..فاقت عارم مع الفجر ولبست صدلي بطاطي
وكبست حزامو على كرشها وتخنڨت بزوز محارم وحطت على اكتافها بشكير وڨرنصت تحيط
الحيط تستنى. فاق ولدها توفيق لڨاها تمضغ في العود ڨرنفل. ڨالتلو هلّا عمران ڨالكش
وقتاش جاي. ڨالها ڨال مع الزروق نتعدّى عليكم. ڨالتلو أصبح علينا ها الصباح تتعدى
على مسلانو ستيرنة محبّلهادي ها الصباح. ملّا فال عندكم ذرّية تو. الكلام
المرزي والمنظر لمشڨعب نعطلاو عليكم وعلى ربايتكم. وڨعدت تستنى وحاطة ايدها على
خدها منفوخ وزرصتها صايتة عليها وعينها ترف. باتت عليها ليلة والزرصة عملت فيها..
وصلوا
للسّوڨ ومشت عارم للدونتيست. وعمل توفيق دورة وعكلة وشرى كاج للبورتابل متاعو
وزرّادية وملعڨة وخيط خزمة وڨالب كنتول. وڨواندوات لنرجس بنت خالو الصادڨ. وحطهم
في صاك خيشة شراه بدينار ورجع لكابيني الطبيب. لڨى أمو كي غير دخلت للطبيب. ورصصت
عارم الزرصة وڨالت للطبيب أييييه وليدي يجعل منك ويرحم أميمتك. والله ملّي جيتك
المرة إلّي فاتت ولوجايع هفتت بيها بيها. ڨالها الطبيب من غير مزية أميمتي. وتلفّت
لولدها وڨالو تعرف والله أمّك سترها ربي. المرة إلى فاتت لڨيت طبيبها لوّل مرصصلها
الزرصة من غير ماڨتل العرڨ. والله بقيت باهت عمرها ما كانت الخدمة هكّا. توفيق فهم
الكلام. وهو موش خصيص. سطا وولد مرمّة وموش يرضع في صبعو وعرف الكلام مجرّد نيران
صديقة وحشان تحت الحزام وصاحب صنعتك عدوك. مازاد شي توفيق على كلام الطبيب وڨالو
بارك الله فيك وربي يهدي الناس على بعضها يا دكتور الطبة تو كثروا واصباع يديك موش
كيف كيف. وخرج توفيق وعارم من عند الطبيب وتعدّوا للسكريتيرة ومدّلها بقية الحساب
وڨالها تفاهمنا زرصة بميا وعشرين وزرصة بميا وخمسين. هام البقية عطيتك النهارات
ميا وأربعين وهاذوما البقية ميا وثلاثين. خذتهم من عندو السكريتيرة وڨالتلو يخلّص
وحلك. ڨالها بربي العشرة لاف راني مديتلك سبعة عشارين. ڨالتلو آه سامحني ما فقتش
بيها أي أي هاك عشرة. تفضل فيبالي حاسبهم. ڨالها لالا هابنتي مثيقينك ت ينا بيدي ساعات نغلط وسباحنو
من لا يسهى ..
توفيق
يمشي وداداه وراه كي ڨرب للقهوة تذكر الجماعة. ڨال والله نطل عليهم. هو دخل وأمو
دخلت وراه ولڨى الجماعة في حلڨة كبيرة اربعة مشكلين لعبة رامي. جمال ولد عم بشير
وعبد الحكيم خطيب ليلى بنت جنات ورحيّم المعلم وفيصل متريز إيستوار جيو ومازال
بطّال. والفرايجية دايربن بيهم. زياد يمروح على ولعة شيشة جمال. ونوفل ولد جنات
ينحّي في الجباد ويحشي فيه في سباط رحيّم وجمال يڨلو بربي سيب الجبّاد ممسطك. وڨفت
عارم بحذا الكونتوار ومدّلها توفيق الصاك ومشى للجماعة يتفرج وعجباتو اللعبة ونسى
داداه. فك كف عبد الحكيم وبدا يلعب بالواڨفة وڨالهم بلحرام الّا ما ندخّلكم للزون.
وعارم تعبت من الوڨفة ڨعدت على ڨالب الكنتول. تفكّرها ولدها ونادا القهواجي وڨالو
بربي هذيكة العزوزة. جيبلها كاس حليب وبربي اعملّو ضريبة فابّور باش تشربو سخون.
وڨلها لحظة آدادا هاني جيتك. وڨعد توفيق يڨانص في دام ترافل دوزيام وعارم تشرب في
الحليب والرغوة على شفايفها. وعلى الغفلة يكثر الحس والنقاش. فرشة توفيق غالطة
وكفّو زايد. وبدا توفيق يحلف ويتكتّف وڨالهم هاي لميمة بجنبي. ومشى لداده وحط ايدو
على راسها وڨالهم نشتاف عويناتي وراس أميمتي كان الفرشة صحيحة. ڨالتلو أمّو نحْ
ايدك كسرة تكسرك عمى في عينك وداء يهزّك. مڨعّدني مابين الشناتة وتشرّب فيّا في
حليب الباكوات ياهامل. هيا روّح وغير نوصلو الّا ما نحّيلك وعدك..
خرجوا
من القهوة وتوفيق يتلفت للجماعة ويطلّع في لسانو. وقبل ما يوصلوا للمحطة شرى دجاجة
مصليّة ولكمتها في الصّاك مع خيط الخزمة والزرّادية. ووصلوا المحطة وقصدوا ربي وروّحوا في
النقل وعارم عاضة ڨطنة وتوفيق محمل صاك الدوزان. وصلوا للدار وتوفيق نافح بالقالب
خلّط شكارة سيمان وبراوط رملة وڨريفاي وبدا يضرب في الكنتول لاذن الله لن الشمس
تمّست. كي ظلامت الدنيا تغسّل ودخل للدار. صلّى ظهر وعصر ومغرب مع بعضهم وحل
التلفزة واتكى يستنى في العشاء والاحد الرياضي والنهار ثلاث وتوفيق ما فيبالوش.
وعارم توكل في كويس الدجاجة وتڨلّو نحس في سنوني تطربڨ في بعضها يعطيه كيّة ها
الطبيب أشبيه عملّي الرصاص أعوج نحس فيه عامل كُدية فوڨ زرصتي..
صغير الحجلاوي