صغير الحجلاوي
طربوشة الحاج حميدة
مرّة عم حميدة هبط للسّوڨ ودبّرلها طربوشة نايك يلبسها فوڨ الكبوس يغطي بيها راسو. ڨال الشتاء يدخل ونا وذانيا تبدا تفزفز. طربوشة هايلة حتى كي يرڨد في الليل يرڨد بيها. حتى في الوضوء دوبلاش يمسح ڨبّاعتو ويجبد الطربوشة ويشدها من حواشيها ويدخل فيها راسو للخّر. واالشعار وين جا جا. مرة في جبهتو ومرة متكّيه على جنب ومرة في ڨفاه. هي الحق فاكّة عليه الشيء إلّي خلّاه يستغنى على الكبّوس فرد المرة. ڨال الكبوس والطربوشة والتلثيمة وزيد ساعات نلبس القشابية وإلا البرنوص يثقْلوا على راسي وتوجعني كرومتي وزيد رطابة الطربوشة ما كيفهاش مواتياتو بلڨيدا..
عم حميدة صاحب مصلحة وما يحبش الفساد. ديما يُحرك. مع العشية هو يدور في السانية يلڨى حويلة مسڨطة وحفنة الزيتون وبهاك الحسبة. ثنى ركبتو تحت الزيتونة وبدا يلڨط في الكعبات الطايحين. جمّل قدر نصف الربوعي. زعمة كدسهم في خط الحرث وبعد ما ظهرلوش لمدهم في الطربوشة والعم حميدة ديما السباولي والموس في جيبو وما يفارڨوشو كبس الخزويطة وحطها في الثنية. وتو كي يجي واحد من لولاد يروّح بيها. كعبات زيتون يعملوا ستة وستين كيف وكان تحب حليمة تعملهم أمّالح. الدنيا مغرب والحثر على الثنية قليل. وما يهزّها حد. وهي أصلا الثنية تشڨ سانية عم حميدة وتوصّل كان لدارو ..وروّح حميدة وهو كي غير وصل للدار وخلط عليه محرز ولد البرني بالبارتنار وڨالو جيت نهزكم انت وخالتي حليمة الليلة عاملين عشاء. ماو بابا هبط اسمو في الحج ..صلي عم حميدة المغرب. ومحرز ڨعد يفلفس في راديون البارتنار وحل الكبّوط وبدا يتفقّد في زيت الموتور. وحليمة لبست ملحفتها وبدّلت حزامه وعطت عشاء الكلبة. وركبوا ومشوا يسهروا في دار البرني..
الوقت مابين المغرب والعشاء والسميطري ينفخ والجماعة في الحانوت يسمعوا في الزاير يعيّط ويبكي في سانية عم حميدة. فوزي وكمال وحسين وخالد العطار ورحيّم المعلم وزياد ولد عمران إلّي يسمع يسڨد يجري خلطوا للزاير لڨوه بارك في الحرث ويتخبّط وڨالهم عم حميدة راسو مڨصوص وملوّح في الثنية. شعّل فوزي الطورش متاع التليفون لڨوا كركوبة مِعستها بارتنار محرز. والزيت غلّطهم ومحرز ربثهم وهوما مازالو يثبتوا وزياد معدّي كونكور في الحماية ويستنى في النتيجة ونوامر أعوان الحاكم الكل يعرفها. قال معرفتك في الرجال كنوز. يكومبوزي نومري مركز الحرس وطلبهم وڨالهم إجرولنا صارت جريمة شنيعة في دوّارنا. الحاج حميدة دغروه خلّوا الراس وهزوا البقية. ودريجين من الزمان وكرهبة الحاكم جت تونون وزياد يورّيلهم في الثنية. كي وصلوا للصرّة شيّع العون إلّي يسوق في الكرهبة الضو في الثنية وهبطو ثلاثة أعوان. وقرب عون للصرّة وطرّزها بالبرودكان وتفيّا منها الزيتون. والطربوشة تنطّرت جت معلّڨة في الشجرة. وجماعة الحرس زعمة تغششوا على زياد آما كي لڨوا الجماعة وجوها ملخلخة وخاصة الزاير امرمد بالتراب ووجهو أزرڨ حتى هوما كان منهم العقل ومنين كانوا متغششين بدلوا الساعة بساعة أخرى ولعنوا إبليس وركبوا في كرهبتهم وقصدوا ربي. جا الزاير قدّامهم وڨالهم شايعوني معاكم ركبتي ثڨلت والله عڨِلت ولا عدت ننجم نبدل الخطوة. ركبوه معاهم وهو يقرا في قل أعوذ برب الفلق ومكبّش في شبكة الباڨا. هبّطوه في مفرڨ الثنايا ولڨى الشباب مربّخينها كي العادة يتكيفوا في السواڨر وفيصل عندو صويّت كي العادة محفّلها . أنا بسأل النجوم كل ليلة عليك وبكتب كل يوم غنوة شوء بتناديك ويبدّل اللحن على ولد الخالة يلّارة على ولد الخالة. نهار إلّي جا كب عليّا وبكى وڨالّي بعدي واش جرا وڨلتلّو ظلم الرجّالة يلّارا. ومراد ولد عم بشير يڨلّهم أسمعوا فيصل كي يتشقنص ويڨول الرجّيلة ويڨلّوا لالا ها فيصل راهي رجّالة على وزن البالة والصڨالة والنخّآلة وفيصل يقلّو محسوب فقت بيها كان انت ياحثالة. وتوفيق ولد عارم يتكسّل ويقلّهم أسمعوا أسمعوا كيفاش نطرشق مسلاني ..
الزاير أعطيه الزهو والطرب نسى حكاية الحاج حميدة ودخل في المجموعة. وبدا يلوي ويڨلهم هاو الرّك هاو الرّك هاو الرّك والله كنت عاكش وتو نحس في رجلي دار فيها الدم. وعدّوا فصيّل العادة وروّحوا لديارهم وبعد بنهار لڨى عم حميدة جُرّة كرهبة الحاكم في السانية وداخلتلو في الحرث. هبط للحانوت ولڨاها حكاية أسمع يا لي ما سمعتش طربوشة الحاج باش تبقى تاريخ. ڨالهم الراس ما يقصّو كان ربي ما غاضتني كان طربوشتي الخضرا عفستها كرهبة ولد البرني وراسي ڨعد عريان..
وما طوّلش عم حميدة في أوّل سوڨ دبّر كابيش من الفريب مكتوب عليه آي لاف يو إيفري مورنينڨ ومصوّر فيه ثلاثة أصباع مكتوب عليهم خمسة ميا وستة. كي يلبسو يكبسلو طربوشتو بخيط الخزمة يجي كي سارح الببّوش..