صغير الحجلاوي
بات يدادي
جاب ربي عندهم نعجة والد تعشّو اللّبا. وإلّا لايزّي الصمّاحي لايزّي الماكلة الثاعشة. الشنتي والشنتية باتوا يغزغزوا في الڨلية. وأمهم جبدت طرف دڨيڨ من الضبية. وركّبت على البرمة في الحاجير. بعد ماسوت المناصب. وطيبت عيش. وزاداتو طرف مريسة. وحطّوه في المثرد. وتقابلوا عليه من غير غناجي. الراجل يوكل ويطمطّڨ. والمريّة دوبلاش هزّت على روس أصباعها. ڨالت عندها الجاير. وحتى الشايب صرّتو صاتت عليه وتعّباتو مصاطّتو. وحدات العيش ردحوا فيهم الذرّي. والراجل جبد الكعكة وحطها تحتو. وجبد ڨزيطة النفة وعمّر راسو. الطفل والطفلة تعاڨبوا وتلفّتوا للحيط ورڨدوا. طاسة الماء محطوطة في الغُرّة. وتحت الغُرة وبجنب الڨلّة حاطين صطوفة يطيّبوا عليها الماكلة في وقت الڨرّة.
المرا بعد مارڨدت تفكرت أعراف لوڨيد فوڨ لغرارة. تحت الڨرداش. جاين تحت الڨطرة. يمشوش يتبلّوا. وترصيلها الصباح تڨدح بالصوان وصوف الشيح. والراجل تفكّر إنّو ما بدّلش لمرد من الستيرنا للمحراث. مشى ڨلب البردعة. وجبد الغانجو. ووحللّو في الصدرة. خلّص الحبل وبدّلو للمحراث. ولهوثو على الساهلة. وعلّڨهم في الڨرّاص. وغطّاهم بالزدل. وهو راجع يكركر في طرباڨتو المصنوعة بالسنّغ. وفي ثنيتو بدّل الموثڨ متاع الزايلة. وتفڨّدلها الرباط. وبدّل الرسوة بالخرتة. ماظهرلوش ولّا عڨدها حرّاثي. وزاد عمل طلّة على الڨريشة. والنعجة الغشوة تضلع عندها بوصوفة. سكّر لڨريشة بجولڨ الزرب. وثڨّلو بالمنڨلة. وجا تحت الصفة ونقص الماء. وكي وصل لباب المعمورة دفل واتڨرع وتنحنح . ودخل للمعمورة يعفّس.
شد بلاصتو. ويديه بكلّها وذح. وتغطّى بالحلاس ورڨد. ومرتوا في ڨلبها تڨول أرڨد مرڨد كي بات يدادي. بڨلة وخبطة ومثبت يمكنو في صفاڨو..