صغير الحجلاوي
بوط الهادي
يحكيوا على جرد بوط ڨديم نومري ثنين وأربعين مطيّش فوڨ كدّوس غبار في وسط خشّة متاع هندي. بوط كي تشوفو ما تحيرش في آشكون مولاه. بوط أخضر وعليه الكلام. صحيح متين مازال واڨف. شراه الهادي في أوّل الشتاء باش يبلسو فوڨ التقشير يخدم بيه الفلاحة ويغفس بيه على الجليدي ويشڨ بيه الوديان وقت الامطار. البوط خذاه مع بنطوف صوف لمرتو سعدبة بنت حميدة . البنطوف لبساتو سعدية شهرين وصبعها الكبير طلع منو. لواحاتو في الخشّة والهادي كمّل بالبوط لآخر الشتاء وتفتقلو منتالي فوڨ كواعبو. وحتى هو لوحو بجنب بنطوف مرتو. فردة بوط تزرزحت من فوڨ الكدوس بعد ما بربشوه الدجاجات وفردة تعبّت بالتراب وبقت متّكيا وحالة فمها فوڨ الكدوس..الربيع ربّع والصيف صيّف والهادي باع بقْرة عُشرة على ميلاد. وكي روّح بالصوارد حب يخبيهم على مرتو وبناتو. عارفهم تو يعڨروه في ثلاثين والّا أربعين ألف. ڨْعد يخمم وين باش يحط الصوارد. يخلّص المولدي في حق حرثية السانية متاع الربيع الي فات والبقيّة الجمعة الجاية يشري بيهم نعجات يدوّر بيهم الزيرو. والعام تعدّى باهي والسعي مقابل.
.وين تو يحط الصوارد وين تو يحط الصواد دار منّا ودار من غادي وجاتو فكرة ما تخطرش على البال. لكمت الصوارد بلباهي في صاشي وحشاهم في البوط. وحط البوط في بيت دوزان الفلاحة فوڨ الجاروشة وغطّاه بالكعكة. الحاصل البلاصة ابليس لرڨط ما يطلّعهاش. لكن حصل ما لم يكن في الحسبان..
الدنيا صيف. وعلى حشيش الربيع وكي سخنت الدنيا كثرت الحناش. وسعديّة عندها فكرة أن ريحة الكاوتشو المحروڨ باهية. تهرّب الدوارج وتبعّدهم على الدار. وزيد أولامس في ليّام توفيق ولد عارم لسعاتو عڨرب ڨريب ترزيه في عمرو. في العشية لمّدت صبابيط وشلايك ڨدم وسيكان بلاستيك وبنطوفها من فوڨ كدّوس الغبار. وسعدية كي الثعلب ما يخفى عليها شي. وحتى من بوط الهادي فاقت بيه فوڨ الجاروشة. لمّداتو مع بقيّة الصبابيط والشلايك وكدّستهم وشعلت فيهم النار. والهادي يتفرج عليها. النار شعلت وهو تفكّر الصوارد. وجا يجري ويعيط آهي بوطي آهي بوطي. وبدا يبربش في كدوس العافية. وستر ربي النار مازالت ما كلتش الصوارد الكل. بدا الهادي يحفّن في التراب ويطفّي في البوط وجبد منو الصوارد محروڨين من برّا. تحرڨولو منهم قرابة سبعين دينار..
الهادي السّبعبن دينار طلعوا من ڨلبو ومن الغش يلوّح فردة البوط على سعدية وسبلها بوها. البوط جا في ظهر سعديّة وهي تغششت. ڨالتلو هاني مخلّيتهالك الحق فيّا نا إلّي نبعّد عليك في الهوش. إن شاء الله يتلكمت عليك عفريت ببركة ها التّماسي. وغضبت ومشت لدار باباها حميدة. وحميدة حاج بيت ربّي ومحافظ على صلواتو. لڨاتو يصلّي في المغرب. وأمها حليمة بجنبو شادة زوز مغارف وتحرّك في المقرونة وتنفخ على الصحن. وأختها فريدة تنفض في بطّانية في ساحة الدار. ڨعدت بجنبها وبدت تحكيلها وڨالتلها هاني خليتهالو واسعة وعريضة. ڨالتلها أمّها آحليلي آبنيتي في ها العمر هذا وجايتني غصبانة ليه آش عملتي. قْالتلها شعّلتلو بوطو. ڨالتلها ها طفلة تكلّم بالشوي مغرب والناس تسمع. وعم حميدة يصلّي وشغبوه بالحديث وبدا يكسّر في وذنو. شهّد وسلّم وڨالها آش تڨولي ها سعدية بنتي . آش عملتي لراجلك؟ ڨالتلو شعلتلو بوطو. ڨالها يمنعك فيه سعدية بنتي. هكاكا راك بنتي نا الحمر.ة هلّا نا عطيتك للهادي ولد فجرة ليه. ماو باش تشعللو بوطو وتجي غضبانه عندي. إن شاء بركة أمك هاي تسمع فيك وما تعملليش كيما انت عملتي لمولى بيتك شعلتيلو بوطو وخلّتيه كي مطرڨ السداية لا تفهم لا من راسو ولا من رجليه..
