هاك السنين في ڨلب الصيف فقت الصباح بكري وقصدت ربّي لڨطرانة. ماجبتش وسط البلاد وجبت على الحزام باش ما يشدنيش الحاكم ونا عندي الفيزيتة طايجة. لا علينا. المهم وصلت لڨطرانة نحّيت زوز سطول هندي وحطيتهم في المال وتمّيت راجع لبوزيد. وكي العادة قبل ما نوصل الدورية متاع الحاكم كسّرت على اليسار وبعد دخلت للمدينة وهبطت على طريق القباضات والادارة الجهوية للتعليم الڨديمة. نزرب نحب نوصل بكري قبل ما تسخن الدنيا.
هاك المنظم إلّي في الباب بدا يتهش وحسيتو أرتاحلي. ڨالي تعرفش كيفاش تو كي يبدوا داخلين نزرّفك معاهم. لكن ثمّا مشكلة صغيرة ممكن تعطّلك في الدخول. ڨتلو شنو ها المشكلة قالي راك لابس شورط وشلاكة وهذا مظهر ماهوش لائق ڨدّام الوالي والشخصيات الجهوية. ڨتلو شنو ما هوش لائق. بالعكس شورط دجين سينيي راهو. شريتو من الفريب مولاه ڨالي بعشرين دينار ونا نحّيتهولو بخمسطاش. ودرت ووريتلو لرتيكا مصنوع في إيطاليا. ڨتلو وين تعرف عليه ها الشورت ممكن كان لابسو رامازوتي. وحتى الشلاكة ماكش تشوف فيها جلد سمحة شريتها من الرحبة بثناش نلف وطيّحلي دينار والمريول أزرق سماوي فيه شعار الملعب التونسي حتى هو موش خايب مازالو كي غير بعثوهولي من تونس. دبشات طالعين علّيا آش ناقصني نا تو. وبديت نورّيلو في خيّالي نمشي ونجي تقول عليّا عارض أزياء. ڨالي اسمع كيما ڨتلك استنى هوما يبدوا داخلين وانت ادخل معاهم. وكان سألوك ڨلهم تابع المجتمع المدني. ڨتلو هي والكرهبة آش عملنا فيها. ڨالي آش تحب تعمللها. فيها هندايات تو يفسدولي ويني كرهبة الوالي نحب نراكي بجنبها للظل. ما نحبّش بعد ما تكمل الندوة نلڨاها تطبخ. راو والله لا عندي كبيماتيزور وزيد غلاف الكرسي سكاي تو نلڨاه يحرڨ. ونا هاك تشوف لابس شورت نخاف نا نقعد على الكرسي وهو يشلفطني. ڨالي لا ياراجل كرهبة الوالي وصّلاتو ومشت على روحها. برّا شوف بلاصة وين تراكي وهيّا باش تزرف مع المجموعة ما بقاش وقت عادك بيهم دخلوا. عملت مارشاريار صغير وڨلت الاتحاد بو الناس الكل. مالة نا ندفع في اشتراك بثلاثة لاف كل شهر ليه. نمشي نراكي ڨدامو. درت دورة الاتحاد وراكيتها تحت الشجرات إلّي ڨدام الصوناد سابقا. وعندي ستيلو بيك في وسط الكرهبة ڨلت ربما نستحقو نكتب بيه رؤوس أقلام. جيت نشوف فيه لڨيتو أعوج من السخانة مقوّس كي الفڨوسة. ما هزّيتوش ومشيت ڨعدت في الباب بجنب هاك المكلّف بالتنظيم وحكيتلو على الستيلو ڨالي لا راهم تو يعطوكم ستيلوات وأوراق بيضة تكتبوا عليها. وسألني ڨالي وأنت مثبّت تفهم في التنمية. ڨتلو شنو نفهم. نا صحيح تكويني علمي متاع حسابات وجيومتري آما راني نفهم حتى في الجغرافيا ونفهملها في التنمية بلڨدا بلڨدا وكنت مناضل في حزب التجمع وخبرة في التنمية المستدامة والتنمية المندمجة. ونحنا مازلنا نتحدثوا وطل علينا واحد من الشبّاك وڨالو ياسي فلان دخّل الجماعة. وكي بدوا الجماعة داخلين زرفت معاهم ودخلنا للقاعة متاع الاجتماع . إييييه ونا ماني كنت البرّا للسخانة حسيت القاعة مستروحة. وزيد حالين الكليماتيزور تڨول كان نتمد فيها ونڨيل في وسطها..
ما كنّاش برشا في وسط القاعة. والمنظمين عاملين ساركل كبيرة متاع طواول ڨعّدوا فيهم العمد وكعبتين وإلّا ثلاثة معتمدين ورؤساء مصالح. وعاملين كراسي أخرين وراهم على الحيط بالداير من غير طواول باش يڨعدوا فيهم جماعة المجتمع المدني. وفي أوّل القاعة ناصبين زوز طواول كبار عليهم ناب بيضاء و أربعة دبابز ماء وفازة صغيرة راشڨين فيها علم تونس وثلاثة وردات بلاستيك وعاملين لافتات وحدة مكتوب عليها إسم الوالي بالكبير ووحدة إسم المعتمد الاول بالصغير. ومفوّحين الڨعدة بزوز رجال أخرين كاتبين أساميهم وما عرفتش شنو محلّهم من الاعراب ماهمش معتمدين وماهمش رؤساء مصالح. اصلا عمري لا ريتهم في بوزيد. ممكن يكونوا مبعوثين من تونس باش يعملولنا التنمية..
بدا الاجتماع بالنشيد الوطني. وفتكم بالحديث نا ڨعدت من ڨدام يعني مع العمد والمعتمدين. دبرت بلاصة ڨدامها طاولة. الجماعة تحيي في العلم ومقابلني عمدة ڨرجومتو باش تتڨطع. يا بوقلب واش يحب تونس. نحنا كمّلنا تحية العلم وهو مازال مواصل يحب يكمل النشيد الوطني الكل وماباش يسكت كان كي سكتوه الجماعة. وخذا السيد الوالي الكلمة وعمل مقدمة ويبدو انه موش متكلماني ما نعرفش ممكن حاشم وعندو التراك وممكن هذيكا هي طبيعتو كلمتين وقص. وعطى الكلمة للّي بجنبو وبدا يضرب في اللغة. يشوت في شوتان صحيح. وهو يتكلّم وجابولنا أوراق وستيلوات وكل واحد باكو تروبيكو وكعبة برايك. والوالي وجماعتو جابولهم ڨازوز بوات وصحن بيتي فور. وزوز وليدات هوما إلّي يوزعوا في المشورب. ناديت واحد منهم. ڨتلو ثمش قهاوي. ڨالي بعد شوي ثما تورني أوخر متاع قهوة. عملتلو جام بصبعي. وهو جا ماشي ڨتلو بربي السكر باش تجيبوه صاشيات وإلّا طوابع. ڨالي ما نعرفش ممكن انتم طوابع والوالي وجماعتو صاشيات. ڨتلو ماني صاحبك كي تجيبلي قهوتي نحب ثلاثة طوابع سكر. زوز للقهوة وواحد تو نمصّو. ڨالي تهنى عندك كان الرجال. وهاك الطفل وصل للباب ورجعلى حط ڨدّامي دبوزة ماء صغيرة باردة ڨلاص فضلتلو من مشروب الوالي وجماعتو. وهاك العمد والمعتمدين بقو يڨحرولي ما عجبتهمش الفازة نا دبرت دبوزة ماء صغيرة وهوما كل ثلاثة متشاركين في دبوزة إيترا ونص. طفّيت الضو وعملت روحي مركز في الندوة وكل مرّة نعمل جغمة ماء باردة من دبوزتي والراجل يضرب في اللغة. ويڨلهم يلزمنا نعملوا زوم على المشاكل ونبوبوا الأولويات باش يتضح الهرم التنموي ونصيغوا برامجنا وتكون عندها آمباكت على واقعنا.. ڨلت والله باهي كلام ها المسؤول هاو ما بعدش علّى إلّي قريتو عام الباك في الجغرافيا .خذيتها اوبسيون واخترت موضوع مصر. ومصر معبية كان بالاهرامات. وهاك الراجل يتبلعط وشڨها بوزيد شرق وغرب يحكي على جلمة وبن عون وأولاد حفوز وبوزيان. الحاصل باين فيه قاري درسو بلباهي ومعتمديات بوزيد الكل ذكرها. وزيد العرض متاعو عاملّو ببروجيكسيون على ملحفة بيضاء معلڨينها على الحيط وراء طاولة الوالي وجماعتو. والوالي مسكين كرومتو أعواجت. ونا نڨول مسكين الخبزة ڨدّاش مرة. تي نا هاني في شورط وشلاكة ومريول قريب يولّي خلعة وشاعل خلّي ياهموما خانڨين أرواحهم بكرافاتات ولابسين فاستات في ها الڨايلة.. وبعد ما كمّل هاك الشخص العرض متاعو مد المايكروفون للوالي. والوالي ڨالو شكرا على هذا العرض والناس بدت تصفّق ونا كنت نشرب في التروبيكو. نحّيت الباي من فمّي وبديت نصفّق معاهم. وهاك العمدة متاع تحية العلم يعطيه سخطة وآش يصفّق. ماباش يبطّل وزيد كفوفو كبار تڨول عليه يطبطب على كرتل صدّعلي وذني. وكمّلنا التصفيق وأحالولنا الكلمة..
إلّي كان يحكي فيه الراجل في واد وتدخلات الحاضرين في واد. لا علاقة الكلام موش مقابل بعضو. كل واحد يحب طريق مزفّت يتعدّى بحذا دارو مع الترفيع في بونوات العلف. ونا ڨاعد وبجنبي رويجل بشوش ولطيف كي نسمة الكليماتيزور شخت عليه يظهر فيه ياعمدة جديد يا معتمد ماكلينو بالهف. راجل مبهاه أنيق ومزقلم لحيتو وشلاغمو مسطرين بالمسطرة وشعر راسو مسوي بالشعرة نا نتلفتلو وهو يتبسّم. سألتو ڨتلو خويا بربي تعرفش أقرب بلاصة لسبيبة وتابعة بوزيد. ڨالي سبيطلة. ظاهر فيه حتى البلاد موش ڨاتلها. ڨتلو لا ياراجل سبيطلة تابعة الڨصرين موش لبوزيد. ڨالي مالة واد معيو. ونا مسجل روحي في قائمة التدخلات وجا دوري ونادوني. نا بديت نحكي والوالي ڨالي مايسالش يا أستاذ تنجم توڨف. ونا ماني لابس شورط ما نحبّش نوڨف باش ما تبانش ركبتي. ڨتلو ما يسالش سيد الوالي ما خيرش من الڨعدة. تفلسفت فيها شوي وڨتلو ما نحبّش العلاقات العمودية نا هكا نلڨى راحتي خير. وڨلتلهم الطرقات وعلى أهميتها ما بقتش من الاولويات. أنا حسب رايي أهم حاجة هي الآبار ومضاعفة المساحات السقوية ومن غير ما ننسوا طبعا حاجبات مربي الماشية من أعلاف. ونتلهو شوي بالمدارس والمستوصفات راهي حالتها تشكي لربي. وعملت نقشة صغيرة باش نبان مطّلع على الوضع الجهوي وڨتلهم الخط المجاور للڨصرين ديما يتعرّض للتبروري وصاباتهم تتلف جرّاء الكوارث الطبيعية يلزم نوڨفوا مع الفلاحين ونعوضولهم خسائرهم ولما لا حتى البنوك تجدوللهم ديونهم. الحاصل بديت نلز لزّان لواد معيو ونحكي. كملت المداخلة ڨالولي بارك الله فيك يعطيك الصحة. وڨعدت وبديت نحرود في السكر في الڨوبلي ونترشف في القهوة ونتلفت لهاك الراجل الّي بجنبي ونتبسّملو وهو يتبسّملي. كي قريب توفى الندوة تدخل هاك العمدة متاع النشيد الوطني وبدا يشكر في الوالي والمعتمد الاول وفي المعتمدين. الحاصل الناس الكل شكرهم. وڨالهم هاني شايب وعلى ڨد ما حضرت إجتماعات ووصلت حتى لتونس آما ما حضرتش إجتماع خير من إجتماع اليوم تحت إشرافكم. ڨالولوا بارك الله فيك. ڨالهم عندي طلب صغير. ڨالولوا تفضل. وبدا يحكي. ڨال نحنا منطقتنا فلاحتها ضعيفة رغم ان ارضها باهية. وبحكم الاحتياج نسانا وبناتنا يمشوا يخدموا في الفلاحة في منطقة مجاورة لمنطقتنا. وتهزهم الأيسيزيات والطريق خايب نطلب منكم تكيّسولنا هاك الطريق باش نساوينا ما يغيبوش على الخدمة كي تصب المطر وتتسكّر عليهم الثنية. وزيد تنقص الركازي في الطريق. راهي نسانا وبناتنا ركبهم بوغرضوف ووجعتهم كلاويهم من كثرة الركازي. وطلعآش خنفس هاك المعتمد الاول في كرنيه وڨالولوا الله يبارك. نا الحق تحمصت من هاك العمدة شتهيت ندڨدڨوا بطريحة. ما عجبنيش كلامو. أصلا حسيتو لحّاس وما عندوش همّة. شاهي نجبد هاك الفازة إلّي في طاولة الوالي ونلبّزو بيها. وبعد نڨول فك عليّا ترصيليش في مشكلة ونبات في المركز. وبفيقولي بالكرهبة ما فيهاش فيزيتة وحتى كرود الهندي جبتهم من ڨطرانة مازلت ما كليتشهمش.
كملنا الاجتماع متاع التنمية ونحنا هابطين في الدروج مشيت لهاك العمدة وڨتلو والله لا تحشمها ورخيص اندادك. في عوض تطلب سنطاج وإلّا ثنين ومنطقتكم تولّي سقوية باش نساكم تخدم في سوانيكم تطلب في طريق يوصّل لسواني الناس يامڨعرة. ياراجل ڨداكش مصطك تو انت تجي مسؤول..الحاصل زعمة لحمت وباش تركح اليونيا بيناتنا جاب ربي حزّونا هاك إلّي كانوا حاضرين في الإجتماع. وروحت ولتو وين نلڨى واحد من هاك المنطقة نسألو على عمدتهم ونحكيلو حكايتو
على فكرة هاك الرويجل الي بجنبي وديما يتبسّم جا ومشى وما ڨال شي. وكي جا خارج غرف غرفة بيتي فور من صحن الوالي وحطّها في جيبو وخرج يتبسّم..
صغير الحجلاوي