حصاد الشعير

كي الخريف خرّف وربي عطى خيرو. الفلاّحة الكل حرثوا سوانيهم. الزرع خيرات والعام هايل. الڨمح والشعير صابة وربي يوصل بالسالم. وحتى مارس تعدّى باهي وصبّت فيه برشا مطر. ومطر مارس ذهب خالص. في الربيع الڨصيل سيبوا عليه الشياه. زرع قوي وفيسح ما يرجع. عمل السبولة الشيء الّي خلّى نوفل ولد جنات يتأثر بالمنظر وعمل كراسة سوفينير وكتب على غلافها ملأى السنابل تنحني بتواضعٍ والفارغات رؤوسهنّ شوامخُ..

كي جا الصيف بدت الناس تجمع في الصّابة. الهادي وبناتو ومرتو سعدية كل نهار يمشوا للحصيدة. يحصدوا الشعير وكي تڨيّل الڨايلة يروحو يتغسّلوا ويتغدّوا ويڨيّلوا. الراجل شايخ على شعيراتو وربي نزّل بركتو وعم الهادي نفس مومنة وربي عطاه من خيرو وعلى نياتكم ترزقون..

شريف ولد الهادي كبير العايلة. كان باباه موجود السكات والخدمة. وكان باباه بعيد الفدلكة وضربان المعنى والتبير على الحصّادة. شريف هصّك وعاجباتو روحو ودمو فازع ومتعلم الدخان..

سعدية بصحتها الدوبل متاع الهادي الوجه أحمر وكي تقيل عليها القايلة يولّي ازرڨ صوتها مبحاح وديما تذكر ويابا حنّي غير احضر وليك مني الهديّة..

نجيب ولد الهادي دوزيام صيونس ديما يلبس تريكو المنتخب وفي كل صيف يقص سروالو الدجين ويصفنو لفوڨ الركبة. وفي أغلب الاحيان علاقتو مع بوه الهادي متوترة. مختلفين جذريا في المنهج. نجيب راديكالي ويعتبر باباه من اقصى اليمين الرجعي وداداه سعيدية أكثر انفتاح وليبرالية..

انتصار عندها غرام بوليد توفيق ونهار الكل تغني في محلاها السمرة. تعجبها سميرة توفيق وغنايات هيام يونس خاصة "سافر يا حبيبي وارجع لا تطول بالله الغيبة والدَّار بعدك أظلم والله أعطاك الهيبة". انتصار رابطة خيوطها مع ولد عمها حسين ولد بشير وكان كتب تو يعرسوا ببعضهم . ما تحصد كان لابسة سروال وتقشير صوف ومتغنبزة على الشمس باش ما تسوادش وتحضر لعرس محرز ولد البرني وهي سمحة وعينيها موش محوقين..

عبير نجحت في السادسة بالاسعاف واختها في الثالثة ابتدائي ڨال المعلم "ها الطفلة كان يتولهوا بيها باش يكون عندها شأن عظيم في قادم السنوات". الزوز يسرحوا بالشياه ويتبعوا الحصادة ويلقطوا السبول الطايح..

مع الحداش ونص لمّدوا إلّي حصدوه وحطّوه في لملمّة وسرجوها بلباهي. والهادي خبرة في حطّان حلل الشعير في الجيّابة. وڨّفوها ونجيب مشى جاب الجحشة لڨاها واڨفة تحت زيتونة مع بهيم حميدة.. ساموا البهيمة للجيّابة وحطّوها فوڨها. البنات والمرا شڨّوا السانية وجابوا المسرب وروحوا. ونجيب سلح مريولو وحطو على كرومتو ومشى للبيثراية. وشريف تفقد باكو الدخان لڨى فيه زوز سواڨر شد ثنية الحانوت باش يكردي باكو دخان على باباه في ذمة كيلو تاي. والهادي تبّع الثنية وهو يمشي بجنب لبهيمة وشاد الجيّابة باش ما تطيحش والثنية ما بين زوز صفف هندي عالين. الدنيا سخونة وما تسمع كان صوت لبهيمة تنهّج. وبرويل تحرّك في وسط الصفّة وتفجعت البهيمة. وبدت تنكّص. هي هاربة والهادي يجري بجنبها. وطاحت الجيّابة وجا الهادي تحتها. والبهيمة هربت وهو ڨيّل تحت السبول.

البهيمة تعرف الدار. كي وصلت جابتلها عبير سطل ماء وربطتها. فيبالها باباها روّح. وهو مقيّل تحت الشعير ڨريب تخرج روحو. ستر ربي جا عليه الزاير لڨاه ممدود تحت السبول والڨصوال داخل في عيونو والتلثيمة واحلة في عاتڨ ضلف. الزاير زعمة طلع فوڨ السبول وبدا يردّس وڨالو آعم الهادي باهيش هكّا. ڨالو الهادي أهبط يا ولد الكلب راك باش تخرجّلي أفّادي.  هبط الزاير وبدا يجبد في الهادي من تحت السبول وڨالو سامحني عميمي فيبالي حطيت السبول على ظهرك نسمع ديما في امي مهريّة تڨول راو الهادي متعّبو عرڨ النسا معطوب ويمشي أعوج ..

 خرج الهادي من تحت الجيّابة وخلّاها في الثنية وروّح دمّو يغلي. وصل لدارو لڨى الجحشة مربوطة في بلاصتها وسطل الماء ڨدّامها. ومن الغش جبدها من رجليها طيّحها وبدا يعض فيها من كرومتها. والكلب بدا ينبح والبهيمة تتمرغ والهادي مكبّش فيها. خرجوا لبنات من الدار. لڨوا باباهم فوڨ البهيمة ويعض فيها. دخلوا يجروا لأمهم وڨالولها بابا بارك على البهيمة. مشتلو سعدية تجري. وڨالتلو آشبيك آراجل ماك لاباس. آشبيك آش عملتلك ها البكمة؟ ڨالها مادامكم تفكرتوها وعطيتوها تشرب وما فڨدتونيش نا ڨريب نوكل راسي إمّالة نا هو البكمة. و نحّى دبشو وڨعدلهم في قلصون. وحط الزنبيل على ظهرو وحلف عليهم إلاّ ما يحطّوا عليه الضلف. ويعملولوا شكيمة ويڨودوه كي البهيم..نجيب طل من الشباك لڨاها خايضة رجع اتكّى يسمع في الراديون. وشريف جاي من الحانوت كي شاف العركة بحذا مربط البهيمة ڨيل تحت اللوزة..

الهادي يعرفوه إذا تغشش ما يعمل كان إلّي في راسو. البنات وأمهم ينحّوا في الضلف ويحطوا فيه في الزنبيل فوڨ ظهر باباهم. وهو ساعة ساعة يبدا ينحڨ ويبرطع. كي رزن عليه الزنبيل تبطح تحتو وبدى يزحف. وخرج منّو وظهرو كي الغربال مخبّش بالحلفاء. مشى لبيتو لڨى غداه مڨلي وكسرة مخمّرة ملكمتة في سرفيتة فوڨ الميدة. طرّزو برجلو والصحن مشى يشرنن. والڨطوسة لحڨت ڨرن الفلفل تحرك فيه برجلها وتهز فيه بظوافرها. والكلب مڨعمز مطلع لسانو ويلهث.والهادي لبس دبشو وصوّب للحانوت..

وجهو أزرڨ مغصور باش يتطرشڨ. لڨى الشبيبة ڨالولوا عسلامة عم الهادي طفّاهو وعمل روحو ما سمعهمش وتعدّى للشوابين يلعبوا في الخربڨة تحت الصنوبراية. ومن غير ما يسلّم عليهم ڨالهم ها رجال هاكم حاضرين. نحط في علمكم نا راني عجرودة الشعير بطّلت منها ومانيش ملمّدها. وإلّي يحب يمشي يحصدها ويدرسها يوخذ نعمتها ويعطيني سفّة التبن علفتي. الجماعة متفاجئين بالموضوع. والزاير ڨالهم إلّي صار على عم الهادي اليوم ما صار على حد. ڨبيلة لڨيتو كي خنفوس خنّاب الزبدة تحت جيّابة السبول العرڨ يشرشر و يتنفس من لوطى ومن فوڨ..

صغير الحجلاوي

تعديل المقال