صغير الحجلاوي
سميرة
جمال بعد ما تخرّج من الجامعة كبّش في أمّو وڨالها هاو جاي راس العام نمشوا نطلّوا على أهل سميرة. عايلة جمال مازالت مترددة والطفلة ما يعرفوهاش وما يعرفوش أهلها. وحتى سألوا صاحب جمال قرا معاه في الجامعة على رايو في سميرة. ڨالهم هي الحق ما عندي فيها ما نڨول. آما أمها موش باهية نهار كامل لابسة شلاكة وتمضغ في الشنڨوم. أم جمال كي شافت سميرة في التصويرة ڨالتلو ها جمال وليدي ها الفتروشة هاذي باش تولي كنتي نا؟
جمال شد الصحيح وعم بشير بدا يقتنع بالمشيا. واجتمعوا وبدا عم بشير يهز وينفض وڨالهم نا ما نحبش أولادي وبناتي يوخذوا البراّني. تكلّم حسين الخو الكبير لجمال وڨال والله صحيح وراي بابا هو الصواب نا هاني ماخذ إنتصار بنت عمي الهادي. الحق ساترتني وكافلتني. وزعمة تهدع يحكي على مرتو ما حبّس كان كي رفناتو أمّو وڨالتلو تي أسكت ها طفل كلّي انت ماخذ مرا. وحدة بوهالية كي أمها. جمال ڨالهم موش حكاية تعارف. آما راهو بو سميرة عمل عملية على المصرانة الزايدة. ڨالو باباه وقتاش عملها. ڨالّو في الصيف إلّي فات. ڨالّو يارّرراه خزّط يا لي تخزّط. النعجات في الصيف حيل تو هانهم على ميلاد..
نهارالمشيا نجاة وبشير ركبوا في الديماكس متاعهم وجمال طلب الكليو كلاسيك متاع كمال وهز فيها أختو بثينة وخوه حسين ومرتو إنتصار. وكي جو قاصدين ربي دخل عم بشير للڨريشة وجبد برشني ولوحو في الكرّوسة جاتو نجاة وڨالتلو ها الفال ياراجل ناس أوّل مرّة ندخلوا دارهم نهزّولهم برشني؟ تغشش عم بشير وڨالها بالله هكّا برشني يعمل ميتين وسبعين دينار ما عجبكمش. أيّا بالله بذي لا إلاه إلا الله لاكتبلهم. وجمال ڨال أحسن. حتى هوما ما عندهم وين يحطّوه
الجماعة يتبّعوا في بعضهم وكي دخلو للمدينة تعدّوا الستوب لول والثاني وفي الثالث راكا جمال على اليمين. هبط ومشى لامو وڨالها هانا تو ندوروا على اليمين. الزنڨة لولى لا في الزنڨة الثانية على اليسار نلڨو دارهم الي بابها أحمر. جمال رجع للكرهبة وعم بشير ڨال يلعن والديه نا باعثو يقرا وإلّا يدور في الزّنڨ.
ووصلوا لدار سي الصحبي. عرضوهم في الباب وكي جو داخلين رجع عم بشير للديماكس ونادى حسين وڨالّو زعمة رودوسكور ما تتهزّش؟ ڨالو سي الصحبي لالا حومتنا رايضة تهنّى واطمان عليك أمان الله. وفي الباب وڨفت سميرة تستقبل في الجماعة وكي سلّمت على عم بشير ڨالتلو بنتو بثينة هذه سميرة آبابا. ڨالها ها المسلوتة هذه هاي تشبه لبنت عمران ولد زعرة الواعرة
عم بشير دخل لدار سي الصحبي دخلة غالطة طول. نحّى صباطو وڨالهم فاتني المغرب وجابولوا صلّاية. ڨالهم ڨبلة ربي وين ؟ كمّل عم بشير صلاتو دخّلوه لبيت الصالة وڨعد مع مرتو نجاة والصحبي ومرتو .وهو مازال غير كي ڨعد وهوما مدّولو قهوة كحلة دورولوا بيها خواطرو
سي الصحبي موظف متقاعد لابس فيستة وكرافاة. وكبّوس أحمر على البريستيج. وعم بشير شاش على أكتافو والسروال كابسو بسبتة ومثني بحذا الصرّة. وجناح البرنوص تحت ضبّوطو. وفي الجيهة لخرى جمال وحسين وخو سميرة أول عام ليه في الجامعة. عدّوا سهريتهم ڨاعدين على كراسي في الفيراندا للسميطري. دخلت أخت سميرة للصالة ونقّصت في صوت التلفزة. وعم بشير ڨالها اييييه بنيتي يرضّيهم عليك. ملّي دخلت ونا نڨول آشبيها وذانيا تزفزف. ڨالّو سي الصحبي والله لولاد يحبّوا التلفزة نا ما عندي فيها محبّة. دابي داب الاخبار. وعم بشير ڨالّوا نا ملّي مات زدّام كرهت لخبار. سمعو خو سميرة وڨالهم ما تڨولوليش عم بشير بعثي..
جابوا العشاء وجملوا في الصالة. وڨعدوا في حلڨتين. حلڨة للنساء وحلڨة للرجال. خو سميرة الصغير شاد صحن ويوكل وحدو. ڨالّو عم بشير آشنهي ياعتري توكل وحدك ومدرّڨ علينا. فاش توكل آوحيّد. ڨالّو نوكل في المقرونة بالباشامال. عم بشير ما فهموش. وسي الصحبي ڨالوا هانو يوكل في رغيدة المقرونة والله ذرية تو لاعدت تفهمهم فاش يوكلوا. جاوباتو نجاة مرت عم بشير وڨالتلو هلّا آسي الصحبي راهو كل وقت ووقتو. عم بشير بقى يڨحرلها وما حبّهاش تحكي مع الراجل وتڨلّو سي.
بعد ما كمّلوا عشاهم طلعت نجاة فوڨ البنك وبدت تلوي في بابيي سيرفيات على صبعها. والعم بشير بقى لوطى متلكمت في برنوصو. وڨال للصحبي أوخي ان شاء الله ما عندك سو. وعزڨو بيمين حانث وڨالو والله والله وشد الكاس الماء وڨال حق ها النعمة وتلفّت لمرتو وڨال بشهادة ها المخلوقة. راني ما سمعتش بالعملية كان أولامس وراني عملت فيهم. راهم ما يڨولوليش آسي الصحبي. وكي سمعت ڨلتلهم ليه يا رسول الله. الراجل يعمل عملية وما نسمعش. ليه ماناش محسوب دم واحد. ڨلتلهم غدوة في ليّام نطلّوا عليه. المرض ما فيشو راهو. حاجات أخرى أوخي نحنا رانا صبّابة ماء على اليدين. وكي الذرّي متفاهمين في بعضهم ومتخالطين نحنا ما عنّا ما نڨولوا. كان الله يبارك. ڨالّو الصحبي بحياة راسك سي بشير. طلتكم عزيزة والله لا عليك ملام. الفايدة في الصحة وكي تبدا لعباد متڨاديا هذيكا الفايدة
ما طوّلوش في سهريتهم. وڨفوا باش يروّحو. دخّل عم بشير رجلو في شلاكة مرت الصحبي. ونادت نجاة بنتها وڨالتها جيب صبّاط باباك. وفي ها الخوضة لز جمال لسميرة وڨالها آتوت ڨالتلو آتوت. وركبوا في كراهبهم وشدّوا الثنية.
كي بدل عم بشير تروازيام ڨالتلو نجاة اييببه هانا مشينا ورتحنا. مشيتهم خفيييفة. ڨالها عم بشير أه ينعلطلاو عليهم. مسفلهم. جايهم من اطرف الدنيا عطوني صبع ضلعة. ونا ڨريب نعطيهم برشني. ڨالتلو نجاة ياراجل هذاكا سبرهم. آما الحق ناس زواولة ودافين. ڨالها آكاهو نعرفكم ما تباتوا كان على رايكم. الواحد ماعندوش كلمة معاكم. وزاد في البوست متاع الديماكس وبدا يسمع في سورة الضحى والليل اذا سجى بصوت عبد الباسط عبد الصمد. وهي تكمل وهو يزيد يعاودها. وخالتي نجاة نعست بحذاه وهي اتكّت عليه وهو ضربها بكتف تكّاها على الباب إلّي بجنبها
جمال ڨال لانتصار آش رايك في سميرة ها انتصار. وحسين ڨالّو بابا ڨال مسلوتة ولايثة الجمعة الجاية نبعثولها ربطة ڨضامية باهية للصفراء. جمال ما عجبوش كلام خوه وبقى يسمع في غناية صابر الرباعي "هو عشان أنا ألبي طيّب تڨرحوني واشتريكم وانتو ببلاش بتبيعوني"
كي وصلوا للدّار جمال ڨال لامّو آش ڨال بابا. ڨالتلو برّا أرڨد باباك موافق من آمس موش من ليوم. ومشى جمال شد بلاصتو وقص بدينار كونيكسيون. ودخل لكونت سميرة "سوسو بوان جيستيون" وبعثلها ميساج وڨالها هانا وصلنا وتو باش نرڨد. غدوة نتّصل بيك. وغم على راسو بزاورة نمري وبات يحلم ومدخّل إيدو بين افخاذو للدفى.
