الطلبة تو صحة ليهم آش مدللين. نهار الّي يتخرجوا من الجامعة يحضرولهم العايلة الكل. الأم والبو والأخوات والأصحاب. وزيد الكلهم ينجحوا بملاحظة حسن جدا. ويلبسوا هركة كحلة ويحطّوا طربوشة فوق روسهم. موش كي همّي نا نهار إلّي تخرّجت عدّيت ڨايلة كاملة ونا كي الحنش ممدود تحت حيط الفاك. فالس نتكيف في بوستّة وكل مرّة نبدّل المذاق بواحد كريستال. مرمد في شورط معبي بالنوّر وشلاكة وتريكو دافيد بيكام. وكي خرجت النتيجة نجحت بملاحظة متوسط. عطوهالي حشومة وبرا. ڨلڨوا مني. أول حاجة عملتها مشيت للدار الكارينها وهزّيت السرير ودبوزة الڨاز بعتهم بنصف سومهم. وتعشيت نا وأصحابي في مطعم في بنزرت دجاج مصلي ومقرونة وڨازوز. وخذيتلها باكو ليجار وكابوسان وبتنا في الجردة للصباح ونحنا مربخينا. ويسحر هاك الشفر بكلّو خطر. ونا بيّا غراما ضايع دلوني. قلّقنا العباد وجانا الحاكم وقريب ترصّيلنا في ڨلبو. ستر ربي لڨينا عون ڨصريني يخدم معاهم سلكهالنا. ڨالنا بروا روحوا شدّوا دياركم. ڨتلو والله الدايم كان وجه ربي وليد عمّي ما عندي وين نروّح حتى المرا الّي كارين من عندها تسالني أربعين دينار والسرير بعتو وركوبي لبوزيد هاو ناقص خمسة لاف. يرحم والديه هاك الڨصريني تحرّكت فيه الجهوية دخل إيدو لجيبو ومدّلي عشرة لاف. حق ربي هبطت عليّا بورقة بوعشرة تقول لڨيت كنز. ڨتلو يرحم والديك تحبّش نعاونك في حاجة والله حشّمتني. كانت تحب نبدّلك عجلة الباڨا موش تقول ناقصة هواء. ڨالي عاوني بالرياض برّا روّح خنخدم على روحي..
تعديت طول للمحطة ومن بنزرت هبطت في باب سعدون. الفلوس بزايد خذيت تاكسي لمنصف باي ونركب لواج بوزيد وعملت بينا إستراحة في القروان. ونا كي نمشي لجماعة المقروض ويڨولولي ذوق قبل ما تشري موش نذوق برك. نحلّب عليهم. نتغدّى مقروض وبعد نوخذ كيلو من أرخص نوع. ردستها بالمقروض وروحت لبوزيد ومن بوزيد نوخذ النقل لڨطرانة. لڨيت دادا كانت تعطي في غداء الكلبة ڨالتلي وقتاش نتيجتك ڨلتلها خرجت صايي نجحت رتحتي تو. وبدت دادا تزغرت وتجري وتعفّط. ونا طلعت فوڨ الدار ركّبت بروجكتار وهبطت عملت تعسيلة فقت لڨيت الدار خايضة وخويا ذابح نعجة وڨاجوات الڨازوز مستّفة. ودادا اسمع يا لي ما سمعتش ولدي كبر وتخرج وولّى استاذ ماط ونا نڨلها ماعندك ماريتي ها دادا غير أصبر شوي عادك بيّا نولّي عريس..