عم حميدة عرصة من عرص الجهة. مرتو حليمة وبو
عايلة كبيرة. بناتو وأولادو سعدية والسيدة ولمجد وفريدة وعبد الجبار وآمال ڨريدة العش. خدم عليهم وطلّعهم رجال بخدمهم ونساء برجالهم. صب على
روحو في الضمان الاجتماعي وعندو مدة كل راس شهر يجبد الماندا. وحتى عبد الجبار موش
مقصر معاه. كل شهر يبعثلو دو صون أورو من إيطاليا وزاد حفرلو بير في السانية. ديما
صطوشو في جيب الفرملة متكّم بالفلوس. يخلّص تراكتور الحرث وزبّار الزيتون بالحاضر.
ما يحبش الديون وموصّي خالد العطار ڨالو ديما كي يوصل الكريدي ميا وخمسين دينار اعلمني
باش الزمام ما يثقلش عليّا..
عم حميدة ديما عندو السكوب في أمور الدين حاج
بيت سيدنا ابراهيم ويحفظ كلام ربي. ومرتو حليمة ما تسمع القرآن كان بصوتو خيرلها
من البراق والحصري والطبلاوي. تقعد بجنبو تثني ركبة وتمد لخرى وتسمعو يرتل القران.
تسربيلو التاي وتعبيلو الطاسة بالماء. وهو يغطيها بورقة كردونة مقيد عليها تاريخ
طريدة الشياه. وديما ينشر بشكير تحت المصحف ويتربع ويبدا يجلج في القران. يتعتع وما
يتسرح كان في سورة طه. وڨل الرسول صلى الله عليه وسلم ڨال آية من القرآن خير من
ناقة حوّة..وحليمة وين توجعها سرّتها يقرالها آية الكرسي على كاس ماء ويغطس فيه
صبعو كي تشربو تذهّن من الوجيعة وكي ترزن اكتافها تعطيه صحفة زيت يقرالها عليها
وتمسد من كرومتها لتحت مسلانها باش تحس بالراحة..
الحاج حميدة
يكره الشراب والّي يشرب شراب وإلّي يتحدث على الشراب . قال ام الخبائث والي يشربو
يخرج من ملة محمد ما يدخلش الجنة. وفي كل فرح يصبح يلمّد في الطابوات من سانيتو ويسب في الشباب
ويلعن. وڨالهم على ڨد ماعشت وهاني شايب لا حطيتو في فمّي ولا نعرفلو منظر. لا
والله في وقت فرانسا تكيفت واحد تكروري عادي بروحي في ڨربي جدّي لڨيت روحي في بر تونس
دايرين بيّا الجدارميّة ومسلسليني مع المجاهدين..وعم حميدة حالف الّي يشدّو يشرب في
سانيتو الاّ ما يثوّر عليه بالمڨرون. وعم حميدة عندو مڨرون وعمرو لا تصيّد بيه.
مرة وحدة ثوّرعلى ثعلب عبثت بدجاجات حليمة. الثعلب منعت والعمارة ڨتلت القطة..في
كل مناسبة يعمر المڨرون ويحطوا على اكتافو وكي يڨرب للنساوين يعطي الوجه لوّل
وحليمة تبدا تدور بيه وتزغرت ويڨدم عشرة خطوات ويلفتو للرجال ويزيد الوجه الثاني
ويحط المڨرون في تركينة البيت ويبقى يعس عليه..
الحاج حميدة من بنات الدوّار الكل تعجبو نجاح
بنت محبّلهادي ڨال طفلة معقولة وباهية وحاذڨة وحاسبتني كيف بوها. وملّي شافها مرندفة
مع نوفل ولد جنات كرهها وڨال ذرية تو ناقصين تربية وصحاح عين..
عم حميدة ناس املاح وعرصة من عرص الجهة وجاه عيد الأضحى وهذه سنة من السنن المؤكدة مع الاستطاعة وعم حميدة يستطيع وما يعيّد كان على الذكر الصردي لڨرن وصوتو مبحاح..
صغير الحجلاوي