صغير الحجلاوي
تراكتور المولدي
هاك العام عم البرني إجتمع بأولادو وڨالهم نحب نقسملكم الارض قبل منام عيني وكل واحد يوخذ بايو وما نتمد في ڨبري كان متهنّي عليكم وعلى أمّكم. ولمّد ميعاد وعمل عشاء. وڨال القسمة ما تكون كان على شرع ربي وكيما وصانا سيدي النبي. وها الامور هذه ما يفهم فيها كان عم حميدة مدّب العرش ومفتيهم. راجل كبير وحاج لبيت ربي وصدرو معبي بالقرآن ويعرف للذكر مثل حظ الانثيين وديما يفسر للعباد آش معناها أبغض الحلال عند الله الطلاق وفاهم مليح تفسير الطلاق مرتان فإمساك بمعروف أو تسريح بإحسان. وعم حميدة ناس املاح ومخو محلول ويعرف كار العباد ويشاوروه حتى على علوش الضحية ويكتب للعباد بكلام ربي وعندو قلم ضربة ضربة للعين والنفس وللبڨرة كي تغرز قبل وقتها وإلا النعجة كي ما ترومش ولدها. هو لا محالة ساعات يبدا يزلّط آما كيما يڨول هو. سبحانو من لا يسهى العلم راهو يطرشڨ الراس.الحاصل بعد الميعاد أولاد عم البرني وبناتو مشوا متراضين وكل واحد تولهى في بايو من الارض. وبقوا يدخلوا خيط في مخيط إلّا ما يشاوروا باباهم وعم البرني ديما يوصّي فيهم ويڨلهم أعطوا حق ربي قبل ما تذوڨوا الثمرة وتدخل لكروشكم إلّي يوكل حق ربي مصارينو تتعڨد ويموت بالريح المعكوس..
محرز الولد الكبير لعم البرني موظف يضرب يصرع. شهريتو مسمار في حيط. وحتى مرتو جميلة موش مقصّرة تخدم في معمل البسكوي وكي تروّح تصنع الغريبة وتبيعها. ومحرز كان ماخذ دارعلى السنيت وكي خلص قرضو تحسنت أمورو وزيد واتاه عام زيتون صابة والسوم باهي. زعمة تو يبدل البرلنڨو وجميلة ڨالتلو خوذلنا سانبول ما نبقوش في كل مناسبة مدخلنا في الكابينا كي نهبطو منها تڨول هابطين من كوم تبن. لكن محرز ضرب أخماسو في أسداسو وحسبها ولقى مشروع ماخير. تشارك في تراكتور هو والمولدي ولد زعرة الواعرة. والمولدي هو إلّي باش يخدم عليه. والمولدي صاحب مصلحة ويعطي جنبو للخدمة وفي وقت الحرث يخدم من الضّي للضّي. في البداية كان غفّاص في الحرث وعندو مشكلة مع الترمبة وساعة ساعدة يڨلّع لوزة وإلّا يهردم طابية آما مبعّد استصين وولّى خطّو مسوي ويڨول الراجل إلّي ما يعرفش يحرث كي المرا إلّي ما تعرفش تعلك الكسرة. خسارة فيهم باش يعمروا دار..
المدب حميدة حكينا عليه ها ليّامات وڨلنا جمع زيتوناتو وزبرهملو عبد الحكيم الله يصلح رايو. ولمّدولو لولاد الصريع وحتى هوما الله يصلح رايهم. كلّم المولدي باش يحرثلو السانية. وعم حميدة خيرو سابڨ والمولدي يبجّلو على الجماعة الكل..
بعد بنهار كان المولدي في الموعد يحرث في السانية مع ماضي ساعة جابولوا الغداء. هبط من التراكتور وشاف الوقت. مالة كل حاجة في بلاصتها هو ديما يڨول مادام العجل ماهمش يدوروا الوقت يلزم يوقف. ڨعد المولدي وتلفت للڨبلة وتيمم ومسح على صباطو وبدا يصلي في الظهر. وبعد ما سلّم ردسها بالكسكسي الڨمح وعرقْوب دجاج هند طولو قْد المنجل. وبعد ما تغدّى شرب كاس تاي واستنهى الشمي وخذاتو عينو وعمل تعسيلة تحت الصفّة. وبدا يشخر. يجبد فيه شخير ماصط طول بخخخخ أوخ أوخ أوخ.. سمعاتو كلبة عارم جت بحذاه وڨعمزت. ما فهماتوش منين قْاعد يضيّع في الهواء. زعمة بدت تنبح. بعد ما ظهرلهاش بقت تتفرج فيه هو يبدل النغمة وهي توڨف وذانيها. كي طوّل بدت تلحسلو في جبهتو حل عيونو لڨى الكلبة مكهّبة عليه. تكونسى. والكلبة ما بتش تبعد من ڨدام وجهو. مطلعة لسانها وتلهث والمولدي من ربي يخاف من الكلاب. النفس لا. خرطت عليه الكلبة واستخبزاتو دخّلت راسها تحتو وبدت تخترش. تجبد في العظم من التراب والمولدي مستلبس ويستنى في اشكون يجي يهز الصحن باش يخلصو من ها الورطة..وهداها ربي الكلبة وحدها وحّدها طلعت الطابية وهبطت تجري. والمولدي ڨعد يخُل خلاّن. لعن ابليس والكلاب ووڨف عمل فيها خطين عندكش عندي وتم مروّح. عرضو حميدة ڨالو آشبيك قصّيت على الحرث ڨالو والله ياعم حميدة الترمبة ڨاعدة تضيع في الزيت هاني كلّمت الطفل منير خو الزّاير يفهم في الميكانيك تو يشوفهالي وغدوة نرجعلك. هي بيدها السانية ماعاد فيها حاجة سويعة وربع وسويعة ونص كان طارت وتتحرث وربي يرحمنا بمطرة..وروّح المولدي لڨى مرتو تعلّف في العلاليش ومغطّيا فمها. ڨال أحليلي تو تقلّي هزّني لطبيب الزروص ونا حتى عم حميدة مازال ما خلّصنيش. ڨالها آشبيك ها مرا سنوك بدت طايحة راك مازلتي هصكة. ڨالتلو لالا موف زورصتي نمضغ في اللوبان ڨرضت لساني ڨريب نقفّو..ڨالها مالة آش نڨول نا وڨفت عليّا كلبة خالتك عارم الزيت ولّي يبزّم من الترمبة..
الحاصل باش ما نطوّلش عليكم من هاك النهار والمولدي زاد استصين في المارش آريار..والتراكتور هذا حكايتو ما وفتش ڨعدت نتذكر منهم حكايتين أخرين تو في فرصة قادمة نحكي على وحدة منهم. المهم التراكتور ڨعد قرابة خمسة سنين عند المولدي وبعد فض الشركة مع محرز ولد العم البرني وشرى أراخي وتعبت فيهم مرتو والعلف غالي. باعهم وكمّل زوز بيوت لدارو ومرتو شرت جراي لصّقتهم للحيط. والباقي شرى بيهم بركوسات وڨالهم النعجة أمّيمتهم الكل..
