علي ين نصر الله

نصر الله معتمدية من معتمديات ولاية القيروان عدد سكانها 22 الف ساكن ومساحتها 423 كلم مربع. البلاصة هذه سموها بنصرالله  نسبة للولي الصالح علي بن نصر ويقال انه من ذرية الرسول صلى الله عليه وسلم أي انه من سلالة الحسن بن علي ابن ابي طالب وامه فاطمة. على فكرة ان كل الاولياء الصالحين تلقى في زواياهم شجرة نسبهم ودائما تنتهي الي نسب الرسول وربما هي شجرة ابتدعها اللاحقون لاضفاء نوع من القدسية لشخص الولي الصالح فلا توجد زاوية في تونس وما فيهاش شجرة نسب الولي التي تنتهي بالرسول صلى الله عليه وسلم. عموما هذا موش موضوعنا. موضوعنا سيدي علي بن نصر الله كي وصل لمنطقة بجنب جبل الشراحيل اسمها قرعة البلديات وافته المنية. قرروا المرافقين متاعوا باش يدفنوه لكن اهل البلاصة هذيكا ما وافقوش إلّا مرا وحدة قالتلهم هذا ولي صالح ما فيها باس يدفنوه في بلادنا وفي الاثناء عججت الدنيا وهبت عاصفة كبيرة رحلت بكل اهل هاك المنطقة ومنعت كان هاك المرا والمرا هذه سموها المانعة وحتى هي يتبركوا بيها ومدفونة في زاوية سيدي علي بن نصر الله. وهنا نذكر ان السياسي التونسي الكبير مصطفى الفيلالي وهو اول وزير فلاحة بعد الاستقلال وهو الّي أمم الاراضي الفلاحية التونيسية من مواليد قرية سيدي علي بن نصر الله وكان محب لقريتو ووفي ليها وكتب عليها رواية عنوانها مانعة من ايام قرية الجبل..

نرجع لسيدي علي بن نصر الله قلت كي مات وما وافقوش اهل المنطقة باش يدفنوه في بلادهم هبت عليهم لرياح وطيرتهم وما قعدت منهم كان المانعة وورثت الحكمة من سيدي علي بن نصر الله . وكي قرروا المرافقين باش يدفنوا المرحوم ما لقوش الماء باش يغسلوه وسيدي علي بن نصر الله كانت عندو كلبة سلوڨية عملت دورة في الجل وجتهم تلهث مبلولة ودلتهم على عين جارية وتمكنوا المرافقين باش يغسلوا سيدي علي بن نصر الله ودفنوه في مقامو الحالي المعروف الى حد الان..

طبعا حكاية سيدي علي بن نصر الله يغلب عليها الطابع الاسطوري والخيالي لكن وبما أن حديث يجبد حديث منطقة سيدي علي بن نصر الله ما يمكنش اختصار تاريخها كان بالولي الصالح وما انجبتش كان مصطفى الفيلالي بالعكس انجبت الكثير من الرجال البررة وأشهرهم المناضل الكبير العجيمي بن مبروك هذا من منطقة درّاج في أحواز مدينة نصر الله. هو بطل قومي ومحارب كبير تشهد له جبال الشراحيل وفايض وسيدي خليف وقطرانة قاد المقاومة ضد فرانسا وكان من اهم قادة التحرير الوطني. وبعد المواجهات المسلحة بين جيش فرانسا والمقاومين وبعد مساعي ديبلوماسية كبيرة ايقنت فرانسا انه لا مجال الا للتفاوض مع وفد تونس لباريس الّي كان يرأسو الطاهر بن عمار وها الوفد كان باتصال دائم ببورقيبة في فرانسا وبالمقاومين ولمين باي في تونس وصالح بن يوسف في جينيف وحصل الاتّفاق المبدئي يوم 22 أفريل 1955 على الامضاء على وثيقة الاستقلال الداخلي وويعد اتمام الاجراءات والاتفاق على الخطوط العريضة للاتفاق. قعد الطاهر بن عمار والمنجي سليم باش يصححوا على الاتفاق وبورقيبة قرر العودة لتونس ووصل لميناء حلق الواد نهار الأربعاء غرّة جوان 1955 ولقى الوفود تنتظر فيه من كل بلاصة وعند وصوله تقدم العجيمي بن مبروك الي كان يرأس جامعة جلاص الدستورية وكان على جواد عربي اصيل والعجيمي كان فارس وأصر على بورقيبة باش ما يخرج من الميناء كان راكب على الحصان والصورة هذيكة تترجمت بعد الى تماثيل في برشا ولايات وارتبطت بعيد النصر والحركة هذيكا الي قام بيها العجيمي اضفت نوع من الشرعية ليكون بورقيبة رئيس للجمهورية فيما بعد..

العجيمي بن مبروك ابن نصر الله كان مناضل كبير وحتى مرتو هنية كانت مرا فاضلة ومشهورة ومن المناضلات المعروفات في حقبة الاستعمار.. وبعد الاستقلال كان العجيمي يحضى بمكانة خاصة عند بورقيبة ورجله الاول في جهة القيروان وكان رجل له قيمة في الجهة. ومن نوادر هذا الرجل. وكيما قلت هو محب للخيل وعندو شخصية قوية ويحب يظهر ديما في موقع قوة. اثناء تجربة التعاضد كان والي القيروان من ابرز المدافعين على ها الفكرة لكن بعد فشلها وكي عادة السياسيين الكل بورقيبة تراجع على التجربة ومسحها في الوزير احمد بن صالح وثلاثة ولاة كانوا متحمسين للفكرة ومنهم والي القيروان واقيمت الاحتفالات في القيروان ومن بين ها الاحتفالات عملوا سباقات للفروسية وكانت فرس العجيمي في السباق واشتد التنافس بينها وبين فرس رجل معروف في الجهة ومن الاثرياء والوجهاء اسمو الشيخ مطر وحتى الرجل هذا من عايلة كبيرة وكانت ديما على اتصال وتناغم مع السلطات زمن البايات. وبدخول فرانسا تحجم دورهم السياسي لكنهم قعدوا من الاثرياء . وتجربة التعاضد اضرت بالشيخ مطر وحتى هو مشارك في الاحتفالات بفرسه وبعد اشتداد التنافس فازت فرس الشيخ مطر بالمرتبة الاولى وفرس العجيمي بن مبروك بالمرتبة الثانية. وهنا تجي الطرفة وبما ان العجيمي كان صديق لبورقيبة كان يحس في روحو هو الاولى بالفوز ما عجباتوش النتيجة وما حبش يستعرف. وقف في المنصة وقال لا يلزم نعاودوا السباق وقال " الديبار" موش صحيح ويقصد الانطلاق موش صحيح وناس بكري كانوا حرف الـــP  ينطقوه B. وفعلا تعاود السباق وفازت فرس العجيمي بن مبروك. اكراما واحتراما لشخصه. لكن هذا راهو يحيلنا على الفكر السياسي الي متأصل فينا منذ القدم . تي لا علينا هذا موش موضوعنا..موضوعنا نصر الله وشاي الله ولاي الله..

قبل ما ننسى سيدي علي بن نصر الله كي توفى كانت عندو مجموعة من السيوف في شكل مناجل وكانوا معلقين في زاويتو وهي تحفف نادرة لا تقدر بثمن وللاسف تمت سرقتهم منذ سنوات طويلة وعلى ما يبدو من اطراف كبيرة ومتشعبة. حاجة اخرى سيدي علي بن نصر الله هاك السنين عملوا فيها منقالة سبعة نوفمير. تمركي الوقت كان من الثلاثة للتسعة الشوكة متاعها كي توصل للتسعة تعرضها العقبة وترجع تطيح..

هو اصلا علاش تذكرت نصر الله . لانني لقيت حوار بين جماعة يقولوا ان اصل جلاص عرب ويستشهدوا بشجرة الانساب وجماعة اخرين يأكدوا أن قبيلة جلاص بربر امازيغ وفيهم اشكون استشهد بقولة لوزير التربية السابق ناجي جلول إلّي قال فيه في التاريخ كان ثما قديس أمازيغي إسمو جلاص الأول ويسكن في جهة الكاف اعتلى كرسي البابوية في الكنيسة الكاثوليكية وهو من من أقر عيد الحب " saint Valentin". عاد دخلت معاهم في الموضوع وقلتلهم اي بالحق جلاص اصلهم امازيغ وثما واحد متحمس برشا للعروبة قالي هات دليلك قتلو ساهلة برشا دليلي هو الكسكاس الموجود في رمبوان القروان..

صغير الحجلاوي

تعديل المقال