صغير الحجلاوي
تكوبير اللوز
مرّة نكوبر في لوزة وشاهي نمشي نكوّر. شافني بابا ڨاعد نكركر ما طاڨش جاني وشد المسحة من ايدي وڨالّي هاو التكوبير هاو التكوبير هاو التكوبير. وفي ضربة من الضربات يڨلّع اللوزة بكلّها. ڨتلو آكّاكا بابا لشڨر. ڨالي عليك بالله تو تشوف فيّا اشڨر تو نا ڨدّامك اشڨر ها الفوڨيرة هذه أشڨر يا هامل وطيّش المسحة وڨالّي. بربي فاش جيت تصلح. وبدا يعد بصباعو. وڨالي سرّحناك بالشياه ما سرحت ڨتلتهم بالشر وطلعوا حيل. ڨلنالك جيب الماء ما جبت. تكوبر في لوزة تڨول عليك تحوس على ابرة. ڨلي تره فاش فالح. نهار كامل وانت تطرّز في كورة. وما تعرف كان هات هات هات وبدا يتشعبط في السماء. ڨالّي آطفل انت لمن طالع. وبدا يكفّخ في روحو ويضرب في جبهتو ويڨلي راني فرزططت منك باش تضبعني راسي هذا باش يتطرشڨ ومخي باش يخرج من وذانيا يا ولد الكلب شللللل شننننن ملّا بيعة زرڨة كي نهار كامل ونا نلاوي فيه كي الڨطوس الجالي.الحاصل عدّاها عشية كاملة وهو يخرنن وعطاني درس في مصلحتي وهو يتحدث ونا كل مرّة نلوّح عيني نشوف بدوش الجماعة يكوّروا. وهو قصد ربي باش يمشي يسهر في دار عمتي ونا فريرة طاير الكورة وما ڨالت الناس. ڨالو كوبر لوزة كلّي هي باش تنبت من أصلو حتى كان نبتت ماو تو يوكلوها الشياه كي نبدا سارح بيهم..
