زهور بنت عم بشير يعد ما كمّلت السومان بلوكي شرت كيت بلوتوث لتليفونها وعشية كاملة وهي تدور في السانية وراتعة في المشماشات وتوكل في اللوز الفريك وكل شجرة تجي تحتها تنفخ شفايفها وتعمل معاها سلفي. زهور ذواقة تقرا لاتر وتكتب في الخواطر على الفيسبوك وحسابها الاميرة زوزو وصورة بروفيلها طلفة واڨفة فوڨ ڨنطرة على البحر وتشم في وردة وكم مريولها مغطيلها أصباعها..
زهور مغرومة بالرومنطيقية وخاصة بابراهيم ناجي وعمر أبو ريشة وتطش طشّان في جبران خليل جبران وتحب كل ماهو كلاسيك موش كي بنات جيلها. رغم أنها ساعات تخرج على الموضوع وتبدا تلوج على آخر آخبار الانستقراموزات وأخبار غيلان الشعلالي وأمان الله مميش..زياد ولد عمران كي شم ريحة زهور حتى هو مشى يدور في سانيتهم ويبدل في رباط الحصان. زهور كي لمحت زياد حطت غناية نجاة الصغيرة متيليشرجيتها من مدة عجبتها كلماتها. وبدت تدندن في الغناية وتتشقنص وتعاود مع نجاة _ حبيبى يا موكب حب يا دفى للقلب يابحر من الحنان يا أمى وأبويا وصاحبى وخويا ونصيبى من الزمان_ وبدلال حرف الباء تنطق فيه V"" باش تمخور زياد في مخو ويزيد يتضرب فيها ويغرق في حبها على ڨد ما هو غارق . تدندن مع نجاة وتڨول " حvيvي يا موكv حُv يا دفا للقلv ياvحر من الحنان يا أمى وأvويا وصاحvي واخويا ونصيvي من الزمان". وزياد صبر صبر وبعثلها ميساج وڨالها السلام بربي زوزو ماك تعرف عندي شهادة من التكوين وڨالوا اوروبا طالبة خدّامة ونصحوني الجماعة باش يكون الدوسي متاعي قوي ڨالولي يلزمك شهادة في اللغات نحب نسألك زعمة نعمل فورماسيون في الألمانية وإلا في الإيطالية. زهور عملت روحها ما شافتش الميساج وبدلت لبلاصة وقربت لدارهم وزياد ڨعد يدور بالكرمة ويلوّج على ورّاية البيثر..روّحت زهور وروّح زياد وفي الليل بعثتلو ميساج وڨالتلو ديزولي قبيلة ما فقتش بالميساج. ننصحك أقرا إسبانية وكان تحب تتمكّن منها بلباهي ديما اسمع خوليو اڨليسياس كلماتو ساهلة ومفهومة. وزياد أول مرة يسمع بها الاسم رجعلها وڨالها والله أحسن ان شاء ربي يكتبلنا في خرجة لاسبانيا إلّا ماضال كل نهار أربعاء تلقاني في الكامب نو لابس مريول لمين بامال ونتفرج في البارصا وعمل ضحكة هههه وايموجي طالعة من عينو قلوب. ردتلو زهور بجام زرقة وڨالتلو bn وقعد زياد يركّح في الشارجور ويلحس في شواربو لمشققة بحليب الكرموص..صغير الحجلاوي
