صغير الحجلاوي
الزبيرة الجزء الاول
العم حميدة بدا زيتوناتو على بكري وكمّلهم على بكري. ڨال الزيتونة يلزمها ترتاح وتتزبر وتتحرث باش تحضّر للعام الجاي. زيتون عم حميدة باهي. صوّر فيه عام السنا. باع إلّي باع وهز للمعصرة عولتو وعولة ولدو لمجد حتى كان متعارك معاه. آما ڨال والله كان على خاطر ذريتو ملايكة وإلا والله لا يذوڨ منّي ڨطرة. واحد سافل سوفاج كي هو كي مرتو ما يڨرّش فيهمش الخير. حليمة مرتو ڨالتلو بشهوتهم الدعوة فيهم نعطوهم عولتهم خير ماتبقى مرتو تعزّر فيه وتڨلو داركم عصرو الزيتون ما تفكّروناش حتى بذواڨة..
هبط عم حميدة لحانوت خالد وڨعد مع جماعة الخربڨة وڨالهم نا الزيتونات كملتهم خيرك يا إلّي عطيت. نهيرين ثلاثة ونتكماصا في زبيرتهم. سألوه على الزبّار ڨالهم والله وين نجي نزبر ڨلبي يطيب. الزبّارة لملاح ما ڨعدوش وحتى كان ثمّا قلال وزيد يتشرّطوا برشا. يخدموا نهار ويمنّكوا نهارين. السانية ما يخرجوا منها كان في الربيع كي تسخن الدنيا والزيتون خيارو الزبيرة في البرد. ڨالولوا شوف عبد الحكيم يزبرلك. ڨالهم ليه هو زبّار؟ ڨالولوا أي صحيح إيدوا حرشا آما في السنين لخرانين ديما يزبر في زيتوناتو وزيتونات نسيبتو جنات وحتى نحنا تلزّينا عليه ولّينا نجيبوا فيه. تعلّم الصنعة ومحسوب ولّى يزبرلنا ديما. ڨالهم ما فيباليش ما سمعتش بيه . إمّلة تو نشوف نلڨاش في فضوة. نا شاهي نزبر السانية على بكري ونرتاح ..
في ثنيتو هو مروّح عرضو حكيّم راكب على الموبيلات والشاكمون يطرطر مع المغرب. سلّم عليه وڨالوا آسي عبد الحكيم راني ناوي نزبر هاك الزيتونات. والجماعة الحق شكروك وڨالولي عليك بعبد الحكيم إيدو رطبة وفرايهي. نلقاش فيك فضاء وليدي تزبرلي السانية ماني أُبّيك. ڨالو إيييه يا عم حميدة والله طلبك عزيز وغالي آما والله راهو فيدو فيد خوه. حتى زيتونات هاك الهجّالة جنّات نسيبتي لا لڨيتلهم وقت.._على فكرة جنّات ماهياش هجّالة لكن عبد الحكيم ملصّقلها كلمة الهجّالة ڨالهم خفيفة على لساني وزيد هي الفاتقة الناطقة في الدار راجلها كيفو كي بلاش_ آما كي قصدتني غدوة لا. بعد غدوة ل.ا بعد غدوتين لا. وكيما نڨولوا نهار الاحد تو نكون عندك. ڨالو يرحم والديك وليدي ويصلح رايك وهي وليدي بڨدّاش جورنيك. ڨالو شوف عم حميدة أوّلها وفقة وعڨابها سلامة. نا لا نڨلّك لا بسبعين ولا بستين كي الجماعة. ليك انت نزبرلك بخمسة وخمسين وباكو الدخّان عليك. قالو باهي على الضالين آمين. نهار الأحد كان حيانا ربي أبدالي فيهم وربي يشدلك في صحتك ويعطيك الوقت الباهي. باباك وحِيد وما عندي والي..
نهار الأحد كان عبد الحكيم في الموعد ولڨى عم حميدة من الفجر مڨرنص تحت زيتونة ويستنى فيه. صبّح عليه وزعمة ڨعمز. عطلاتو القشابية على ثنيان ركبتو هزّها لفوڨ وبدا يحضّر في ماعون التاي. ووڨف عم حميدة يكشّط في الحطب وشعلوا العافية وعمروا البراّد. وعبد الحكيم السيڨارو في في فمّو جبد التسترة. حنبعل ماضية تهبرى وسمّل باسم الله وبدا في الزبرة. وهو يدور بالزيتونة وعم حميدة يتبّعو. أوّل عتڨة طيحها وهو ڨالو وليدي موش لزّيتلها شوي. ڨالو لا هذيكة الزبيرة الباهية الزيتونة الوالدة نلزّلها والعجرودة نخفف منها تخفيف.. نصيّف ساعة وجا الزّاير البوهالي. مكلموّ عم حميدة باش يعاونو في تلميد الصريع. ولحڨتهم حليمة وجابتلهم العصيدة فطورهم. عصيدة بالزيت والسكر تتزلبط تزلبيط. عبد الحكيم يبلع اللڨمة وهي تڨول بلُقْ في ڨجومتو تڨول حلّيت طابو متاع دبوزة شروبو. كمّلوا فطورهم وشربوا كاس التاي وصب عبد الحكيم الماء في الصحن وڨالها إيييه خالتي حليمة يرحم والديك وينوب عليك على ها صحن العيش سخون بالزيت الجديد والله نحس فيه يتكرفت في مصاريني. والزاير البوهالي ما يردّهاش لتالي. ڨالوا أبّه أبّه هاو الضرب. يزّي من الكذب تي نشوف فيك توكل وتغمّض في عيونك وتتمغزز. حتى أنت آحكيم أُخّي وليّت تڨادي في الكلام؟ حشم عبد الحكيم وڨالو لا يا راجل الزيت نضوح قوي. ماكلة خالتي حليمة ما كيفهاش. نعرفها ملّي نا ذرّي. نقلّهم هزوني ليها نبات ونتعشّى عندها. وتلفتلها وڨالها بربّي تعقل ياخالتي منين نجي نبات عندك ونرڨد تحتك للدفاء. ڨالو الزاير إي بأمارة سرقتلها السردوك وخليتلها الدجاجات من غير فحل. عبد الحكيم حس روحو تورّط مع الزاير دز فيها ضحكة وڨال الصُغر يا الصُغر الواحد يشتاف نهار من هاك النهارات الدنيا ڨدّاش تبدّلت..
النهار دافي وزاد لحقهم أيمن ولد بشير وبيرم ولد ربح يلمّدوا في الصريع ويكركروا فيه ويحطو فيه فوڨ كدية حتى يدبّرلو عم حميدة ستيرنا ويكركرو للدار. أيمن وبيرم وين يلڨوا عتڨة كبيرة يبدوا يكركروا فيها ويجروا ويحسبوا أرواحهم كمايين. وعم حميدة بيّل مشى إتكّى تحت طابية بجنب البرّاد لزرقة الشمس. والزاير يربط في الصريع تحت الزيتون ويتبع في الزبّار ويسأل فيه على ورق الزيتون باهي للعلفة والّا لا. وعبد الحكيم يقلّوا موش خايب أما كي يبدا أخضر حار الهايشة ما يلزمهاش تكثّرمنو. والزاير يڨشر في عود زيتون بسنونو ويڨلو حليلي هاو مُر كيفاش يوكلوا لمعيز هذا. وعبد الحكيم رد فازتو للزاير وڨالو نح من فمك لا تطرح كي بڨرة محبّلهادي هاك السنين بعد ما شبعت من الصريع. وأيمن وبيرم شاخوا على كلمة تطرح . وبيرم يقول لأيمن قريناها عند سيدي رحيّم في درس الطرح بالزيادة ويضحك كككك. ونسرين بنت لمجد ولد عم حميدة سارحة بالشياه وتحط إيدها فوق راسها وتبدا تدوّر في حزامها وتغنّي نحبك هاي نحبّك هاي نحبّك هاي. فيقت عم حميدة من النوم ڨالها آطفلة صكّر فمّك حبّة تلوزك. عندك هاي عندك هاي النعجة دخّلت خشمها في سرفيتة الكسرة كلتلنا غدانا..
نهيّر زبيرة يعمل الكيف في سانية العم حميدة. عبد الحكيم يهبّط فيها عتڨ ومابين الزيتونة والزيتونة يڨعد يرتاح ويرُد النفس ويغرس ركابيه في التراب ويجبد الموس ويبدا ينظف في سنون التسترة. ويوقف ويحك بيها ظهرو ويكمّل الزبيرة. والزاير يقلّوا آعبد الحكيكم ليه أنت ڨدّاش عندك ذرّي؟ ولولاد ما قصّروش في تلميد الصريع وكي جو مروّحين عطاهم عم حميدة زوز باكوات بسكوي ڨوفرات وشوكوطوم. وحتى محبوبة ما قصّرتش في الغداء ودّتهم بالكسرة لمخمّرة ومرڨة حامضة بالدجاج العربي والزّبار يستحق العرڨوب والزاير رصتلو يمُص في الكرومة..آكاهو فيه البركة ڨال عبد الحكيم. اليوم بات الرزڨ. والله ياعم حميدة زدتك نص ساعة من عندي. راك بابانا الكل. وعم حميدة ڨالو يقد في حالك وليدي وفي صغيراتك وماو بالرجوع غدوة؟ ڨالو أي إن شاء الله كان حيانا ربي..
وتفرّڨوا الجماعة وبات عم حميدة يخمم كيفاش باش يروّح بالصريعات ويكدّسهم بجنب الدار. زعمة يكلّم محبّلهادي يعطيه الحصان والستيرنا كان هداه ربي يكركرعليهم وحدات الصريع يستحقهم علفة للهوايش وحطب لحاجير خالتي حليمة. هي بيدها ڨالت حاجتي بخشبات نعملهم مردومة للفحم وحتى الحاجير تعرّالي من فوڨ شاهية نطلّع فيه شوي. واطي وزيد مواتي الريح العافية ما تِعلڨ كان راسي يشيب..
