عم حميدة قيّد في الحج وڨعد ماشي راجع للمعتمدية يسأل على مطلبو. وكل مرّة يتعدّى لإدارة الطفولة وين يخدم الكامل ولد خوه ويڨلّو وليد خويا أحرص على المطلب نحب نزور بيت ربّي قبل منام عيني. ووين عم حميدة يطل على مطلبو وولد خوه يزيد يتعدّى للمستوصف عندو ولد صاحبو خدم معاه في عسكر فرانسا. الطفل هذا فرملي ويحب عم حميدة وديما يقيسلو ضغط الدم وڨال نشم عليه في ريحة لاجودان بابا. وعم حميدة ڨال ماكينة مستوصف المدينة أثبت وخير من ماكينة مستوصفنا. الكامل ولد خو عم حميدة هذا شر ماخلق ربي. ديما بالعو. الناس الكل عاڨرها في فلوسها. خمسطاش سنا لتالي وعد زميلتو باش يعرّس بيها. عملتلو قرض خذا بيه كرهبة وهرب عليها. جاب ربّي زميلتو لڨفت روحها ودبّرت راجل. وتو بنتها في الكولاج. الكامل كي بدا يخدم خذا دار على السنيت وقال قرض الدار هرّاني وهوما يقصّولو في سبعبن دينار والدار ولّت خربة وبابها مسكروا بشرلية. عم حميدة وين يوصّي الكامل على مطلب الحج الكامل يڨلّو أعطيني عشرة لاف حڨ تنمبري نكمّلوه للأوراق ويضرب العشرة لاف من عند عم حميدة ويكمّل بيها حق سكرتو حاشى الشهر. وتعدّت الايامات وسهّل ربي على عم حميدة وهبط إسمو في الحج وعمل تحاليلو. وحضر أوراقو. وحفظ أركان الحج. وولّى يفرّق مابين الاركان والواجبات والسنن. وحتى البلايص حفظهم من عرفة والصفا والمروة والمزدلفة ومنى. وڨال لمراد ولد عم بشير حطلي التلفزة على موجة القرآن. ومراد فكساهالو في قناة إقرأ. ويبات عم حميدة كل ليلة يسبّح وحليمة مرتو تطيبلوا في التاي. وتحسنت علاقتها بيه وما عادوش يڨنڨنوا على بعضهم.
عبد
المجيد بعد النبزة عمل آبال تحت حس مس لمرتو حياة. وحياة وڨفت وباست حليمة
وڨالتلها هيّا اميمتي تو نا هاني مروّحة وما تنساش تڨول لعم حميدة يدعيلنا دعيوة
خير. وڨفت حليمة وشايعتها لباب الحوش. لزّت حياة لحليمة وجبدت حكة شامية من جيبها
ومدتهالها وقالتلها ينوب عليك أمّيمتي أعطيها لعم حميدة هاذي سرّة الصبي ولدي.
ڨوليلو لوحها في تراب سيدنا محمّد. خذتها حليمة من إيدها وڨالتلها وصلت أمانتك
وبارك الله فيكم على ها الخطى السعيد.
عبد
المجيد خرج. والهادي حط ايدو على الميدة وبدا يطبطب عليها وڨالهم ها جماعة هيوا نذكروا
حتى ربع ساعة. المحضر محضر خير والذكر باهي. ودوّروها الرجال ذكر وبدوها بأمن
تذكّر جيران بذي سلم وختموها بـ"أهل الله راهم جازوا ياسامع قولي اصغاه.
بلغوا مناهم لما جازوا وفنوا عمّا سواه. شغلوا عمرهم حتى فازوا بلا إله الا الله".
وعبّاس ڨرجومتو باش تتڨطع ويعيّط لا إله إلا الله لا إله إلا الله والجماعة
يمدّولوا في كاس ماء. والنساء في البيت لخرى يسمعوا في الذكر وحليمة شادة سبحة
وقالتلهم عاودت قل هو الله ميتين مرّة. والبنات في الكوجينة يحكوا على المسلسل
وشاروخان محلاه. وفريدة ڨالتلهم والله لايجي في نص فتحي الهدّاوي غير عطاه الوقت.
ولولاد عاملين صف كراسي تحت ديماكس عم بشير وكي الرجال كمّلوا الذكر. فيصل بدا
يغنّي ويڨول مُر فراڨك ما تڨطاش مر فراڨك. يحرڨ في الجاش والعيشة بلا بيك لواش مر
فراڨك. وجمال بعاود معاه لالالا. ووڨف زياد ولد عمران وبدا يدلوح في راسو. وڨالهم
يالالا وعيونك سود وجلابات يا لالا. وعلى التلفيتة يلڨى البرني ماشي يستريح. لبد
فوڨ الكرسي وسكتت الجماعة. وجمال ڨالو عسّلامة عمّي البرني . والبرني ڨحرّلهم
وطفّاهم وتعدّى.
عم
حميدة يلزموا يرتاح صابح مسافر لبيت مكّة. وبشير ڨال هيّوا أوخياني نروحوا. وبربي
قبل ما نتفرّقوا أشكون ماشي غدوة مع الحاج يشايعو. نا عليّا بتقوالله كان زعمة
ماشي نجيب في فيّاج حلفاء من الڨصرين. أما ما عطانيش ڨلبي ڨلت الحلفاء ما ڨطعتش
والڨصرين ما بعدش. غدوة تو نمشي مع الحاج للمطار. وتبرمجت المشية. ديماكس عم بشير
وبرلنڨو محرز ولد عم البرني وفيات عمران وكليو كمال والدوسون سيس متاع شريف ولد عم
الهادي وسامبول مدبّرها جمال من عند خو سميرة صاحبتو سميرة. ووڨفت الجماعة. تبقوا
على خير تبقوا على خير. وحمّل الكامل عمّو حميدة وبدا يبوس فيه ويبكي. ويقلّوا
بيناتنا السماح عميمي. راك في مقام المرحوم بابا. وحليمة في وسط النساء تڨلّهم ها
بنات الحاج هاو ماشي لبيت ربي ونا تو ما عادش نخرج من الدار وماتشوفونيش كان بعد
رجوعو أوخيّاني على موت على حياة مسامحتكم الكل الكل الكل وتمسح في فمها وتدخل في
شعرها تحت فولارتها..
رڨد
عم حميدة متشوّق للحج. وحليمة ما غمضتش عيونها للصباح. أول مرّة عم حميدة باش يغيب
على الدار ها المدّة الكل . ومع الفجر توضى عم حميدة ولبس هركتو البيضة وعرّاقيتو
وتلثيمتو وسطوش بالسيور على كتفوا. وجملت الكراهب وركب عم حميدة في سامبول جمال.
قالوا أصيان في السياقة. وتبّعاتو الكراهب وكبّت حليمة وراهم سطل ماء وڨالتلو برّا
السماح حميدة مولى بيتي ما ريت منك كان الخير تمشي وترجعلنا بالسلامة بركة ها
الغبش..
صغير الحجلاوي