جدي جاحم بن تاحش بن ماخي بن عبقي بن عبقر بن عبيد بن الدعا بن حمدان بن سنبر. هاذم عاشوا في قديم الزمان منين كانت الدنيا دنيا. وقتها ما ثمّاش تراكتورات دوبل بون خمسة وثلاثين زايلة وكات سيلاندر. ما تلڨى كان الخمسة وثلاثين زايلة. وحتى الكونيكسيون ما ثمّاش..
جدي تاحش كانت عندو ثمنطاش مليون نعجة ومليون ونص كبش. والشياه الكل ولدوا وتاوموا. عمللهم ڨريشة مابين الكبارة وڨبلي وبعد ما كمّل الڨريشة ومن التعب ڨال خنتمد شوي. توسّد جبل نصر الله ومد رجلو وكالاها بالرديف. وكي ثنى ركبتو وحلتلو سيدي علي بن عون ما بين اصباع رجليه كركرها جابها بحذا الحفي. وكي خذاتوا عينو حس بوجيعة في معدتو. قْال لجدايتي نحس في روحي مستاجع. قْالتلو هذاكا قْاز ها عزيزي. حتى انت البارح راك شربت ماجن لبن. قْالها شو ف ترا اعمليلي طرف بسباس. طيبتلو برميل بسباس وجابتهولو. حطو بجنبو فوڨ سليانة وتقْعّ وبدا يتكسّل كسّر صرولايتين في أولاد حفوز ودز منزل شاكر بصبعو جابها تابعة لصفاقس. طرشڨ كرومتو. تفجعوا ميتين معزة ونڨزوا من الڨريشة. كرشو غروطت وأربعة معامير في فايض تشڨڨوا. كي شرب البسباس حس بالذهانة. جابتلو جدايتي غداه وبدا يوكل في الكسكسي ويرفس في ذيل تمساح. وقْالها ماني ڨتلك فتروشة اللحم نحبّها مفوّرة. ڨالتلو ما بقاليش وقت وخفتك لا تجي جيعان وما تلڨاش غداك. ولّيت ڨليتلك سلك اللحم ڨليان. اصلا حتى رولو الاليمينيوم عادت على عڨاب. سكت جدي تاحش مازاد حتى كلمة. خايف لا يعمل عركة أخرى. وهو من عركة لعركة وما هوش ناقص مشاكل. وفي ڨلبو ڨال إممم إلّي يغلبكم يجي يحاسبني..
جدّي وجدّايتي عاشوا متهنين وبالقدر وجابوا الذرّي. خمسة وسبعين تحشوش و ثمنية وستين تحشوشة. وربوهم احسن تربية. جابوا جدنا جاحم سيد الرجّالة وما ندراك. وهذا موضوع حديثنا.
حتى جدّي جاحم هذا كان كي يردس في ڨطرانة تتحرّك لسودة وتطلع أم العظام من فوڨ جبل الحميمة. هوناس املاح كي باباه تاحش. ماهوش وكّال كي باباه. كان يتغدّى فيل. ويتعشّى نمر. ويشرب نحاسة تاي. ويمصمص فمّو ببرميل ماء. ويتوسّد الجبل ويرڨد. وكي عرّس عطاه باباه خمسة ملاين نعجة. وأربعميا وستة وثلاثين ألف هكتار. وحتى هو عرّس بتسعة نساوين فرد ضربة. راجل أحمر كان كي يتثاوب يعوّج نخلة. راجل وعليه لكلام. نفس مومنة عمرو لا ظلم حد. وحتى هو مرّة وحدة تعارك مع مرتو لولى وضربها بكف. من الفجعة مرتو الخامسة طيّحت ثمنية ذرّي. جدنا جاحم كي يلعب الكورة مع أخواه ويعطوه يشوت ركنيّة يجيبها في الأردن. وكي يطلع للكورة بالراس يحطها في غدامس. الباهي في جدي جاحم كان نظيف وولد وقتو وحطايطي. كل شهر يغسل وجهو مرّة. وكل خمسة سنين يدوّش. يحجّم لحيتو بمنجل. ويمشط شعره براطّو. وزيد راجل طيّب وكريم. مرّة سهر بحذاه صاحبو. عطاه ثلاثة ميا وأربعة وعشرين ناڨة. وستّة وخمسين طرناطة سدّاري. وستين بهيم. وثمنية وثلاثين كلب..
المشكلة وقتها جدّنا تاحش ما هوش متفاهم مع خوه. الوقت هذا إلّي نحكيلكم عليه راو في وقت الحضارة القبصيّة. وقتها بوزيد تابعة لڨفصة وڨفصة تابعة أغادير في المغرب. وأغادير تابعة لسرت في ليبيا. وكانت المحكمة الدولية في اليمن. ومنظمة الامم المتحدة في نيودلهي. عاد كان جدي تاحش ماهوش متفاهم مع خوه. وخوه هو رئيس القبيلة والحطب الكل يفكّو. ويدفّى عليه رجلو. والرماد هانو مازال لتو في السند. وكان الحلفاء الكل يعطيها لأولادو يوكلوها
تفاقمت المشاكل والجو العام كان مشحون والاوضاع السياسية والإجتماعية ماهيش مستقرة. و يوخّر ويڨدّم خو جدّي ويعطى هنشير جداري وبك وكفّيس لنسيبو راجل بنتو. تغشش جدّي تاحش وعمل عليه انقلاب وكلت بعضها. حرب كبيرة والشعب تقسّم على زوز. شعب مع جدّي تاحش وشعب مع خوه. وكل نهار تركب عركة ويروّحوا الثوّار روسهم مكردغة بالحجر. أي عاد فكر جدّي تاحش وڨال ها العركة ما تفصلها كان الأمم المتحدة. وكتب جواب على جلد ثعلب ولكمتو في غرارة صنعتهالو مرتو وڨال لولدو جاحم هزو للهند وأعطيه للخلمينعام. هو أختار جدنا جاحم على خاطر أذكى واحد في أولادو ومكلفوا بالشؤون الخارجية والهجرة والعلاقات بالمواطنين والمجتمع المدني...
صغير الحجلاوي