قرر جدّي جاحم باش يمشي للهند ويشكي بعمّو إلّي عنل على باباه إنقلاب. وقبل ما يمشي للهند يلزمو يتعدّى لسرت في ليبيا ويكمّل الإجراءات في أغادير في المغرب. يعملولوا فوتوكوبي للجواب على جلد حلّوف ويطبعولوا فيه. في سرت يطبعولوا بفنزي المعزة. وفي أغادير يعملولوا الطابع الشايح بحافر البغلة
قصد ربي جدي جاحم وسافر في الليل. وبعد شهرين وصل لسوڨ أهراس في الجزائر. اتّكى في وسط المثنان ونعس تقريب جمعتين وإلاّ ثلاثة وكمّل ثنيتو. كي وصل لأغادير طبعولوا في الجواب وخذا فيه ديشارج. وحسب مادوّن جدنا قال تعب برشا في الإجراءات الإدارية. وفي سرت بقى عامين وهو يستنى. الحاصل بيروقراطية مقيتة وڨريب يرفضولوا الجواب. وما صححولوا فيه كان بالتدخلات. يرحم والديه صاحب باباه وزير من طبرق سلّكلو أمورو. بعد ما عطاه رشوة. ثلاثين تريتشيون وأربعميات زلاخة. وهذه العملة إلّي كانت متداولة وقتها. الزلاخة في وقتها كانت أقوى عملة في البورصة متاعهم. كعبة الزلاخة تنجّم تشري بيها معمورتين ومطمور ڨمح وجبح نحل وبيثرايتين. وانت احسب
وحدك. الوزير ضرب ضربتو و قضالو قضيتو.
جدنا جاحم هذا انسان ذكي ويحب المعرفة تعدّى طول لليونان. قال نعمل طلّة ونشوف آخر الاصدارات الثقافية والعلمية غادي. وبعد ثمنية شهور وصل لأثينا. فرحوا بيه الحق. ڨعد بحذاهم عام ونص. لڨى الشيخات الكل عندهم وديما محفلينها. يحضر لحفلات دراحيوس. ودراحيوس هاذا فنان يدربك على الحيوط ومسمينو دراحيوس. وجدّنا كل ليلة يبات يسهر ويشرب في الدڨفت المغلّي ويدوّز بعصير الخروع. يبلع ڨد ڨد ويرڨد. وبعد عام ونص من الشيخات عزم من اثينا في اتجاه الهند باش يوصّل الجواب للخلمينعام. ساعات يركب على ذيب ويشق الجبل. وساعات كي يلڨى بلاصة ساهلة يدڨها كعّابي. والجواب في وسط الغرارة على ظهرو. وكي يعرضو بحر يعمل غطسة ويركب على خشب العرعار. ووصل للهند ..
في الهند عالم اخر. بنية الأمم المتحدة شي كبير. ثنين وثلاثين كيم. وباركينغ واسع متاع زوايل. وقبل ما يوصل لساحة المنظمة فركتوه الحاكم وحلّوا الغرارة وشافوا رسالة جدنا تاحش للخلمينعام وقيّدوها في البيرو دوردر متاعهم وڨالولو اقعد استنى حتى ننادوك.
بقى ثلاثة سنين وأربعة شهور ونهارين وهو يستنى نادوه باش يقابل لخلمينعام. ودخل لبيروه. وحسب ما يحكوا شي يكوخر يا لوخر. بيروه كبير برشا معبّي بخشب النخل وتتراڨص عليه الڨرودة. وبحذاه برشا نساء ورجال على كل لون. يمروحوا عليه وهو مدخّل رجلو في فسقية ماء. مدلو الرسالة قراها وطيشها على جيهة. وجبد بتّية من تحتو ودخّل فيها صبعو وعمل نفّة وڨالو تفضل أحكي..
بدا جدنا جاحم يحكيلو ويشكيلو من ظروفهم الصعيبة. والمترجم يترجملو. ولخلمينعام متأثر بكلامو. وبعد ماكمل ڨالو انت الساعة منين جيت. ڨالو جيتك من قبصة. ڨالّو تڨعّد من ڨدامي ڨبص في عينك يعطيك كبسة تكبسك انت وأمّاليك. مالڨيتوش الخير في بعضكم لاحڨيني هنا حتى لنيودلهي. شد ها ستّلاف زلاخة. هزهم لبوك في شكل قرض متوسط المدى. وتو نبعثلكم الخبراء متاعي يشوفوا يلقولكمش حل في قرض رقاعي وجدولة لديونكم الخارجية يلزمكم إجراءات موجعة رفع الدعم والحد من كتلة الاجور إلي عندكم ومراجعة أسعار المحروقات من حطب وفحم وفيتورة وبعرور. وكيما ڨالت العلامة متاعكم زينة الڨصرينية سلّملي على داركم برّا يستر حالكم. داركم راهم لزّوني داركم راهم ضرّوني سلّملي على داركم برّا يستر حالكم..
وكانت زيارة جدّي ناجحة رغم أنها ما حققتش كامل أهدافها. إستغل جدنا الفرصة وعمل دورة وعكلة في الهند ودبّرت مرا. خالة جد بو جد شاروخان لڨاها متربّعة فوڨ بڨرة وتعطي في حق ربها. روّح بيها . ووين يجي على بلاصة وتعجبو يعدّي فيها شهر وإلّا ثنين. ما وصلل لقبصة كان بعد سبعة سنين وعندو تسعة ذرّي يتبعوا فيّه..
وكي وصل لڨى عمّو مات. وحتى باباه مات. ولڨاهم حتى هو عملوا عليه انقلاب. والشعب ما بقاش منقسم آما خلاه يوكل في الحلفاء لڨاهم يسفو في التراب. وعندهم مشكلة متاع سيولة. وجابلهم اربعة لاف زلاخة وللفين لخرين كفّتهم عند شاروخانتو. وڨالهم نعلمكم اليوم باش نحكمكم وباش نعمللكم التنمية المستدامة..
الله يرحمك يا جدّي جاحم مات على صغرو بعد ما حكمهم ميتين وثنين وخمسين سنا ورغم مدة حكمو القصيرة البلاد شهدت انتعاشة كبيرة وعمل لشعبو التنمية المستدامة..
صغير الحجلاوي