صغير الحجلاوي
المولدي ولد زعرة الواعرة
المولدي مر ببرشا مراحل في حياتو. كان جحش في القراية. دوبل سنة خامسة ابتدائي وعاود دوبل سنة سادسة وفي العام الثاني نجح وبعثوه يقرا مهني. بحكم قراية قبل مهني وطويل وجماعة المهني هوما الكبار شوي في السن. قرا سنة أولى وفي السنة الثانية بدا يضيع. وفي وسط العام بطّل من القراية ودوّرها مرمّة. كان مرّيزة طول. خاصة الشوابين الكل تكرهوا. ما يهضموشوا يحسّوه صحيح عين. ديما يتسهوك في الثنايا قعد مدّة مبطّل من القراية ولقى جماعة ماشين لسوريا باش يقروا فيها ويوخذوا الباك ويكمّلوا قرايتهم غادي. ربط معاهم الخيوط وبعد رخ لقى مستواه ما يسمحلوش هوما وصلوا للباك وهو حدو حد الدوزيام. قعد مدّة في دارهم ورجع للمرمّة. مشكلتو انّو معدة. يشد ذرّية ليسي ويبدا ينصح فيهم باش يبطّلوا الدخان. ومركّز برشا مع عبد الحكيم وين يلقاه يڨلّو لتو مازلت تقرا إمّالة دوبلت. وينصح فيه باش يبدا يصلّي. ويستهلّا في داداه محبوبة..
المولدي مرّة يخدم ومرة لا. هو الحق فني وصنايعي في التفرطيس. ويحب يكفرج العرص. مشكلتو كركار. يخدم نهارين ويوخذ تسبقة متاع جمعة يشري بيها دخان. وزعمة طاح للشراب. وفيسع ما فاق على وضعو وبطّل منّو. بعد ما سكر مع جماعة كيفو وتعاركوا وحلولوا راسو بذراع حديد يكرّوا بيه في اللّيڨة..
المولدي مراهقتو كانت كاسحة. خسر برشا سنين وهو يرلّح بين الرڨدة في دارهم وشركات المقاولين. والمقاول إلّي يخدم معاه يبدا يحكي عليه كي يروّح. ويڨول للجماعة أصحابو المقاول صاحبي يملك زوز مليارات ونص ومايتهنّى كان بيّا ومثيّقني وحاطني نعسّلوا على الشانطي.. دار الشوانط وتعرّف على سطا سمح ورڨدلو في الخط ڨعد معاه أربعة شهور وعضّو في زوز ملاين وروّح. وڨال لأمّو نحب نعرّس ببنت خالي وربطتلو امّو معاها الخيوط . أي مالة واشي بنت خالو وحيدة باباها وزيد كبرت شوي وباش يفوتها الترينو وتبقالو في الرقبة. وزيد عندها زهاز ما يملى زوز كماين ورسلة غلم وبقرتين.. ڨعدو مخطوبين ثمنية شهورعدّوا منهم أربعة شهور مرندفين تحت الصفة وهو يسبسي في الكريستال ويفشلم عليها..
بعد ماعرّس ڨعد عايش على رزڨ مرتو إلّي جاباتو جهازها. باع البڨرة لولى وبدا ينصح في أولاد عمو ويڨلّهم استحسنوا. والله ماخيرش من الاستقرار. وسيب عليكم من الضيعة ماعندها وين توصّل. وربي ڨال لمرا نصف الدين كان موش اكثر. وزاد باع البڨرة الثانية. صرف حقها في النوفي. حرّشت فيه مرتو باباها وقالها زيّر عليه. كلاه الفلس وبطّل ماعادش يذكر حكاية العرس وتولهى في الصغار. كل عام مرتو تكرّدلو واحد. وولّوا عندو ذرّي أكثر من زيتونات باباه..
صحيح المولدي كبر وكلاتو العيال وهجع ورجع على روحو وتولهى بالعايلة. وزيد كي ركح عطاه خالو هكتار ونص باي الطفلة بنتو وتحسنت ضروف المولدي وزاد زوز بيوت وتوالات لدارو. لكن باقي ديما مرّيزة. تبقى سنين ما تراشو. وكي تقابلو تلڨاه ما تغيّرش. أوّل ما يراك يسلّم عليّك ويڨلك آشبيها كرشك كبرت. ويسألك فاش تخدم. تڨلّو موظف في الإدارة لفلانية. يڨلّك يا وحيّد مالة دفعت رشوة باش دخلت تخدم. وأي واحد من الدوار يخدم في الخارج يڨلّوا منين دبرت فلوس الحرقة. وكان واحد في الغربة وعملّو تليفون ويسألوا على حال البلاد يڨلو الزمّة ضاربة أطنابها والعباد توكل في بعضها..
المولدي طفولتو مفرعسة ومراهقتو عاث فيها فسادا وفي شبابو يهز وينفض. لكن هو من النوعية إلّي تضيع في صغرها وترجع في كبرها وتستقر والله لا يعيد معصية. وحتى فيزيولوجيا المولدي تحسّن. سبحان الله وين يكبر وين يزيان أكثر. راجل سمح أبيض ضعيف وبدنو طويل وراسو كبير وأصلع. ويعشق الكبّوس لحمر. ومشكلتو وين يشري كبّوس ما يجيش ڨدو. يفتّڨوا بالمقص من لوطي باش يوساع ويرصّو رصّان فوڨ راسو. الكبّوس يلبد مع الصلعة تڨول غطاء ستيلو ما عادش يتحرّك وما يتنحّى كان فورصي. المولدي كي يلبس الكبوس يحصر الهواء بينو وبين الصلعة ويولّي كي الفنطوز هو ينحيه وهو يڨول بق. تڨول عليه جبد طابو متاع دبوزة شروبو وإلّا حل كعبة كوكا بمغرفة..
ذلك هو المولدي ولد زعرة الواعرة لمن لا يعرفه وتلك هي قصة حياته. هو المولدي الرهبان. ولقب الرهبان لصقوهولوا شباب الجهة بعد حكاية المولدي مع عم حميدة التي اصبحت مقامة من المقامات الخالدة وحادثة تروى في كل المناسبات..
هو صحيح المولدي ينغر من الحكاية. لكن هاو باش نحكيهالكم وما تعاودوهاش. مرة الدنيا صيف والشمس مزنهرة من الستة متاع الصباح. وسي المولدي متكّي تحت حيط دارو للظل. ووين تسخن الدنيا اكثر ووين سي المولدي يتمطط كي الكاوتشو تحت الحيط. وكدّوس رملة مدورين عليه حوّيطة حجر وفار ساكن في الرمل يطل ويحب يخرج. وكل مرة يطلّع راسو يلڨى المولدي متكّي .تشجع شوي الفار وخرج من حفرتو. و زاد تشجع وبدا يمشي ويرجع مع الحيط. وسي المولدي ناعس والفار وصل لركبتو. وهو لابس سروال عربي. و دخّل الفار راسو. ويبدو انه توغل كثيرا. وحس المولدي بالرطابة والبرودة. وأهم حاجة يمكن ان اصف بها المشهد هو الاطار المكاني ومحتوياته.. حيط حجر، صفة هندي عالية تحتها كلبة شمطة، مطمور غارڨ متاع ارانب، سدرة كبيرة بكلها شوك..وما تركه المولدي مكان مبتل رغم الجفاف الذي اصاب المنطقة في تلك الفترة. أين سي المولدي؟ ماذا فعل ذلك الجربوع اللعين؟ الصفة أصبحت اشلاء وتينها متناثر وأغصان السدرة تكسرت والكلبة تعوي وذكر الارانب يئن داخل المطمور حين سقط عليه كهف من تراب..
خرج المولدي من المطمور يجري وشاد الثنية والكبّوس فوڨ راسو ولا أثر للسروال. كان صراكيك المولدي تضرب في بعضها وهو يجري مسرّح في الثنية. وعرضو عمّك حميدة وڨالو آشكون انت وآشبيك تجري وحدك في ها القايلة. إنس ولّا جان رهبن وإلا نجلعدك بالعصا. مخيب شعاڨيبك وانت كي عرف لوڨيدة الطول والبيوضية والراس لحمر. وبدا عم حميدة يصوّت في المولدي عطاه طريحة ويڨلّو رهبن وإلا يجعلك باش رهبنت. كلالو ڨلبو بالعصا. والمولدي يقسم بالله كان هو المولدي ولد زعرة الواعرة. وحميدة يڨلّو إيلا أيه. انت رهبان في شكل المولدي. حشاها زعرة كان تجيب كوّال صباطة مسلهڨ كيفك..وما منع المولدي من حميدة كان كي حزّت عليه العايشة مرت الصادق وڨالتلو سيّب الراجل راك هرّيتلو اجنابو بلڨاحية..
ومن هنا كان لقب المولدي الرهبان. المولدي عرصة من عرص الجهة قيمة ثابتة في سعيان الزيتون وعنصر لايمكن الاستغناء عنه ابدا في ذبائح الافراح..
