وبعد ما شرطت زبيدة على عم عباس باش يكتبلها السانية بإسمها وتوخذو. هذاكا نهار وهذا نهار عباس نحّى فكرة العرس من راسو وقيّد في الحج وحفظ ما تيسّر من القرآن. وكي ما هبطش اسمو في الحج وبطوا عليه قالهم ما نبقاش نستنى وعمل عمرة وزار بيت مكّة وقبر الرّسول..
عبّاس عندو خبرة في الحيوانات. يداوي الهايشة المريضة ويجبر النعجة المكسورة ويولّد البڨرة المتوعّصة ويجوه الناس من كل بلاصة يداويلهم حيواناتهم وكي جا من العمرة وبحكم عندو خبرة في الطب وزاد كي حفظ كلام ربي دوّرها حروزات وكتيبة وعزومات وطب رعواني. هو ماضربهمش على ايديهم هوما لزّوه لزّان وهو راجل تايب وحاج بيت ربي وحافظ من القرآن الربع الفوڨاني وما يفعلش الخايب وديما يبعد على الحرام. وكل شي من كتاب ربي وحكمة رجالو الصالحين وحتى في أجرتو ما يستغرضش فيهم إلّي يمدّوهولوا فيه ألف بركة. حارتين عضام يقبلهم. صاشي قضية يقبلو. ألفين فرنك يقبلهم وهو ماهوش مستحق والفايدة في الشفاء وما يبري كان العالي سبحانو ومعظم شانو..
الحاج عبّاس الكابيني متاعو هي بيتو. زربية حمرة مبسوطة علّرض وجراري على الحيط وميدة لوح في الوسط فوڨها المصحف والجزء الثالث من تفسير ابن كثير وكتاب ميّارة ومشرب ماء وكاس فيه ستيلو ومعلّق شوّاطة سبول ڨمح بيدي بجنب الشبّاك وصورة المرحوم خوه منين كرّمو بورڨيبة بعد ما شارك في الحرب مع فرانسا ضد للمان. وكل من يجي لعم عبّاس تجيبلو بنتو التاي وكان وقت غداء تجيبلو الكسرة والمرڨة. والعم عبّاس يداوي فيها عباد وحيوانات وساعات يشاوروه حتى على الشجر. وموش ديما تلقاه في دارو. هو فلاح وولد فلاح وڨالهم السانية خيرلي من العايلة خاصة ملّي دخّلت الماء وعملت فانة السانية تبدّلت وزيتونها سبّل وحيت من جديد. وأكثر الأحيان العم عباس تلقاه متّكي تحت زيتونة ويقرا في القرآن وإلّا فيدو تسترة ويڨطع في الرضّيع من تحت الزيتون وكان جاه أشكون يحبّ يداوي ينادوه وهو ما يقصّرش دريجين ويكون في الدار..
الحال حال صيف وزوّارعباس موش برشا. من الصباح صبحوا عندو. الزّاير بعثاتو أموّ باش يكتبلو للبڨرة منفوسة ضراعها فيه الحب وما خلتهاش تحلبها وإلّي يڨربلها تبدا تنكّص. وسعدية مرت الهادي جت لعبّاس وجابت معاها أختها فريدة وقالت تحب تكتب لعدنان ولدها يخاف من المعلمين ويوهڨ من الامتحانات والسنا قريب يدوبل وهي في الحقيقة جابت اختها فريدة باش يعاونها العم عبّاس ويكون سبب ويسهللها في مكتوبها والمكتوب عند ربي. فريدة طفلة باهية وبنت أصل وحاذڨة لكن ما سهللهاش ربي رغم أن جهازها يعبّي ثلاثة كماين ويفضل وحتى من السعي مالي الڨريشة وعندها كرني مستّفة فيه فلوسها في البوسطة. لكن الراجل ديما باهي والمثل يڨول ظل راجل ولا ظل حيط..
هوما ڨاعدين في بيت عباس وزاد خلط محبّلهادي وجهو كي الكنزة المڨلوبة محبحب والڨشرة طايرة منو والنفخ ظاهر عليه وبدنو أحمر بكلو وڨعدامهم وبدا يحكحك. والزّاير ڨال ها الراجل ملّي ركّب فم أمورو لتالي ليس لڨدام..محبّلهادي كبير الڨعدة بدا بيه عبّاس سبّع عليه بالشب وحطّو في الكانون والعين حق وفص الشب بيّن العين والعين عين مرا عرفها عبّاس وكتم السر في ڨلبو وعبّاس معروف عليه راجل ثيقة ويبعد على العيب ويستر لعباد وما يڨولش على صاحب العملة. الزاير يتفرّج على عباس وتلفّت لسعدية واختها وڨالهم نعّمبو الوقت مخيبها الدنيا تو بربي ها المخلوق آش فيه ما يعجب باش ينفسوه على زينو على عينو على صحتو تيهاو مرهون في كحّة تياهو مسكين كي الفرّوج لمڨرمل تو بربي هذا فيه ما يوخذوه بعين؟ غمزاتو سعدية وحطت فريدة صبعها على فمها باش الزاير يسكت خير ما يسمعوا محبّلهادي والنهار ما يتعدّاش على خير..
كمّل عباس من محبّلهادي وعطاه نفول دواء يدهن بيه . ورڨ الدفلة وعروڨ الجداري والڨضاميّة وشوفان ونوّار الڨحوانة وحاجات اخرين يطبخهم في الماء ويصفّيهم ويزيدهم ڨطرتين خل وكل ليلة يمسح بيهم بدنو قبل ما يرڨد..وكي جا دور الزاير كبّش وڨال لسعدية والله كان انت قبلي. مصالحك باش تضيع ونا ما ورايا شي وما عندي ما نعمل. ودخلت سعديها لعباس بموضوع ولدها عدنان إلّي ما طولش فيه عبّاس وخسر عليه نص ورقة بيضة من آخر كتاب الايقاظ سنة ثالثة خنتب فيها تخنتيبتين وعمل فيها سينياتير وعملهملها حرز وڨالها علڨهولو في رڨبتو. وڨعدت سعدية تستنى في الزاير وقتاش يكمّل ويخرج باش تدخل في الرسمي وتلڨى حل لموضوع زواج فريدة اختها. والعم عبّاس ولّالهم محمود تيمور في زمانوعدّى صبحية كاملة وهو يكتب الستيلو قريب يفرّغو. ساعتين وهو يصنطر في الحروز تصنطير. وعلى الغفلة يدخل عبد الحكيم ينسنس. يحب يعرف زوز النساء إلّي جوا لعباس آشكونهم. خايفهم لا يطلعوا جنات وبنتها ليلى خطيبتو جايين لعبّاس يكتبلهم باش ليلى بعد ما تعرّس بيه يولّي الراي رايها وتڨوّد فيه. دخل عبد الحكيم وقالهم مزروب جيت نسأل عم عباس وبرّا ونحّى شلاكتو وحط رجلو في وجه عبّاس وڨالو شوفلي آعم عبّاس يسترك هذه عين حوتة وإلّا شنهي. والزاير ڨالو آعبد الحكيم آشبيها شلاكتك مبلولة لتو ما تعرفش كيفاش تستنجى. وسعدية حطت محرمتها على فمها وما نجمتش تسكت من الضحك. وعبد الحكيم بلع السكينة بدمّها وفارص روحو وروّح والزاير ڨالهم يكذب آمس برك في حانوت خالد رابط رجلو بطبّة وڨشرة بصل وڨال عفست على المذرة دڨتني وعملتلي المادّة..
حتى كي كمّل الزاير وكتب لبڨرتهم حرن غادي وڨال لسعدية وفريدة إلّا ما نستناكم ونروّحوا جميع . وكي أيّست سعديّة من الزاير صارحت العم عباس وطلبت منو باش يشوفلها حل لفريدة وربي يسهّل في مكتوبها. وحتى هي خنفسلها حرز وڨالها كي تروّح فحّج على الجاوي وبخّر بيه..
وشدوا الثلاثة الثنية الزاير وسعدية وفريدة. والزاير ڨالهم هاتو لبشارة دبرتلكم راجل. ڨالتلو سعدية آشكون ها الراجل آالزاير تطلعش أنت آولد نويرة. ڨالها لا آما راهو محرز ولد عم البرني سمعت بجميلة مرتو ڨالوا تاعبة في حالة لدراك باركة وما تنجمش توڨف كان ماتت توخذو فريدة. ڨالتلو فريدة اللطف منك ها الزاير مخيب فالك المرا لباس عليها تتوحّم ومشت للطبيب وڨالها ناقصة حديد وتو لاباس أصح مني ومنك اللطف عليها عندها عيلة ڨتلتها وعينها حية آالزّاير البوهالي. ڨالهم صااار برّا برّا برّا جميلة طلعت حبلى؟ ونا آمس نشوف في محرز يسايس في البرلينڨو مشى في بالي معبّيها بالكارلاج. يعطيه عزا محرز ولد خالي البرني ملّا لوص جميلة مرتو ردّها أرنب كل ڨمرة تجيبلو ذرّي حتى الحديد ما بقاش فيها..وزاد ڨالهم تو بربّي مصدّقين عبّاس يداوي؟ تي كان داوا راو داوا روحو ليه ما سمعتوش بيه؟ ڨالولوا لا ما فيبالناش !عباس هانا كنّا بحذاه بصحّتو يوكل ويشرب ويحمد ربي ويشكرو ومنك نسمعوا. ڨالهم مالة نڨلكم وما تعاودوا الخبر الحاج عبّاس راو عندو حرورة البولة الليل يليّل وهو يعدّيه تحت الصفة يڨطّر بالڨطرة..
صغير الحجلاوي