موسيقى الذكريات

نومة فوڨ الدار ڨمرة ونجوم ودرب التبانة شاڨ السماء وراديون بالبيل وبرنامج عڨاب الليل في إذاعة الشباب. سهلة السلطاني تسكت وتڨول مؤاااانسة خااااصة جدااااا. وتقرا جوابات المستمعين وتمڨعيرات المراهقين. وهذا جواب من صديقتنا (م-ع) تقول علمتني الحياة أن لا حياة بدونك وروحك تأخذني على أجنحة الظلام إلى القمر البعيد. وهذه رسالة من صديقنا (ج- ط) يقول سحر الوجود ينبعث من شبابيك الامل فانت الامل الذي يسكن في ثنايا الاحلام. فشششش والراديون يزفّر والموجة ضاعت وعدل لبرة. وليد التليلي في الاذاعة الوطنية في عاااازف الليل. مسلطن مع عبد الحليم. نعم يا حبيبي نعم أنا بين شفايفك نغم. ونشرة الاخبار التقى السيد الرئيس زين العابدين مع السيد توفيق بكّار. عودة لسهلة السلطاني مؤاااانسة خاااااصة جداااا. وصديقنا (و- ك) يطلب منّا غناية ميادة أنا بعشقك انا كلّي لك. ورسالة أخرى من صديقتنا (ر- ن) ارسلت إلينا بطاقة بريدية كتبت عليها انتم نجوم التي تنير سبيلي في غربة الحاضر ووجود الواقع على رفوف الزمن المتناثر في ربيع عمري

دادا تنادي آهي أرّاح تقريب عڨرب حثلتها تحت المخدة. وين وين هاي ما ثمّاش. حليلي زيد شوف غادي. آهي آهي طرررّشق بشلاكة عليها نوّارة ورقمها تسعة وثلاثين. يلعن ملّتها ملّا عڨرب صفرة كي الشحمة ڨد كف ليد. آشنهي ڨتلتها؟ أي هاني ڨتلتها. إمّالة ادحيها غادي وإلّا لّوحها بعيد غدوة تو يوكلوها الدجاجات. مدّلي مشرب الماء وإجبد الباب وراك. سبحان الله سبحان الله سبحان الله إجبد الباب مليح سبحان الله سبحان الله سبحان الله سبحان الله...
ڨرعاية في الشباك والڨطة راڨدة على نطع فوڨ الميدة وقنفود يتكركب على ضو القمرة والكلبة تنبح والكبش يكح..

صغير الحجلاوي

تعديل المقال