صغير الحجلاوي
توضيح: كلمة الستيرنا نقصدوا بيها العربة المجرورة الفلاحية. القصد موش وعاء الماء. العربة المجرورة نسميها الستيرنا وفي بعض الأماكن تسمى جردينة. هي التي يوضع عليها بطّاح الخشب لنقل البضائع ونغيره بصهريج ونسميه البرمة لنقل الماء. فما اقصده بكلمة الستيرنا هو البطاح الخشبي الذي يوضع فوق الكادرة ويستعمل لنقل الاشخاص والبضاعة..
الزبيرة الجزء الثاني
ما قصّرش حكيّم في الزبيرة جمعة من الزمان وخرج من سانية العم حميدة. الحق زبيرة عبد الحكيم عجبت الناس الكل والعم حميدة إلّي يلڨاه في الثنية يهز يعمل بيه دورة ويورّيلو السانية. حاجة تعمل الكيف وحتى هو ما قصّرش مع عبد الحكيم خلّصو في عرڨو وزاداتو حليمة دبوزتين زيت رحمة على الميتين والحيين..
عم حميدة ڨلبو حي وما يطيڨش حاجتو ما تتقضاش في وقتها. وڨعدولو الصريعات في السانية وما لڨاش علاش يكركرهم وحتّى محبّلهادي ڨالو الستيرنة ماهياش متفاضيا ها النهارات. إستناني بعد الجمعة ما نعزّهاش عليك.. وڨعد عم حميدة يتوحنن على الصريعات..
عم حميدة راجل طيّب حاج بيت ربي وصدرو معبّي بالقرآن وديما سالكة ڨدامو وشورو مقضي. لصڨ في توفيق ولد عارم لڨاه في الحانوت مركّب ستيرنا على جحشتهم وناوي يهز عليها شكارة سميد وبالتين تبن حطهملو العم بشير في الحانوت. ڨالو ها توفيق وليدي زعمة ها البهيْمة تكركرليش طرف الصريع ڨعدولي في السانية وما لڨيت علاش نجيبهم. وتوفيق حتى هو باهي وسارفيابل. وزيد العشية ما عندو مايعمل ولو كان يعاونوه لولاد تو يكركر صريعات حميدة ويرتّحو منهم..
العشوية شتاء باردة اليدين كافشة والعيون تدمع. آما مع الحركة البرد يتنسى. وشيخة الشباب ووسع البال ما كيفوش. فيصل وجمال ومراد يتبعوا في الستيرنا وعكش السواڨر تدور بيناتهم. وتوفيق يڨوّد في البهيمة من ڨدّام. ماشين راجعين يكركروا في صريع عم حميدة. وزاد لحڨهم زياد ولد عمران يعاون فيهم ..
زياد مضروب في زهور بنت العم بشير أخت جمال وباعثلها جواب مع رمزي ولد خالها الصادڨ بعد ما وعدو باش يعطيه لوص فحل للأرانب. جواب مضروب بالسفود. عشق وغرام وهيام. وكلمات غناية وردة دا هواك يانور عينيّا وعد ومكتوب عليّا ومسطّر على الجبين آيا عين آيا عين..زياد ڨال صحيح الدنيا تطورت والجوابات حاجة ڨديمة في وقت البورتابلوات. لكن زهور بنت عم بشير راهي حاجة أخرى. راهي شاعرة وحساسة وتقرا لاتر وديما تكتب خواطر في فيسبوكها وتحط تحتها قلب وبوسة. ڨالهم نغشمها بجواب باش نجيبها تزحف وتصيرلها رجّة عاطفية. كو دو كور وما تلڨى ما ترد. ڨالهم راني خبرة في التركيح . ڨالو صاحبو أي رد بالك كان يفيق بيك واحد من أخواها إلّا ما يزحّفك ويركح فيك بالكف..
الجماعة خرّار مرّار بين سانية عم حميدة ودارو يكركروا في الصريع وزاد لحڨهم كمال وهذا حكينا عليه قبل شبّوب أنيق نظيّف عندو كليو كلاسيك وديما حاط الحطة. لحڨهم وڨالهم جيت نونّس فيكم بروّا زمروا الله الله ڨالّو عبّي الصريع. جيتكم لوسع البال وبرّا. حتى دبشي ما بدلتشوش. البلوزون هذه الجمعة إلّي فاتت شريتها بميا سبعين ألف تحبوها تتشرّڨ في جرة صريعات عم حميدة؟ أكثر حاجة ننجم نعملها معاكم نڨوّدلكم البهيمة بعد ما تعبّوا الصريع..
الرجال في الحانوت حديثهم كان على الزيتون. الأسوام طالعة هابطة. وزبيرة عبد الحكيم المليحة..وعم بشير يسأل على زيتون الصاشيات ڨال زعمة باهي ريت برشا يشروا فيه. والزاير البوهالي شلعهم من غادي وڨعر شباب الجهة ڨعرة ما كانتلهمش على بال. وڨالو آش من صاشيات. البارح مراد ولدك وصاحبو منير هبطوا على زيتونات عم الهادي والله ضربوه في شكارة معبّية وانت تحكي على الصاشيات..
زياد يعبّي في الصريع مع الجماعة ويلحّس لجمال خو زهور ويسايس فيه ويڨلّو هات عليك أڨعد ارتاح آشنهي على زيتونتين زبرهم عبد الحكيم تو نجيبولهم عرش كامل؟.. البهيمة مواتيتها الحدرة وتوفيق متعنكش في الصريمة باش الجحشة ما تجريش وتتصلب عليها الستيرنا. وفي وسط الحدرة البهيمة شدّت فران وفحّجت وبدت تروّث وتبول والطشطاش تنطّر على صبّاط كمال. وزياد جاه ميساج . حلّو لڨاه من زهور ڨالتلو بعد شوي تو نطلبك. زياد من الفرحة عيونو رغرت بالدموع وبدا يمسّح على كرومة البهيمة..
وصلو للدار صوڨروا الستيرنا وخالتي حليمة تشكر وتشاكر وجابتلهم العليڨ مخلّط بالزيت والعرعار. والجماعة غلّست وزياد عاود نوڨز تليفونو. بعد شوي على الجماعة وحل التليفون وكلّماتو زهور. ڨالتلو وصلتني الورقة إلّي بعثتهالي مع رمزي ولد خالي الصادڨ. وبدت تتشقنص عليه وترڨد في لسانها. والرّاء تنطقها ya. وڨالتلو ماغسي على صورة جربة والله محلاااها. ڨالها أي واش رايك في الكلام إلّي في الجواب. ڨالتلو شو زياد. فو زات تغي جونتي. لكن والله وجو تاسّيغ كان نعتبرك كي خويا. وحتى زينب أختك نعتبرها وحدة من أخواتي. ربي يفضلكم ليّا. ماغسي آما والله والله والله جو تو جيغ الموضوع لاني نخمم فيه. نخمم كان في قرايتي أوخي عام السنا صعيب وزيد اللاتر يلزمها برشا خدمة.. زياد مازال ما تكلمش وهي ڨالتلو ديزولي هيّا نخليك وعلقت عليه التلفون. وڨعد زياد يعض في في مشغيط زيتون ويدفل..
رجع زياد للجماعة لڨاهم كلوا كعبات العليڨ والصحن لحسوه. جبد قشّابيتو كانت معلّڨة في جنب الستيرنا وبدا يلبس فيها وڨالهم آكاهو لولاد نخلّيكم على خير دارنا كلموني ڨالولي أمبولة التوالات تحرڨت. جي على الحانوت جيبلنا أمبولة. وشد الثنية وحط ليكوتور في وذنو ويسمع في جي با بوزوان دو تا بيتيي. يالّي ڨلتي شفّك حالي. خرجتي معايا بار آميتيي. إنت ڨلتيها وآنايا تخلوض بالي..
