الخبر: لأول مرة منذ سنوات بلغ معدل
امتلاء السدود التونسيّة أكثر من 40 ٪ هذا ما أفاد به كاتب الدولة المكلّف
بالموارد المائية في تدخل إعلامي . انتهى الخبر
حالة سدودنا هذه ذكرتني ببابا هاك السنين. منين كنا أربعطاش في العايلة كنا
نسكنوا في ثلاثة معامير وفي أول الثمانينات تحسنت الأمور وبنالنا أربعة بيوت زوز
متلفتين للڨبلة ووحدة للشرڨ ووحدة للغرب وبيناتهم فيراندا. وڨعدنا هكاكا سنين.
لولاد فيهم الّي عرّس وفيهم الّي مشى للجامعة وحتى لبنات عرسوا وبقيت كان نا وياه
ودادا. ظهرلو بدا يبني في البيوت. بنالنا ستة بيوت وڨاراج وكلوار.أشكون باش يسكنهم
والله ما نعرف. الحاصل عدّالنا ثلاثة سنين مرمّة. نحنا نغفلوا وهو يبدا يرشم في
ساس. وكل مرة يظهرلو يبني بيت في بلاصة. جا غرب الدار ورشم الساس لزوز بيوت وحدة عملها
توالات يستعملها كان هو. ووحدة ڨال نحط فيها العلف وبعد ما كملهم مشي شرڨ الدار وبنا
بيت والله ما نتذكر نهار استغليناها في حاجة. بيت مربعة كي الكعبة. بابها حديد
ومتلفتة للڨبلة ما فهمتش بابا وقتها آش يحب يعمل. الحاصل السطاوات شبعوا في بابا
قريب يترسموا عندو ويولّي يصب عليهم في السي آن آس آس. عنا تقريب اثناش بيت بناهم
بابا هكاكا فساد فلوس من غير ما استعملناهم. هو أصلا بابا عندو فيها ها الحكايات.
مرة جاتو نفحة في المعالف. وين يتسوّڨ يشري معلف وصلوا عنّا ثمنية وعشرين معلف
ونحن في الاصل عنا عشرة نعجات وين تتلفت تلڨى معلف. اكثرش من البهيمة بابا عمللها
ثلاثة معالف واحد للفطور وواحد للغداء وواحد للعشاء. والبغلة هذيكة مدللها حتى هي
مشيخها عامللها معلف للديسار..
تقريب تخطيط الدولة متاعنا كي
تخطيط بابا يعمل الحاجة وما يعرفش ليش تصلح وين يتسوق يجيبلنا ستين ميترو حبل وزوز
سلاسل ويلكمتهم في صاك ويڨلب عليهم البرميل..
آكاهو أربعين في الميا يا رسول الله. يعني وديان تهرهر والرصد الجوي ينبه على
الناس وحرس المرور يبدل في الثنية والدنيا مطبعة وبعد نلڨوا سدودنا حايزين جغمة
ماء؟ آنهار مغبّر. وزيد ما يوصل جوبلية كان نبدوا ننزّحوا فيهم بالطاسة وهي تڨول
وغووق وغووق.. يا ربي حني انت ارحمنا والسدود اش عندك فيهم تعبوا والا الله لا
تعبوّا محسوب نحنا موالفين بيها..
كانك عليّا نا عندي معمّل على صاحبي يحفر في بير. عندو شهرين وين نسألوا
طلعتش الماء يڨلي مازلت واحل في الزبس..ظاهرلي حتى هو ما يبعدش برشا على جماعة
الموارد المائية متاعنا..