صغير حجلاوي
توفيق الملسوع
عارم مرا هجّالة. ولدها توفيق عندو شوياّ فلاحة وساعات يعمل ضربات مرمّة يحسّن بيهم وضعو المادي. ويحصل مصروفو ومصروف دخانو قال فلوس الدخان ما ندخّلهاش في مربح الشياه. آه كل حاجة في بلاصتها ومسطّرة بالستيلو والورقة. هو ولد نبه حاذق ديما يوخذ راي أمو غير ساعات يطليس ويتصطك وما عادش يفرّق مابين أمو عارم وخالتو سعدية..
الخريف خرّف وبدت الدنيا كل عشيّة مسحّبة. وعارم ناشرة شكارتين بصل روس فوق نادت ولدها وقالتلو ها توفيق وليدي. عندك تره أطلع لمّد هاك البصلات وهبطهم لا تصب عليهم النو ويترنّخو. وتوفيق كي تبدا زاهيتلو في النوار يولّي المثل الاعلى متاعو ما رضاء الله إلّا برضاء الوالدين وكي تعكسو يقلك في الدنيا هذه ما ينفعوك كان زوز جيبك وذراعك وابعد على دمّك لايشوهك
هز معاه ڨفّة وطلع فوڨ الدار باش يهبّط البصلات على مراحل. عبّى الڨفة وهو هابط تشدت هركتو في الدرجة الثانية من فوق من الصرفة. شطرو من لوطى تعرّى وحب يرجع درجتين. والڨفّة على كتفو رزانت عليه. وإيد شاد بيها الڨفة ولخرى شاد بيها الصرّافة لا يطيح. بداّ ينادي في أمّو ويڨلها يادادا آدادا أڨعد غادي ما تجيش. توّا هاني مازلت نلمّد في البصل. تي هاو شطرهم طلع خامر. وفيه حتى إلّي نبّت. وڨعد يحاول باش يسلّك روحو وشي طاحت الڨفة من إيدو. سمعت عارم الترديفة وكذّبت روحها. وعجل خالو الصادڨ متعدّي يبرطع ومڨطّع الرباط . والصادڨ يحاوز فيه شاف ولد أختو متعنكش في الصرّافة . والهركة وصلت لمسلانو . وشطرو عريان. وتحتو منشر بصل مبزّع. ما فهم شيء. جا يجري ركبتو ثڨلت. وبدا يعيّط على أختو عارم. ويڨلّها يا عارم آعارم أوخيتي عندك ولدك تقريب شنڨ روحو. وجت خالتي عارم وبدت تندب وتڨول حليلي على ولدي حياتو مشت سلاطة وتخلّطت مع البصل. و توفيق من الحشمة كبّش في الصرّافة. يبس عليها وعمل روحو لاعبة عليه الدوخة وڨلبو سخف من الشر . أمّو وخالو ما لڨو كيفاش يهبّطوه. زرزح بيه الصادق الصرّافة تزرزيح مع الحيط. وكي وصلت الأرض بدوا يتفڨدوا في توفيق. لڨوه شالعو مسمارفي ركبتو ليمين والجرح وصل حتى لفخذو. الصادق ڨال لأختو الطّفل لدغاتو والله ما يعفينا هايشة كبيرة. وعارم تندب وتوفيق سلّم أمرو لربّي وقبل بالامر الواقع. كبسولوا فخذو وشلطولوا ركبتو. ودخّلوه يدفدف للدار..
عارم حنينة والام قلبها على ولدها. ولسعة الخريف مخطرة وما دواها كان الجفال والدڨفت ومنين تو تجيبلو الدڨفت والوقت مغرب وتوفيق درجين ويموت. وتفكرت حكة الثوم حاطتها في الخزنة ومصكرتها بالمفتاح والمفتاح معلّڨاتو في حزامها. جبدتها وبدت تغرف بصبعها وتدهن في فخذ ولدها. وشعل توفيق وبولو بدا يڨطر. وبدا يعيّط وخالو الصادڨ مكتفو ويڨلّو أصبر يا أبن الكلب عظ على ڨلبك هذكا السم ڨاعد يحوّس منين يخرج.
استسلم توفيق وكلّم الصادڨ العايشة مرتو وڨالّها أعلف الشياه وارّاح لدار عارم اختي توفيق ولد لسعاتو هايشة غليظة. وركبت سهريّة في دار عارم. سردوك الدجاج نحّوا منّو الكبدة والڨلب وڨلوهم في الزيت. وكلاهم سي توفيق مسّوسين من غير ملح. وعارم حاطّة ركبة ولدها في حجرها. مرّة تكمدها بدبوزة الماء البارد. ومرّة بكاس التاي السخون. وتوفيق منعوا عليه حتى شربان الماء. غلّولوا الفيجل والشّيح وحطوهولوا في دبوزة وهو يڨول عطشت وهوما يسربولو كاس. يشرب ويڨولهم آحليلي زيدوه نفّة سكر راو مر حدج كرشوا غروطت. الثوم من لوطى والفيجل من فوڨ عطوا مفعولهم. ودزّ عليه العرڨ. ڨالّهم تكّوني على جنبي لوخر راني طبت ومفاصلي ترخفو ونحس في نواظري ينفضو..
نرجس بنت الصادڨ متسمّيا خطيبة لتوفيق هي إلّي طيبت العشاء. بنيّة تعمل الكيف. تظفر شعرها على جنب. شعرها شطر مظفور وشطر مجبّد. ولابسة جبّة ومدخلتها تحت الجيب. الجيب لابساتو كيما يلبسوا الرجال الفوطة في الحمّام. ليلة كاملة وهي متغششة على رمزي خوها وتڨلّو نقّصوا من الحسّ تحدثوا بالشوي الرجال يسمعوا فيكم وتوفيق راسو يوجع فيه.
الفاهمة عمّة توفيق عندها مشكلة مع الناس الكل. ما تحب حد وحد مايحبها . ما تڨعد كان في فم الباب. تعس على الماشي والجاي. وديما عكس الناس ڨالتلهم راني نشرب كان التاي لخضر. وماتقروليش حسابي في اللّحم. وحتى الملسوع ما تعطوشو اللّحم ماهوش باهي ليه. سمعها توفيق ڨال اللهم صل وسلم على سيدنا محمد. هاي باش تبيتنا بلاش عشاء.. ڨحّزت بحذى توفيق و ڨعدت بجنبو وڨالتلهم أبعدوا عليه. وأنتوما كي دايرين بيه والدنيا غاطّة والعرڨ هاو يشرشر على بدنو ودخّلت إيديها بين أكتافو. وتوفيق ما يطيڨش بدا يتمحمس واطرشق بالضحك وڨالها آعمتي راك اتختخ فيّا. ونرجس ضحكت والفاهمة تلفتتلها ونفخت شفايفها ودلوحت راسها. وڨالت يعطي عزا لبوشلال بناويت مسيبات ما عندهمش حكيم يكشخوا والرجال تسمع. ولوّحت الشلاكة على أيمن ولد بشير وڨالتلو آطفل أبعد من الباب خلّي نشوفوا وجه ربّي.
الجماعة سهريّة كاملة يحكوا على العڨارب والحناش والكلّهم شادين ڨارد وموسوسين على الحثلة توڨف الناس الكل. وفيهم حتى إلّي يڨطّع وأوّلهم الملسوع. مرّتين يلڨوه فوڨ كرّوسة ديماكس بشير.
سي توفيق رصتلو جمعة كاملة تڨول عليه في السيلون. يوكل في المسّوس حرّمت عليه أمّو كل شي. وين يتحرّك تڨلّو أركح موش باهية ليك الحركة. عدّى أسبوع ربطيتو وحلف يا لبصل لا عاد يدخل للدار اللهم عروش . وكانك على داداه هاني عندها الثوم في السّكريّة والسّكرية في الخزنة والخزنة مصكرتها بالمفتاح والمفتاح معلّڨاتو في حزامها ..
