايا. نلعن ابليس بعد ما نسب عيليتنا الكل ونفيق ونمشي نمشط شعري بڨرداش ونتعدّى للحاجير عندي بوط نسخنو على العافية وندخل فيه رجلي. يا ولادي حاجة من ورا العقل أصل. دفى من رجلي من لوطي وزيد يعطوني فطوري نلقاهم مغليلي نحاسة حليب غبرة ويعطوني كسرة سخونة مخلطة ڨمح ڨريو وڨمح بيدي زعمة زعمة فطور الصباح مضخم ونبدا نغرف بالقمصان ونشرب في الماء لبيض ونزيد ندفى من فوق كي نوقف نسمع مصاريني تتڨلفع. والغداء عاد معروف ڨريو صافي لا قمح تونسي لا عمّار بالزّور. هاك الكسرة ضيعتني على قرايتي نهار كامل ونا نمضغ ضيّعت عام من حياتي ونا نمضغ . وزيد حتى بابا ما هوش فاهمني وماهوحاس بيّا. جاتو نفحة في الربط. ديما بالة على كتفو ووين يتلفت بعمل ربطة. وساعات بعد ما يكملها ما يظهرلوش يعاود يهردمها. الحاصل حتى بابا دخل في حالة ارتباك وولّى يلعب في الكور الطويلة مع دادا. وساعة ساعة يتغشش عليها وتغضب عليه وما تطيبلوش التاي وترصيلي نا من غير تاي معاه. ونبدا نضرب في البهيمة وهي تنكّص. الوجوه كالحة يابسة كي ها الوقت أزين وحدة في الدنيا هي فتحية عدالة خنشة. وحتى رشيد صفر تبارك الله عليه لكن ما فهمتش فاش قاعد يعمل. مهمتو كان يجيبلنا في الڨمح ڨريو ويتقابل مع بورقيبة على انغام الراشيدية . واش كثرت الشعب والقوّادة يابو ڨلب تي نا ساعتها هاني صغير ونقرا في المدرسة ونعرف تقريب ثمنية بخلاف إلّي يعرفهم بابا. مسؤولين كبار متاع ڨريو. وبشنة. واعانات. وصبابيط حمر ونعالهم اصفر. ومنح وبونوات علفة.. الحاصل إلّي يڨل هك يولّي مسؤول. وزيد حتى بورقيبة ماهوش مأيّس ساعة ساعة يبعثلنا كرهبة متاع التنظيم العايلي. تتعارك معاهم دادا وتڨلهم ماعادش نجيب صغار. جبت اثناش واصغر واحد فيهم هانو راجل ڨد الجمل. ونطلعلهم من الحجير نمص في البراد . تي الحاصل سنوات إعانات أمريكا ووقتها امريكا عاملة عركة مع الاتحاد السوفياتي وطلعآش ڨاعدة تبربش في الڨمرة. وتفكرتنا وانت افهم وحدك..
